Read Kalanga Mbalo 14 Bible Online

Mbalo 14 - Kalanga bible

Mbalo 14

¹Ipapo gubungano lose lakadila guwo, bakalala belila busiku gose.

²Bakabe beng'ong'ola ngekwa Mushe na Aroni beti, “Kobe kuyita atakabe takafila mu shango ye Egipiti, pana kuti tiwofila mu tjilambanyika itjetji!

³Apa ini Yahwe bangatizhisa mu shango iyeyi, kuwobulawa nge thumo kene? Bakadzi bedu ne bana bedu bawotapiwa, apa akungayite atingabgwilila ku Egipiti kene?”

⁴Ngono bakalebesana bakati, “Atizwishalulileni ntungamili tibgwilileni ku Egipiti!”

⁵Ndizo Mushe na Aroni bakathigama bakakotamisa misholo mbeli kwe gubungano lose le Baiziraela.

⁶Ngono Joshuwa nkololo wa Nuni na Khalebu nkololo wa Jefune, bamwe be bakabe banoshola shango, bakapalula zwiambalo zwabo.

⁷Bakadwa gubungano lose le Baiziraela bakati, “Shango yatakapalama kunoishola i shango yakanaka kwazo kwazo.

⁸Ha Yahwe bangatishathila, banowotikotosa muili bakatipa iyo, shango inowunga nkaka ne butji gwe nyutji.

⁹Koga musitongopandukila Yahwe, kakale musitongotja bathu be shango iyeyije, bamu maboko edu, kubakiligwa kwabo kwakadusiwa mubali, kakale musitongobatja, Yahwe banaswi.”

¹⁰Ipapo gubungano lose likalebesana kuti libakikitidze nge mabgwe bafe. Ngono tjinyolotjo tjedza tja Yahwe tjikazwilakidza pezhugwi kwe nshasha we bushanganilo mu bathu bose be Iziraela.

¹¹Yahwe bakadwa Mushe bakati, “Apa kowodza kukabe lini bathu ibaba bendilengudza kene? Kowodza kukabe lini basingagale moyo mundili, pezhugwi kwe zwilakidzo zose zwingapa zwandakabathamila kene?

¹²Ndowobabulaya nge bugwele, ndibe ndibadusa mu thaka, ngono ndowothama ludzi lukulu ndiwe kakale gwakasima kubapinda.”

¹³Mushe kadwa Yahwe kati, “Makadusa bathu ibaba mu Egipiti nge simba lenyu; ngono ha Baegipiti bangahwa tjamathama bathu benyu,

¹⁴banowobudza bagali be shango iyeyi. Bathu ibaba bakahwa kale kuti munaswi, imwi Yahwe ne kuti mobong'wa muli patjena ha gole lenyu lima lakaangama pezhugwi kwedu ne kuti moyenda makatitungamila nge gole kuli masikati nenge moto kuli busiku.

¹⁵Ngono ngwenu, ha mungalobesa bathu bose ibaba, shule kwa ikoku zwitjaba zwakahwa ngekwe tjibombo tjenyu zowoti,

¹⁶‘Ngoti Yahwe bakong'wa kunokotosa bathu ibaba mu shango yabakatuna beti banowobapa iyo, ndizo babalobesa mu tjilambanyika.’

¹⁷Ngono ngwenu, ndomutembezela Tetshi wangu, thamani kuti simba la Yahwe libe gulu sekwa makagadzabgwe, muti,

¹⁸‘Yahwe banononoka kuzhala bushongola, kakale bazhele ludo gusingazunguzike, banozwiibhatigwa jinyo ne bupanduki, koga abatowosunungula una nlandu ndodwa, banolobela bana matjinyo abo tate babo kunoti ku tjizekugwana tje butatu ne tje bunna.’

¹⁹Ndomutembezela Yahwe, muzwiibhatigwe jinyo le bathu ibaba kuyendidzana nge ludo gwenyu gusingazunguzike, ne kuyendidzana na sekwa makabazwiibhatigwa kudwa ku shango ye Egipiti kudzina kowobe nasi.”

²⁰Ipapo Yahwe bakadabila beti, “Sekwa wakumbila, ndabazwiibhatigwa,

²¹koga tjoselele se nditjila, ne shango yose sekwa yawozhala gudzo langu,

²²Bathu bose bakabona gudzo langu ne zwilakidzo zwangu zwandakathama mu Egipiti ne mu tjilambanyika, ngono bakandilika ka gumi bakasihwilile dama langu,

²³Akuna wabo unowobona shango yandakagadzabgwe bobatategulu babo, kakale akuna wa ibabo bakandilengudza unowoibona.

