Read Kalanga Amosi 7 Bible Online

Amosi 7 - Kalanga bible

Amosi 7

¹Eyi ndiyo mbono yandakalakidziwa ndi She Yahwe. Shule kwa mambo asinomwayigwa bushwa mu tjibaka tjegothinila, ndakabona Yahwe be thama phashu.

²Mu mbono yangu ndakabona phashu idzedzi dzija tjimwe ne tjimwe mu shango tje mmbala we bgwelele, ngono dzikati dzopedzaja ndakati, “She Yahwe ndomukumbila zwiibhatigweni bathu benyu, dumbu banowotjila tjini wali? Batukununu kwazo abana matatabuko.”

³Ipapo Yahwe bakashandula nkumbulo wabo, bakabe beti, “Akutjowoshingikala.”

⁴Eyi ndiyo mbono yandakalakidziwa ndi She Yahwe: Ndakabona She Yahwe bezwilulwamisila kusumikilisa nge moto, ngono moto ukawomesa vula dzimukatikati, ukabuya ukaja shango.

⁵Ipapo abe nditi, “She Yahwe tjimisani ikoku, ndomukumbila. Dumbu bathu benyu banowotjila tjini wali? Batukununu kwazo abana matatabuko.”

⁶Ipapo Yahwe bakashandula nkumbulo wabo muna ikoku, bakabe beti, “Na ikokubo akutjowoshingikala,” koleba Yahwe.

⁷Eyi ndiyo mbono yandakalakidziwa ndi She Yahwe: Ndakabona She bakabhata nsungwana unoshingisiwa kutambunudza guma bali mile kubapa ne guma lakati libakiwa likatambunudziwa ne nsungwana.

⁸Ngono Yahwe bakandibhuzwa beti, “Amosi unobonani?” Ashandula nditi, “Nsungwana unoshingisiwa kutambunudza.” Ipapo Yahwe bakabe beti, “Bona, ndolonga nsungwana unoshingisiwa kunotambunudza pakati kwe bathu bangu Baiziraela, kulakidza kuti abazotambunuka ndizo anditoshandula nkumbulo wangu kubasumikilisa.

⁹Magalo apezhugwi e kunamata a Isaki anowokolomodziwa ne magalo akayengemala e Iziraela anowobe matongo. Ndowobhayana na Mambo Jeroboamu nge thumo langu.”

¹⁰Ipapo Amaziya mpirisiti we Bhetele kayisa mahwi kuna Jeroboamu mambo we Iziraela eti, “Amosi unolanganila kuliga bushe gugo mu Iziraela. Shango aingadzikitadzile matama awe.

¹¹Amosi unolebeleka eti, ‘Jeroboamu unowofa nge thumo, nge malebeswa Iziraela unowotapigwa kule ne shango iye.’ ”

¹²Amaziya kadwa Amosi kati, “Iwe mboni, tizhila ku shango ye Juda, uwane zojiwako ne dama le Ndzimu ulisumikileko.

¹³Usibe utjalebesambeli mu Bhetele ngoti bugalo gwakayengemala gwa mambo ne ng'umba iye ye kunamata ye mbuso uwe.”

¹⁴Amosi kashandula Amaziya eti, “Imi andite ndili nlebesambeli, kene nkololo we nlebesambeli, koga ndi nlisi ne nlimi we mipaya.

¹⁵Koga Yahwe bakanditola ndakalisa zwithuwo, bakandidwa bakati, ‘Yenda unolebesambeli ku bathu bangu Baiziraela.’

¹⁶Koga ngwenu unohwa dama la Yahwe ngono ube uti, ‘Usitongolebesambeli ngekwe Iziraela kakale misa kusumikila kusakanaka ngekwe ng'umba ya Isaki.’

¹⁷Ngono tjinoleba Yahwe etji, ‘Nkadzi uwo unowobe fukula mu nzi nkulu, bakololo ne bakololokadzi babo ibo banowobulawa nge thumo. Nnda uwo unowolizanyidziwa ukathubugwanyiwa, ngono iwe unowofila mu shango yakatemapala. Baiziraela nge malebeswa banowotapigwa kule ne shango yabo.’ ”