Read Kalanga Mbalo 21 Bible Online

Mbalo 21 - Kalanga bible

Mbalo 21

¹Kukati mambo we Aradi we N'kanana wakabe egala ku burwa ehwa kuti Baiziraela banozha nge zila ye Atharimu, kagwa ne Iziraela katapa bamwe babo.

²Ngono Baiziraela bakatuna kuna Yahwe beti, “Tjoselele ha mungalonga bathu ibaba mu maboko edu, towokolomodza mizi yabo mikulu.”

³Ngono Yahwe bakateedza Baiziraela, bakalonga Bakanana mu maboko abo, Baiziraela bakakolomodza mizi mikulu ye Bakanana, pathu ipapo pakadang'wa kuyi Horima.[4]

⁴Bakati bebhuda mu Dombo le Hori bakayenda nge zila ye Gungwa Shaba kuti bapoteleke Edomu. Koga bathu bakanyala moyo batji mu zila.

⁵ Ngono Bathu bakang'ong'ola ngekwe Ndzimu na Mushe beti, “Apa ini makatidusa ku shango ye Egipiti towofila mu tjilambanyika itjetji, pasina zojiwa kene vula? Tatjinyala nge zojiwa izwezwi zwisi zwe tjimwe!”

⁶Ipapo Yahwe bakatumila nyoka dzina bushungu gunobulaya ku bathu, dzikaluma bathu, ndizo Baiziraela banjinji bakafa.

⁷Bathu bakazha kuna Mushe bakandwa bakati, “Takatjinya, ngobe takang'ong'ola kuna Yahwe nawe, tembezela kuna Yahwe baduse nyoka pakati kwedu.” Ndizo Mushe katembezelela bathu.

⁸Ngono Yahwe bakadwa Mushe bakati, “Thama nyoka ye phangula, ube uitilika mu bhango, ngono mmwe ne mmwe unowobe alumwa, ailinge unowopola.”

⁹Mushe kathama nyoka nge phangula kaitilika mu bhango, ngono ha nyoka yaluma nthu, unowobe elinga ku nyoka ye phangula ebe epola.

¹⁰Bathu be Iziraela bakamilika bakanokotokela ku Oboti.

¹¹Bakamilika bedwa mu Oboti, bakanokotokela ku Iyeabarimu, mu tjilambanyika ku bhezhuba kwe ntuthu we Moabu.

¹²Kudwa ipapo bakamilika, bakanokotokela mu nkuku we Zeredi.

¹³Kudwa ipapo baka milika, bakanokotokela seli kwe gwizi gwe Arinoni. Mu tjilambanyika tjinoabilila ku n'gathu we ntuthu we Baamori, ngoti Arinoni n'gathu we Moabu, upakati kwe Moabu ne Arinoni.

¹⁴Ndizo kwakalebgwa nge kwako mu Lukwalo gwa Yahwe gwe Ngwa kuyi, “Wahebe mu Sufa, ne mikuku ye Arinoni,

¹⁵ne nkungulukila we mikuku unoabilila ku bugalo gwe Ari, yakasupha ne n'gathu we Moabu.”

¹⁶Kudwa ipapo bakadwilila bakanoti ku Bheeri, ku tshime lakadwiwa Mushe ndi Yahwe beti, “Kubunganya bathu bose, ndowobapa vula.”

¹⁷Ndizo Iziraela kamba lumbo igogu eti, “Tshime dwilila vula iyo, Ngono towoidumilisa nge lumbo:

¹⁸Tshime lakatshiwa nge makulukota, Lakatshiwa nge batungamili be bathu, Litshiwa nge ludozo gwe bushe Belitsha nge wombo dzabo.” Bakamilika mu tjilambanyika bakanoti ku Matana.

¹⁹Ngono kudwa ipapo bakayenda ku Nahaliele, kudwa ku Nahaliele bakayenda ku Bhamoti.

²⁰Kudwa mu Bhamoti bakayenda kunoti ku nkuku umu ntuthu we Moabu, unotathila pezhugwi kwe Dombo le Pisiga lakakotamila ku tjilambanyika.

²¹Ipapo Baiziraela bakatuma batumwa kuna Mambo Sihoni we Baamori kunon'dwa beti,

²²“Tokumbila palama shango yenyu. Ngono atitowobhuda mu zila, kene kuli kupalama minda ye mizhambi, nenguba kuli kung'wa vula mu matshime enyu. Towotobela zila inopalama shango ya mambo. Atitowobhudila ku luji, kene ku lumeshwe, kudzina tinobhuda mu ntuthu wenyu.”

²³Koga Sihoni kasitongo dumila Iziraela kupalama shango iye. Kakubunganya babhayani babe bose, kabhudila ku tjilambanyika, kanoswika ku Jahazi, kabhayana ne Iziraela.

²⁴Koga Iziraela ikababulaya nge thumo, ikatola shango yabo kudwa mu Arinoni kunoti ku Jabhoki, bukule gunonoti ku Baamoni ngoti Jazeri wakabe uli n'gathu we Baamoni wakabe wakasima.

²⁵Iziraela ikatapa mizi mikulu yose, ikagala mu mizi mikulu yose ye Baamori, kose ne mu Heshibhoni ne mizana yose yakaipoteleka.

²⁶Heshibhoni wakabe uli iwo nzi nkulu wa Mambo Sihoni we Baamori. Ndiye wakagwa na mambo we kutanga we Moabu kantapila shango iye yose kunoti ku gwizi gwe Arinoni.

²⁷Ndizo ntetembeli eko tetembela eti, “Izhani ku Heshibhoni, nzi nkulu ngaubakiwe, Nzi wa Sihoni ngaupundumale.

²⁸Ngoti moto wakapisa udwa mu Heshibhoni, nthuto wakamilika udwa mu nzi nkulu wa Sihoni. Wakalobesa Ari we Moabu, ne matombo e Arinoni, botetshi be misholo ye matombo e Arinoni.

²⁹Yee mme wee! Wapalala iwe Moabu! Mafa, imwi bathu be Khemoshi! Wakathama bakololo babe batizhi, ne bakololokadzi babe batapiwa ba Sihoni, mambo we Baamori.

³⁰Bakafa ne bana babo kudwa ku Heshibhoni[5] kunoti ku Diboni, moto wakapisa ukadza ukanoti Medeba.”

³¹Ipapo Iziraela kabaka mu shango ye Baamori.

³²Mushe katuma shodzi kunoshola shango ye Jazeri. Ngono bakatapa mizi yayo, bakatata Baamori bakabe bali ko.

³³Ipapo Baiziraela bakashanduka nge zila inoyenda ku Bhashani. Ngono Mambo Ogi we Bhashani ne bathu babe bose bakabhuda bakanogwa nabo ku Edireyi.

³⁴Koga Yahwe bakadwa Mushe bakati, “Usintje, ngoti ndowonlonga mu maboko awo, kose ne bathu babe bose ne shango iye. Unowonthama tjawakathama Sihoni mambo we Baamori wakabe ebusa ku Heshibhoni.”

³⁵Baiziraela bakabulaya Ogi ne bakololo babe, kose ne bathu babe bose, kudzina kunosala kusina nenge limbelimbe ling'ompela lasala. Ngono bakatapa shango iye.