Read Kalanga Jona 1 Bible Online

Jona 1 - Kalanga bible

Jona 1

¹Dama la Yahwe lakazha kuna Jona, nkololo wa Amitayi, liti,

²“Milika uyende ku Ninive, nzi nkulu usinshoma, usumikile kuti matjinyo abo akandikopodza.”

³Koga Jona wakamilika katizha pa mesho a Yahwe, katizhila ku Tashishi.[1] Ndizo kadelukila ku Jopa[2] kwaakawana ikepe tjinoyenda ku Tashishi, kalipa themba, kadelukila mutjili kuyenda nabo ku Tashishi etizha pa mesho a Yahwe.

⁴Koga Yahwe bakazhulila phepho isishoma mu gungwa, ndizo kukabe ne dutu lisishoma mu gungwa, ngono ikepe tjikashoko pkhwanyika.

⁵Bayendisi be ikepe bakatja, ngono bakalila mmwe ne mmwe edana ndzimu uwe. Bakaposela thundu dzakabe dzili mu ikepe mu gungwa kutjilelusa. Koga Jona kabe adelukila pasi mukatikati kwe ikepe kalala pasi ngono kafa nge hwope.

⁶Ntungamili we ikepe kazha kunli ngono kandwa kati, “Wakayizelelani? Muka ukumbile ku ndzimu uwo! Pamwe ungatikumbula tikasilobe.”

⁷Ngono bayendisi be ikepe bakalebesana beti, “Ngatikandileni kuti ndizo tizibe ungabe athama kuti tibe mu mbatsha idzedzi.” Ndizo bakakandila ngono kukabhakhwa Jona.

⁸Ngono bakati kunli, “Utibudze ungabe athama kuti tibe mu mbatsha idzedzi. Nshingo waunoshinga ndiupi? Unodwa ngayi? Shango ya kanyi kwenyu ndiipi? U ludzini?”

⁹“Imi ndi Nhebheru,” Jona ebashandula, “ndonamata Yahwe, Ndzimu we kudzimu, ibo bakathama gungwa ne shango.”

¹⁰Ngwenu balume ibaba bakazhigwa ngotja kusikushoma ngono bakati kunli, “Ini ikoku kwawathama?” Balume ibaba bakabe beziba kuti wakabe etizha pa mesho a Yahwe, ngobe wakabe ababudza.

¹¹Ngono bakati kunli, “Tikutini kuti gungwa gutidzikamile?” Ngobe gungwa igo gwakabe gudzongeka guyenda mbeli.

¹²Ngono kati ku bali, “Munditole mundiposele mu gungwa, ndizo gungwa gowomudzikamila; ngobe ndoziba kuti ndimi ndathama kuti dutu ileli lisishoma limuwile.”

¹³Koga balume ibaba bakatjikodza betjitendebudzila shule ku shango, koga bakakong'wa, ngobe gungwa gwakadzongeka guyenda mbeli gukabakulila.

¹⁴Ndizo bakalilila kuna Yahwe beti, “Tomukumbila Yahwe, musitilobese ngekwe butjilo gwe nlume iwoyu, kakale musititilike nlandu ngotebula lopa lisina nlandu, ngobe imwi Yahwe mathama sekwa mada.”

¹⁵Ndizo bakamilidza Jona bakamposela mu gungwa, ngono gungwa gukadzikama gukama kudzongeka.

¹⁶Balume ibaba bakatja Yahwe ngotja kusikushoma, ndizo bakadusila Yahwe tjibhayilo kakale bakaloba tjinyala bakatuna.[3]