Read Kalanga Amosi 8 Bible Online

Amosi 8 - Kalanga bible

Amosi 8

¹Eyi ndiyo mbono yandakalakidziwa ndi She Yahwe. Ndakabona seme ina mitjelo.

²Bakandibhuzwa bakati, “Amosi unobonani?” Adabila nditi, “Ndobona seme ina mitjelo yakabidwa.” Ipapo Yahwe bakati kundili, “Bhelelo laswikila bathu bangu Baiziraela, anditoshandula nkumbulo wangu kubasumikilisa.

³Mu zhuba ilelo njimbo mu Ng'umba ye Ndzimu dzowoshanduka dzikabe tjililo, koleba She Yahwe. Zwitumbu zwinjinji zowobe zwakaandama pamwe ne pamwe. Kowobe kwakati hwuu.”

⁴Imwi banotshambilidza basheti, kakale mulobesa bashayi mu shango.

⁵Muti, “Nzano we Mwedzi ugala unowopela lini ne zhuba le Sabata lowopinda lini, kuti titangise tengesa mathunde kakale, titapudza zwilizanyo tibiga themba dzipezhugwi titjebela,

⁶titengesela bashayi zwikoto zwe korong, titenga bashayi nge siliva, basheti tibatenga nge shangu,”

⁷ihwani woku, Yahwe ibo Gudzo le Iziraela batuna bakati, “Akuna tjandingakangang'wa tje mishingo yenyu.

⁸Apa shango aingatengenyeke ngekwa ikoku kene? Na ibo bagele muili abangabe mu tjililo kene? Se gwizi gwe Naili, shango yose inowomiduka ikadzongeka kudwapo ikatebama.

⁹Mu zhuba ilelo, ndowothama kuti zhuba limile masikati makulu, athama kuti shango ibe zhalima mu masikati.” Koleba She Yahwe.

¹⁰“Ndowoshandula mizano yenyu ikabe buyendasi ne njimbo dzenyu dzikabe zwililo. Ndowothama kuti mutesele mavudzi enyu kakale muambale saka le tjililo, zhuba ilelo mowobe mu tjililo se nzwadzi elilila nkololo uwe wakazwagwa ega ngono afa. Tjimwe ne tjimwe mu zhuba ilelo tjowobe tjinogwadza kwazo!

¹¹“Tjibaka tjaswika, tjandinowotumila bhamba mu shango, bhamba lisi le zojiwa, kene le nyota ye vula, koga le kuhwa matama a Yahwe.” Koleba She Yahwe.

¹²“Banowodzungayila kudwa mu gungwa kuyenda ku gumwe, ne kudwa ku bunandzwa kuyenda ku bhezhuba, banowolabuka beyenda yeno na yeno beshaka dama la Yahwe, koga abatowoliwana.

¹³Mu zhuba ilelo baanadi babuya ne bazhuzha bakasima banowotimbama nge nyota.

¹⁴Ibabo banotuna nge midzimu ye Samariya beti, ‘Nge ndzimu we Dani,’ kene ‘nge ndzimu we Bheerisheba,’ banowowa bakasitongotjamuka kakale.”