Read Kalanga Jona 4 Bible Online

Jona 4 - Kalanga bible

Jona 4

¹Ngono ngwenu ikoku kukakutha Jona kwazo kwazo ngono kagwadzamoyo.

²Ndizo katembezela Yahwe eti, “Imwi Yahwe, apa ate iko ikoku kwandakaleba nditji ku shango ya kanyi kwedu kene? Ndizo wali ndakalibilidza atizhila ku Tashishi, ngoti ndakabe ndiziba kuti mu Ndzimu una ngoni ne lubu, una moyonlefu kakale uzhele ludo, Ndzimu unoshandukila kuhwisa zogwadza.

³Ngono ngwenu, Yahwe, tolani butjilo gwangu, ngobe koyita ha ndingafa pana kuti nditjile.”

⁴Yahwe bakashandula beti, “Apa unothama zwibuyanana kugwadzamoyo kene?”

⁵Ipapo Jona kabhuda mu nzi nkulu ngono kanogala ku bhezhuba kwawo. Kazwibakila nshasha ikoko kagala kusi kwawo mu ntutshi akalindila kubona tjinoshingikalila nzi.

⁶Yahwe Ndzimu bakamedza denjana bakalikudza kuti Jona alonge nsholo mu ntutshi kutebamisa kugwadzamoyo kukwe. Ngono Jona kashathila denjana ilelo nge shatho hwulu kwazo.

⁷Koga kwakati tjimuka mazhokuyedza Ndzimu ukazhisa gonyana likaja denjana, ngono denjana likafa.

⁸Kukati zhuba libhuda Ndzimu ukazhisa phepo inopisa ye ku bhezhuba, ngono zhuba likabhaya mu nsholo wa Jona kashoko timbama. Ndizo Jona kakumbila lufu gugwe eti, “Koyita ha ndingafa pana kuti nditjile.”

⁹Koga Ndzimu ukashandula Jona uti, “Apa unothama zwibuyanana kugwadzilamoyo denjana ileli kene?” Ngono iye kati, “Ndothama zwibuyanana kugwadzamoyo kuswikila lufu.”

¹⁰Ngono Yahwe bakati, “Iwe unohwila zogwadza denjana lausakatukutilila nenguba kuli kulikudza, ilo lakabepo mu busiku, likafa tjimuka busiku.

¹¹Ngono apa imi ndisihwile ngoni Ninive, nzi nkulu zwingapa una bathu bangapinda zwiwulu zwili zana lina makumi mabili (120 000) basingathubukanye bubuya ne bubi, kakale una zwithuwo zwinjinji?”