Read Kalanga Mbalo 15 Bible Online

Mbalo 15 - Kalanga bible

Mbalo 15

¹Yahwe bakadwa Mushe bakati,

²“Idwa bathu be Iziraela uti, ‘Kuti maswika mu shango yandinomupa,

³muduse tjipo tje ng'ombe kene pkhwizi kene mbudzi mutjipe Yahwe. Tjili tjibhayilo tjinopisiwa, kene tjili tjinozhadzisa kutuna kwenyu kene tjili tjemoyo ntjena, kene mu nzano kuthamila Yahwe tjibhayilo tjinopisiwa nge moto kube nnuhwo unonuhwa zwinozipa ku bali.

⁴Ngono unodusa tjipo tjitje, adusile Yahwe tjipo tje mathunde mu ithuwo tjimwe ne tjimwe tjaanodusa adusilanye ne seme ing'ompela ye bgwisa gwakanathiwa gwakashanganyiwa ne mafuta, ali zhele lithara ing'ompela tjili tjipo tje mathunde.

⁵Tjibhayilo tje pkhwizi tjimwe ne tjimwe tjinopisiwa tjiyisiwe ne lithara ing'ompela ye nkumbi we zhambi.

⁶Tjibhayilo tje nyundo, tjidusigwanyiwe ne seme ing'ompela ye bgwisa gwakanathiwa ne lithara ina gaswa ye mafuta e ntjelo we ntoba kube tjipo tje mathunde.

⁷Ngono tjipo tje tjing'o tjibe gaswa le lithara. Nnuhwo we zwibhayilo izwezwi unowobe nnuhwo unonuhwa zwinozipa kuna Yahwe.

⁸Ngono ha ululwamisa nkono kube tjibhayilo tjinopisiwa, kene tjibhayilo tjinozhadzisa kutuna, kene tjipo tje mbakisano kuna Yahwe,

⁹uwupeleke ne tjipo tje mathunde tje tjilizanyo tje seme dzili thatu dze bgwisa gwakanathiwa gwakashanganyiwa ne lithara mbili dze mafuta,

¹⁰ne tjipo tje tjing'o kuli lithara mbili dze nkumbi we zhambi, tjili tjipo tjinopisiwa mu moto kube nnuhwo unozipa kuna Yahwe.’ ”

¹¹“ ‘Kuthamigwe nkong'wana mmwe ne mmwe, kene nyundo imwe ne imwe, kene pkhwizana ndume imwe ne imwe, kene mbudzana ndume imwe ne imwe, kuiyago.

¹²Kuyendidzana nge mbalo iyeyo yamunolulwamisa, mowothamila tjimwe ne tjimwe ithuwo kuyenda nge mbalo yazo.

¹³Batebe bose be Baiziraela banowothama zwithu izwezwi nge zila yakajalo mukudusa tjipo, tjili tjipo tjinopisiwa mu moto kube nnuhwo unozipa kuna Yahwe.

¹⁴Ngono ha ntaya unobe awolubila kene ugelile tjatjose namwi kuyenda nge zwizekugwana zwenyu zose, ebe eyemula kudusa tjipo tjinopisiwa mu moto kube nnuhwo unozipa kuna Yahwe, athamebo sekwa munothama.

¹⁵Mu gubungano, ndaulo ibe ing'ompela mu muli ne mu ntaya unobe egala namwi, ibe ndaulo nge kusingapele kuyenda nge zwizekugwana zwenyu, sekwa kuli iko mu muli, ne mu ntaya kuijalobo mbeli kwa Yahwe.

¹⁶Kube nlayo nng'ompela ne ndaulo ing'ompela mu muli ne mu ntaya unobe elubila mu muli.’ ”

¹⁷Yahwe bakadwa Mushe bakati,

¹⁸“Lebeleka ne bathu be Iziraela ubadwe uti, ‘Ha maswika mu shango yandinomupa,

¹⁹ngono ha muja zojiwa zwe shango iyeyo, makafanila dusila Yahwe tjipo.

²⁰Mu tjiwunga tje bgwisa gwe kutanga madwa pa shokola muduse tjibhayilo tje tjiwunga, mutjiduse tjili tjipo tjinodwa mu lutombo.

