Read Kalanga Jona 3 Bible Online

Jona 3 - Kalanga bible

Jona 3

¹Dama la Yahwe lakazha kuna Jona gwe bubili liti,

²“Milika uyende ku Ninive nzi nkulu usinshoma, ngono usumikile kuuli sumikilo yandinokudwa.”

³Ipapo Jona kamilika kayenda ku Ninive kuyendidzana ne dama la Yahwe. Ninive wakabe uli nzi nkulu usinshoma mu mesho e Ndzimu, kungabe gwendo gwe mazhuba matatu kuupalama.

⁴Jona katangisa kungina mu nzi nkulu gwendo gwe zhuba, ngono kasumikila eti, “Mu mazhuba ali makumi manna, nzi we Ninive unowobe ukolomogwa.”

⁵Ndizo bathu be Ninive bakagalamoyo mu Ndzimu, ngono bakaloba lukombo ngekwe kuzwinyima zojiwa, bakaambala jila le saka kudwa mu nkulu tjose kunoti mu ntukununu tjose.

⁶Kwakati thawu dziswika kuna mambo we Ninive, kamilika pa tjigalo tjitje tje bushe, kambula tjiambalo tjitje tje bushe, ngono kazwifukidza nge jila le saka ebe enogala pa tjizhalanlota.

⁷Ipapo kadusa mima ngono ikaandama nge Ninive yose eti, “Nge kulaya kwa mambo ne hadzasha dzidze, ‘Kusibe ne nthu kene ithuwo, ng'ombe kene pkhwizi zwingalabila tjimwe, kusijiwe ne vula kusing'wiwe.

⁸Ngakuti nthu ne ithuwo zwifukidziwe nge jila le saka, kuliligwe ku Ndzimu nge masimba, ngono mmwe ne mmwe ashanduke mu zila dzidze dzakabipa ne mu ngwa dze maboko.

⁹Ndiani unoziba, Ndzimu ungashanduka ukabe ne ngoni, ungashandukila bushongola gwawo gunotjisa kuti ndizo tisilobe.’ ”

¹⁰Kwakati Ndzimu ubona mishingo yabo kuti bashanduka mu zila dzabo dzakabipa, Ndzimu ukabe ne ngoni ukashandukila kuhwisa zogwadza kwawakati unowobathamila iko, ngono ukasikuthame.