²⁴Koga nlanda wangu Khalebu, ngoti akabe nge meya isingafanane neye bamwe kakale kandihwilila, ndononkotosa ku shango yaakanoshola, ne zwizekugwana zwizwe zowothuwa shango iyeyo.

²⁵Sakuno, se Baamaleki ne Bakanana begala mu mikuku, mangwana mushanduke mu ngine mu tjilambanyika nge zila inoyenda ku Gungwa Shaba.”

²⁶Yahwe bakadwa Mushe na Aroni bakati,

²⁷“Apa kowodza kukabe lini gubungano ileli lakakombama ling'ong'ola nge kwangu kene? Ndakahwa ndebeleko dze Baiziraela, dze kung'ong'ola kwabo.

²⁸Ngwenu ubadwe uti, ‘Tjoselele se nditjila, ndowomuthamila sekwa makaleba mulonga mu zebe dzangu, koleba Yahwe.

²⁹Zwitumbu zwenyu zowoandama mu tjilambanyika itjetji, kudwa muna be makole ali makumi mabili bakazwagwa kuyenda pezhugwi akuna unowongina mu shango iyeyije.

³⁰Akuna ne nng'ompela wenyu unowoswika mu shango yandakatuna nditi ndowomugadza muili kuzhe kwa Khalebu nkololo wa Jefune na Joshuwa nkololo wa Nuni

³¹Koga bana benyu bamakati banowotapiwa, ndowobakotosa, banowoziba shango yamakalamba.

³²Koga imwi mowofa zwitumbu zwenyu zwika kandalala mu tjilambanyika itjetji.

³³Bana benyu banowodzungayila mu tjilambanyika bali balisi kwe makole ali makumi manna (40), bedziyilila matjinyo enyu, kudzina nfi we bupelo itumbu tjitje tjiwila mu tjilambanyika.

³⁴Kuyendidzana nge mazhuba amakapalama shango muishola ali makumi manna (40) zhuba ling'ompela limwe ne limwe limilile gole, ngono mowosenga matjinyo enyu makole ali makumi manna (40). Ndiko kwamunowoziba kuti ku gwadza moyo kwangu kodwani!

³⁵Imi Yahwe, ndiko ndaleba, oku ndiko kwandinowothama mu gubungano lose ileli libiibi lakakubunganila kundipandukila. Banowoswika pa bhelelo labo mu tjilambanyika itjetji, banowofila ipapo.’ ”

³⁶Ipapo balume bakabe batumwa ndi Mushe kunoshola shango, bebe bezha bethama gubungano kuti li dudumwe ngekwa Yahwe ngopa mbiko ye manyepkhwa,

³⁷bakalobesiwa mbeli kwa Yahwe.

³⁸Joshuwa nkololo wa Nuni na Khalebu nkololo wa Jefune ndibo boga bakasala pafa, mu balume bakabe banoshola shango.

³⁹Kukati Mushe ebikila bathu be Iziraela bose matama iyawa, bakalila tjililo tjikulu.

⁴⁰Bakabinduka, bakatathila ku shango ye matombo, bakabe beti, “Tipano, ngatiyendeni kwatakagadziwabgwe ndi Yahwe, ngobe takatjinya.”

⁴¹Koga Mushe kabadwa kati, “Apa ini mutjuluka ndaulo ya Yahwe ngono kusina tjinowopunduka.”

⁴²Musiyende, zwita zwenyu zonomukulila, Yahwe abate bali mile namwi.

⁴³Mowonofila mu maboko e Baamaliki ne Bakanana, mowolobesiwa nge thumo, ngobe moshandukila Yahwe, Yahwe abangame namwi.

⁴⁴Koga nge misholo yakawoma bakatathila ku shango ye matombo, nenguba kwakajalo Bhokisi le Tjidumano tja Yahwe basinalo, kene iye Mushe kasibhude mu bukotokelo.

⁴⁵Ipapo Baamaliki ne Bakanana bakabe begala mu shango iyeyo ye matombo bakadeluka bakagwa nabo, bakabakulila bakatatana nabo bakanobasiya ku Horima.