²¹Mu tjiwunga tje kutanga tjabhikwa madwa pashokola, mupe Yahwe tjipo mutjili, kuyenda nge zwizekugwana zwenyu zose.’ ”

²²“ ‘Koga ha mungazwiwana mapambuka mukulondolodza mimwe milayo Yahwe yabakadwa Mushe,

²³milayo yose yaka lauligwa Mushe ndi Yahwe, kudwa mu zhuba Yahwe labakampa ndaulo kudwa shule kuzwizekugwana zwenyu,

²⁴ipapo ha gubungano lakaleyanya ngosaziba, gubungano lose liduse nkong'wana we tjibhayilo tjinopisiwa, kuthama tjibhayilo tjithamwa nge moto kube nnuhwo unonuhwa zwinozipa kushathisa Yahwe, ne tjipo tje mathunde ne tje tjing'o, kuyenda nge nlayo, ne mbudzi ing'ompela ye phoko ye tjibhayilo tje tjibi.

²⁵Ngono mpirisiti unowothamila gubungano lose le bathu be Iziraela gadzano na Yahwe, ngono Yahwe banowobazwiibhatigwa. Se bakabe baleyanya ngosaziba, bebe bedusa tjibhayilo tjinopisiwa nge moto kupiwa Yahwe, ne tjibhayilo tje tjibi mbeli kwa Yahwe, bethamila leyanywa kwabo.

²⁶Gubungano lose le Baiziraela lowozwiibhatigwa, ne bataya babanogala nabo, ngobe itjaba tjose tjakabe tjaleyanya ngosaziba.

²⁷“ ‘Ha nthu nng'ompela atjinya ngosaziba, aduse mbudzi hadzi ing'ompela ina gole ling'ompela ye tjibhayilo tje tjibi.

²⁸Mpirisiti unowothamila nthu iwoyo wathama nlandu ngosaziba gadzano mbeli kwa Yahwe, ngono Yahwe banowonzwiibhatigwa.

²⁹Nlayo wenyu ube nng'ompela mu ntebe upakati kwe bathu be Iziraela kene banolubila mu muli, banowobe bathama nlandu ngosaziba.

³⁰“ ‘Koga nthu unothama tjibi mwaza, ungabe ntebe kene nlubili, etuka Yahwe, nthu uwoyu abulawe mu gubungano le Iziraela.

³¹Ngobe alengudza dama la Yahwe, kavuna nlayo wabo, uwoyu nthu abulawe tjoselele, jinyo lile lowobe mu mathudzi awe.’ ”

³²Kwakati Baiziraela batji mu tjilambanyika, bakawana nthu eshaka hwuni nge zhuba le Sabata.

³³Ngono ibaba bakan'wana eshaka hwuni bakantola bakan'yisa kuna Mushe na Aroni, ne ku gubungano lose.

³⁴Kazhaliligwa akalisiwa, ngobe kwakabe kusathu kukazibgwa kuti ungaying'wi.

³⁵Yahwe bakadwa Mushe bakati, “Nthu uwoyo ngaabulawe, gubungano lose linkikithidze nge mabgwe kuzhe kwe bukotokelo.

³⁶Ipapo gubungano likantolela kuzhe kwe bukotokelo, likankikithidza nge mabgwe kafa Yahwe sekwa bapa Mushe ndaulo.”

³⁷Yahwe bakadwa Mushe bakati,

³⁸“Idwa Baiziraela uti, ‘Muzwithumile mahadzwana mu mipeto ye hazu dzenyu, mube mulunjila nsungwana we mbala we makole mu hadzwana limwe ne limwe. Mukuthame kuyenda nge zwizekugwana zwenyu nge kusingapele.

³⁹Ngono mowotimulinga ku mahadzwana mowokumbula milayo ya Yahwe yose, kuihwilila, musingatobele njemulo dzenyu ne sekwa munobona zwithu ndiko, zwamunotobelela muthama sekwa munoshaka.

⁴⁰Mahadzwana anowomukumbuludza mukahwilila milayo yangu yose, mukabe bakayengemala ku Ndzimu wenyu.

⁴¹Ndimi Yahwe Ndzimu wenyu, wakamudusa ku shango ye Egipiti, kube Ndzimu wenyu, ndimi Yahwe Ndzimu wenyu.’ ”