Read Kalanga Mbalo 17 Bible Online

Mbalo 17 - Kalanga bible

Mbalo 17

¹Yahwe bakadwa Mushe bakati,

²“Idwa bathu be Iziraela bakupe wombo dzili gumi lina mbili. Utole lukombo gung'ompela mubali, gudwa mu ntungamili we ludzi gumwe ne gumwe, dzibe gumi lina mbili. Ukwale zina le nlume mmwe ne mmwe mu lukombo gugwe.

³Ngono mu ludzi gwa Levi ukwale zina la Aroni. Ngoti kowobe lukombo gung'ompela gwe ntungamili kudwa mu ludzi gumwe ne gumwe.

⁴Utole wombo idzedzi unodzibiga mu nshasha we bushanganilo mbeli kwe Bhokisi le Tjidumano tje Ndzimu, pandinoshanganila nawe.

⁵Ngono lukombo gwe nlume wandashalula gowothinila. Ndiyo zila yandinowothama kuti bathu ibaba Baiziraela bamise kung'ong'ola, kwabanong'ong'ola nge kwenyu.”

⁶Mushe kadwa bathu be Iziraela kuti bampe wombo, ngono batungamili babo bose bakampa wombo, gung'ompela gwe ntungamili nng'ompela. Wombo dzili gumi lina mbili kuyendidza nge ng'umba dzabo tate babo. Ngono lukombo gwa Aroni gwakabe guli pakati kwe wombo dzabo.

⁷Mushe kabiga wombo mbeli kwa Yahwe, mu nshasha we bushanganilo.

⁸Kukati tjimuka Mushe engina mu nshasha we bushanganilo, ngono bonani, kawana lukombo gwa Aroni gumilile ng'umba ya Levi gwakathinila, kakale guna maluba ne mitjelo yakabidwa ye nti unoyi alimondi.

⁹Mushe katola wombo mbeli kwa Yahwe kabhudila nadzo dzose kuzhe ku bathu be Iziraela bose, ngono bakadzilinga, mmwe ne mmwe katola lukombo gugwe.

¹⁰Yahwe bakadwa Mushe bakati, “Bgwiliza lukombo gwa Aroni mbeli kwe Bhokisi le Tjidumano kuti gugale guli tjilakidzo mu bapanduki, kuti uthame kuti bamise kung'ong'ola nge kwangu, kusajalo, banowofa.”

¹¹Mushe kathama sekwa adwiwa ndi Yahwe.

¹²Baiziraela bakadwa Mushe bakati, “Bonani, tafa tapela, tapela tose.

¹³Mmwe ne mmwe unowosedzela, pa bugalo gwa Yahwe unowofa. Apa towoloba tose kene?”