Read Kalanga Mbalo 1 Bible Online

Mbalo 1 - Kalanga bible

Mbalo 1

¹Kwakati Yahwe bakalebeleka na Mushe bali mu tjilambanyika tje Sinai bali mu nshasha we bushanganilo, mu zhuba le kutanga le mwedzi we bubili mu gole le bubili shule kwe basinobhuda mu shango ye Egipiti beti,

²“Balani gubungano le bathu be Iziraela, nge njudzi dzabo nenge misha yabo, mubale nlume mmwe ne mmwe nsha nge nsha.

³Balume bose be Iziraela bana makole ali makumi mabili kuyenda pezhugwi bakalizana kuyenda ku ngwa, mubabige nge makupo abo iwe na Aroni.

⁴Mutole nlume ng'ompela kudwa mu ludzi gumwe ne gumwe kumubhatsha ali nsholo we ng'umba ya katate babe.”

⁵Awa ndiwo mazina e balume banowomubhatsha: Kudwa mu ludzi gwa Rubheni, Elizuri nkololo wa Shedeuri,

⁶mu ludzi gwa Simiyoni, Shelumieli nkololo wa Zurishadayi

⁷mu ludzi gwa Juda, Nashoni nkololo wa Aminadabu,

⁸mu ludzi gwa Isakari, Nethanele nkololo wa Zuari,

⁹mu ludzi gwa Zebuluni Eliabu nkololo wa Heloni,

¹⁰kudwa mu bakololo ba Josefa ne kudwa mu bakololo ba Ifureimi, Elishama nkololo wa Amihudi ne kudwa mu Manase, Gamaliyele nkololo wa Phedahizu,

¹¹mu Bhenjamini, Abidani nkololo wa Gideoni,

¹²mu Dani, Ahieza nkololo wa Amishadai,

¹³mu Asheri, Pagiele nkololo wa Okirani,

¹⁴mu Gadi, Eliyasafu nkololo wa Deuele,

¹⁵mu Nafutali, Ahira nkololo wa Enani.

¹⁶Ibaba ndibo bakashalugwa mu gubungano bali batungamili be njudzi dzabo ne misholo ye ng'umba dze Iziraela.

¹⁷Mushe na Aroni bakatola balume be mazina iyawa akalongolosiwa,

¹⁸ngono bakati mu zhuba le kutanga le mwedzi we bubili bakakubunganya gubungano lose bakazwikwalisa nge misha, nge ng'umba dza botate babo, bakabagwa nge mazina kudwa muna be makole ali makumi mabili kuyenda pezhugwi, mmwe ne mmwe wabo,

¹⁹koga sekwa kadwiwa Mushe ndi Yahwe, ndizo wakakwalisa bathu bali mu tjilambanyika tje Sinai.

²⁰Balume bose bakabe bana makole ali makumi mabili kuyenda pezhugwi, bose bakabe bakalizana kuyenda ku ngwa, bakakwagwa nge mazina abo mmwe ne mmwe nge ludzi gugwe, kutangisa nge ludzi gwa Rubheni nkololo wa Jakubo wola. Mbalo yabo yakabe ili sahwoku: [Ludzi] — [Mbalo] Rubheni — 46 500 Simiyoni — 59 300 Gadi — 45 650 Juda — 74 600 Isakari — 54 400 Zebuluni — 57 400 Ifureimi — 40 500 Manase — 32 200 Bhenjamini — 35 400 Dani — 62 700 Asheri — 41 500 Nafutali — 53 400 Bose bakabe bali — 603 550

⁴⁷Koga ludzi gwe Balevi gwakabe gusabaligwa mu bali,

⁴⁸ngobe Yahwe bakabe badwa Mushe beti,

⁴⁹“Usitongo kwalisa ludzi gwe Balevi, kene kuli kubabalilanya mu bathu be Iziraela.

⁵⁰Koga ubige Balevi kutjengeta nshasha we butendeki ne zwija zose zwago na zose zwimu guli, basenge bugalo gwe Ndzimu ne zwija zwago, kakale bagutjengete bagale bakagupoteleka.

⁵¹Ha bugalo gwe Ndzimu gufulusiwa, Balevi banowoguliga ngono ha bugalo gwakafanila teyiwa butshwa, Balevi banowoguteya. Ngono ha mmwe upoga angasedzela paguli abulawe.

⁵²Baiziraela banowobambula mishasha yabo nge makupo abo, mmwe ne mmwe ebe pa nshasha uwe, mmwe ne mmwe nge gupo lile.

⁵³Koga Balevi banowogala bakapoteleka nshasha we butendeki, kuti gubungano le bathu be Iziraela lisiwigwe nge bushongola gwangu, ngono Balevi banowotjengeta nshasha we butendeki.”

⁵⁴Ndizo bathu be Iziraela bakathama kose Yahwe sekwa bakadwa Mushe.