Read Kalanga Mbalo 12 Bible Online

Mbalo 12 - Kalanga bible

Mbalo 12

¹Miriamu na Aroni bakatangisa sola Mushe ngekwe nkadzi uwe we Nkhushi, ngobe wakabe alobola Nkhushi.

²Bebhuzhwana beti, “Apa Yahwe bakalebeleka na Mushe ega? Abazolebelekabo naswi kene?” Ngono Yahwe bakahwa tjabanoleba.

³(Mushe wakabe ali nthu unozwiyisa pasi kwazo, ezwiyisa pasi kupinda nthu mmwe ne mmwe mu shango.)

⁴Tjinyolotjo Yahwe bakadwa Mushe na Aroni na Miriamu bakati, “Ndomushaka ku nshasha we bushanganilo mose butatu gwenyu.” Ipapo butatu gwabo bakabhuda bakayenda.

⁵Ndizo Yahwe bakadeluka bali mu gole, bakama pa nkoba we nshasha bakadana Aroni na Miriamu. Kukati bebhudila kuzhe bubili gwabo,

⁶Yahwe bakabadwa bakati, “Teedzani matama angu: “Ha muna nlebesambeli wa Yahwe pakati kwenyu, Ndowonzwilakidza nge mbono, Ndowolebeleka naye nge mawoloto.

⁷Koga ngekwe nlanda wangu Mushe akuzojalo; unogalikabgwe mu ng'umba yangu.

⁸Iye ndolebeleka naye tishandudzana takalingisana ku mesho kuli patjena ndisinga pese; ebona mbumbiko ya Yahwe. Apa ini tjisingamutjise sola nlanda wangu Mushe kene?”

⁹Yahwe bakazhala bushongola nge kwabo, bakathubukana nabo.

¹⁰Kukati gole limilika pezhugwi kwe nshasha, Miriamu kadzuka mbili wose, ukashanduka ukasala uli ntjena unga kapuku. Kukati Aroni elinga Miriamu kabona alizhele mapele,

¹¹kadwa Mushe kati, “Ndomukumbila tetshi wangu, musititilike nlandu ngekwe tjibi tjatathama nge bulengwe.

¹²Musinletje kanga lushabana gwazwagwa gusingatjile gwakajika lubadu gumwe gutjadwa mu ntumbu wa mme bago.”

¹³Ipapo Mushe kamimila eti kuna Yahwe, “Ndomukumbila Ndzimu wangu, mumpodze!”

¹⁴Yahwe bakashandula Mushe beti, “Ha tate babe bakabe banthwila mate mu buso, apa unobe asakadusigwa kuzhe kwe nzi mazhuba ali kutendeka kene? Umbige kuzhe kwe bukotokelo mazhuba ali kutendeka, shule kwa ikoku abe ebgwiliziwa mu bukotokelo.”

¹⁵Miriamu wakazhaliligwa kuzhe kwe bukotokelo mazhuba ali kutendeka, bathu bakasitongoyenda kudzina ebgwiliziwa mu bukotokelo.

¹⁶Shule kwa ipapo, bathu bakamilika mu Hazeroti bakanokotokela mu tjilambanyika tje Parani.