Read Kalanga Mbalo 13 Bible Online

Mbalo 13 - Kalanga bible

Mbalo 13

¹Yahwe bakadwa Mushe bakati,

²“Tola bamwe batungamili mu njudzi dzili gumi lina mbili dze Iziraela ubatume bayende banoshola shango ye Kanana, yandinopa Baiziraela.”

³Nge ndaulo ya Yahwe Mushe katuma shodzi dzidwa mu tjilambanyika tje Parani. Bose bakabe bali batungamili be Baiziraela.

⁴Awa ndiwo mazina abo; kudwa mu ludzi gwa Rubheni ndi Shamua nkololo wa Zakhuri;

⁵kudwa mu ludzi gwa Simiyoni ndi Shafati nkololo wa Hori;

⁶kudwa mu ludzi gwa Juda ndi Khalebu nkololo wa Jefune;

⁷kudwa mu ludzi gwa Isakari ndi Igali nkololo wa Josefa;

⁸kudwa mu ludzi gwa Ifureimi ndi Hosheya nkololo wa Nuni;

⁹kudwa mu ludzi gwa Bhenjamini ndi Paleti nkololo wa Rafu;

¹⁰kudwa mu ludzi gwa Zebuluni ndi Gadieli nkololo wa Sodi;

¹¹kudwa mu ludzi gwa Josefa igo gwa Manase ndi Gadi nkololo wa Susi;

¹²kudwa mu ludzi gwa Dani ndi Amiyeli nkololo wa Gemali;

¹³kudwa mu ludzi gwa Asheri ndi Sethuri nkololo wa Mikaele;

¹⁴kudwa mu ludzi gwa Nafutali ndi Nahibhi nkololo wa Vofisi;

¹⁵kudwa mu ludzi gwa Gadi ndi Geuele nkololo wa Maki.

¹⁶Awa ndiwo mazina e balume bakabe batumwa ndi Mushe kunoshola shango. Mushe katumila Hosheya nkololo wa Nuni zina linoyi Joshuwa.

¹⁷Kwakati Mushe ebatuma kunoshola shango ye Kanana kabadwa kati, “Yendani ku Negebu, mube mutathila mu shango ye matombo.

¹⁸Mubone kuti i shango yakatini, ne kuti bathu bagele muili bakasima kene abazosima, kakale mubone kuti bashomanana kene banjinji.

¹⁹Mubone kuti shango yabagele yakanaka kene yakabipa ne kuti kene mizi yabagele yakabakiligwa kene ayizobakiligwa nge luswingo.

²⁰Mubone kene i shango ina mavu akakola kene asakakola, ina miti kene isina. Mutjele mimwe mitjelo ye shango iyeyo muyisenge muzhe nayo. Ipapo kwakabe kuli tjibaka tje mitjelo itangisa kubidwa.”

²¹Ipapo bakayendila pezhugwi bakashola shango kudwa mu tjilambanyika tje Zini kunoti ku Rehobu, pejo nge nkoba we Hamati.

²²Bakayendila pezhugwi mu Negebu, bakanoswika ku Heburoni; pakabe pegala Ahimani na Sheshayi na Talemayi, zwizekugwana zwa Anakimu. (Heburoni yakabakiwa makole ali kutendeka itangila Zoani ku Egipiti.)

²³Bakaswika ku Nkuku we Eshikholi, bakathubula lutabi gwe nzhambi, bakagusenga bakagupikisana nge bhangwana bali babili, bakazha ne mitjelo ye pomegiranate ne phaya.

²⁴(Pathu ipapo pakadang'wa Nkuku we Eshikholi[2] ngobe Baiziraela bakathubula lutabi gwe nzhambi po.)

²⁵Bakashanduka shule kwe mazhuba ali makumi manna (40) bedwa kunoshola shango.

²⁶Bakaswika kuna Mushe na Aroni ne gubungano lose le Baiziraela mu tjilambanyika tje Parani, ku Kadeshi, bakababikila sekwa bakayenda, bebuya bebalakidza mitjelo ye shango yabazha nayo.

²⁷Bakadwa Mushe bakati, “Takaswika ku shango yamakatituma ko, malebeswa inowunga nkaka ne butji gwe nyutji! Eyi ndiyo mitjelo yayo.

²⁸Nenguba kwakajalo bathu bagele mu shango iyeyije bakasima, ne mizi yabo yakabakiligwa nge luswingo kakale mikulu kwazo, kakale takabona zwizekugwana zwa Anakimu ikweno.

²⁹Baamaleki banogala mu shango ye Negebu; Bahiti ne Bajebusi ne Baamori banogala mu shango ye matombo; Bakanana banogala pejo ne gungwa, mu supho we gwizi gwe Jorodani.”

³⁰Khalebu kanyaladza bathu mbeli kwa Mushe, kabadwa kati, “Ngatiyendeniko tjinyolotjo tinoitapa, takazwilizanila, towobakulila.”

³¹Koga balume bakabe bayenda na Khalebu bakan'dabila beti, “Atingatubule kunogwa ne bathu ibabaje, ngobe bakasima kutipinda.”

³²Ndizo bakabikila Baizaraela mbiko isi iyo ngekwe shango yabakabe banoshola beti, “Shango yatakapalama tiishola, i shango inoja bagali bayo, ne bathu batakabona muili balume bakakulila pezhugwi.

³³Kakale takabona makwelemba ikweno, zwizekugwana zwa Anakimu, tikazwibona tili batukununu se zwipombobushwa, ndiko sekwa takafanila kuzwilinga mubali.”