Read Kalanga Mbalo 11 Bible Online

Mbalo 11 - Kalanga bible

Mbalo 11

¹Bathu bakabe beng'ong'ola kuna Yahwe ngekwe kudziyila kwabo. Ngono kukati Yahwe be bahwa, bakazhala bushongola bakadelusila moto mu bali, ukapisa gwamu limwe le bukotokelo.

²Ndizo bathu bakamimila beshaka bhatsho kuna Mushe, Mushe katembezela kakumbila kuna Yahwe, moto ukadzima.

³Ndizo pathu ipapo pakadang'wa kuyi, Tabera.[1]

⁴Bataya bakabe beyenda ne Baiziraela bakabe ne njemulo hwulu dze ku ja nyama, ipapo Baiziraela na ibobo bakalila kakale beti, “Dzene tingawana nyama tikaja!”

⁵Tokumbula hwobe dzatakabe tija ku Egipiti tisingalipe, makakabudzi ne mabisi ne liki ne hanyanisi ne galiki.

⁶Ngono ngwenu tanyadziwa nge zojiwa izwezwi, akutjina tjatingaja akusi mana iyawa atinoja zhuba ne zhuba!

⁷Mana akabe enga phudzi tjena tukununu ye mbewu, ye mbala inonga we nyonje.

⁸Bathu bakabe be bhuda bepoteleka beanunga, be koakwiya mu makwiyilo kene beakhwa nge duni. Bakabe beabhika nge hali kene beathama zwiwunga. Nzipo wawo wakabe uhwika unga tjiwunga tjabhikiwa nge mafuta.

⁹Kwakabe kuti khawa iwila mu bukotokelo busiku, mana ebe ewabo.

¹⁰Mushe wakahwa bathu belila misha yose, mmwe ne mmwe ali mile pa nkoba we nshasha uwe. Yahwe bakazhala bushongola kwazo, ngono Mushe kadziyidzika.

¹¹Mushe kabhuzwa Yahwe kati, “Apa madziyidzilani nlanda wenyu kene? Ndathamani tjisamushathisa kwamadza mukabiga ntolo we bathu bose ibaba mu mathudzi angu kene?

¹²Apa ndimi ndakabumba bathu bose ibaba kene? Kene ndimi ndakabazwala? Ini mungati ndibaguge, se nkadzi akaguga ngawana, kuswikila ndibakotosa ku shango yamakatuna mugadzabgwe bobatategulu babo kene?

¹³Apa ndingayi kwandingawanila bathu bose ibaba nyama kene? Banoshwa bendililila beti, ‘Utipe nyama tije!’

¹⁴Andingabhabhe bathu bose ibaba ndilindoga, ntolo unondikulila

¹⁵Ha kuli iko sekwa munondibhata ndiko, mundibulaye sangwenu, ha mundihwila ngoni, musithame kuti ndibone tshiyilo yangu.”

¹⁶Yahwe bakadwa Mushe bakati, “Undidanile sholotjena dze Iziraela dzili makumi ali kutendeka (70) banozibgwa bali batungamili ne hadzasha mu bathu ubadwe bazhe ku nshasha we bushanganilo, kuti bamepo nawe.

¹⁷Ndowodeluka azha ndilebeleka nawe ipapo, ndibe nditola mimwe meya yandakakupa ndibapa iyo. Banowokubhatsha kusenga ntolo we bathu ibaba, kuti usitjausenge uli woga.

¹⁸“Ndizo ngwenu budza bathu, ‘Muzwitjenepadze kuzwilulwamisila mangwana, mowowana nyama mukaja. Yahwe bakamuhwa pamakabe mulila muti, “Ha tabe tingawana nyama tikaja. Kwabe kuyita ha tabe tisakadwa mu Egipiti!” Ndizo Yahwe banowomupa nyama mukaija.

¹⁹Amungaije koga kwe zhuba ling'ompela kene mabili kene mashanu kene ali gumi kene kwe mazhuba ali makumi mabili,

²⁰kowobe kwe mwedzi wose, kudzina musingatjaishake. Ngobe makalamba Yahwe, ibo banamwi, mukalila mbeli kwabo muti, “Apa ini takabhuda ku Egipiti?” ’ ”

²¹Koga Mushe kadwa Yahwe kati, “Ipapa ndipakati kwe bathu bali zwiwulu zwili mazana ali matathatu (600 000) banoyenda nge makumbo, ngono maleba mukati, ‘Ndowobapa nyama bakaija kwe mwedzi wose!’

²²Apa inowobalizana ha bangabhayigwa ngubi ye pkhwizi ne matanga e ng'ombe kene? Apa hwobe dzose dze gungwa dzingabalizana ha bangadzibhatigwa kene?”

²³Yahwe bakadabila Mushe beti, “Apa simba la Yahwe lina tjilizanyo kene? Ngwenu unowobona kuti tjandinoleba tjowobe lebeswa kene aa!”

²⁴Ipapo Mushe kabhudila ku bathu kababudza tjalebgwa ndi Yahwe. Kakubunganya batungamili babo bali makumi ali kutendeka kabamisa bakapoteleka nshasha.

²⁵Ndizo Yahwe bakadelukila pasi bali mu gole bakalebeleka na Mushe, Yahwe bakatola imwe meya yakabe ili munli, bakailonga mu batungamili ibaba bali makumi ali kutendeka (70). Kwakati meya yangina mubali, bakalebelambeli, koga bakasipaphe kakale.

²⁶Kukabe kwasala balume bali babili mu bukotokelo, mazina abo ili, Eledadi na Medadi, bakabe babaligwabo mu batungamili bali makumi ali kutendeka (70), bakabe basayenda ku nshasha. Ngono na ibobo meya ikangina mubali, bakalebelambeli bali mu bukotokelo.

²⁷Mmwe nzhuzha kabhuda kanobudza Mushe kati, “Eledadi na Medadi banolebeselambeli mu bukotokelo.”

²⁸Joshuwa nkololo wa Nuni, wakabe ali mbhatshi wa Mushe kudwa atji nzhuzha, kalebeleka eti, “Mushe tetshi wangu, mubamise!”

²⁹Mushe kanshandula eti, “Apa una fupa nge kwangu kene? Ndoyemula kuti bathu bose ba Yahwe bangabe balebesambeli, ne kuti Yahwe balonge meya yabo mubali.”

³⁰Ndizo Mushe ne batungamili bali makumi ali kutendeka (70) bakabgwilila ku bukotokelo.

³¹Ipapo kukadwa phepo kuna Yahwe ikatutudza hwalishanga idzidusa mu gungwa. Ikadzidelusila mu bukotokelo dziwuluka dzili pezhugwi kungabe luboko gung'ompela kudwa pasi, dzakaandama mbizho dzose dze bukotokelo kungabe gwendo gwe makumbo gwe zhuba.

³²Mu zhuba ilelo lose ne busiku gwalo kunoti zhuba lose tjimuka bathu bakabe beshinga bhata hwalishanga. Akuna wakabhata makabha mashomana pana ali gumi.

³³Koga bakati batjaja nyama, betjaitafuna, Yahwe bakazhala bushongola ngekwabo, bakabaloba shamu nge mbatsha hwulu.

³⁴Ndizo pathu ipapo pakatumigwa zina kuyi Kiberotihathava, kudwiwa kuti zwikumbu zwe kuyemula, ngobe pali pakabiganyigwa bathu bakayemula nyama.

³⁵Bakamilika mu Kiberotihathava bakayenda ku Hazeroti bakanogalapo.