Read Kalanga Mbalo 23 Bible Online

Mbalo 23 - Kalanga bible

Mbalo 23

¹Ngono Bhalamu kadwa Bhalaki kati, “Undibakile zwibeso zwili kutendeka ipapa, ube undilulwamisila mikong'wana ili kutendeka ne nyundo dzili kutendeka.”

²Bhalaki kathama tjaadwiwa ndi Bhalamu, ngono iye na Bhalamu bakayisa tjibhayilo tje nkong'wana ne tje nyundo mu tjibeso tjinopisigwa zwibhayilo tjimwe ne tjimwe.

³Bhalamu kadwa Bhalaki kati, “Ima pa tjibhayilo tjitjo tjinopisiwa, imi ndi yendile mbelinyana, pamwe Yahwe banowozha kundili, ngono tjabanobe bandilakidza itjo ndowokubudza.” Bhalamu kabe etathila pezhugwi kwe dombo.

⁴Ndzimu ukashangana naye, Bhalamu kadwa Ndzimu kati, “Ndabaka zwibeso zwili kutendeka, ngono mu tjibeso tjinopisigwa zwibhayilo tjimwe ne tjimwe ndayisa nkong'wana ne nyundo.”

⁵Yahwe bakalonga matama abo mu nlomo wa Bhalamu, bakan'dwa beti, “Bgwilila kuna Bhalaki, ngono umbudze matama iyawa.”

⁶Ngono kabgwilila kuna Bhalaki, kanon'wana ali mile ana makulukota wose e Moabu pa tjibhayilo tjitje tjinopisiwa.

⁷Bhalamu katangisa ndebeleko iye kati: “Bhalaki mambo we Moabu wakanonditola ku Aramu, ku bhezhuba kwe matombo, Wakati, ‘buya, undilongele bhiso muna Jakubo, buya undilongele Iziraela bhiso.’

⁸Apa ndingalonga bhiso tjini muna usakalongwa bhiso nge Ndzimu,? Ndingabona nlandu tjini mu nthu usakabongwa nlandu ndi Yahwe?

⁹Ngoti ndombona ndili pezhugwi kwe matombo, ndombona ali mu matombo. Bona, itjaba tjinogala tjili tjoga. Kakale atjitozwibalila mu zwimwe zwitjaba.

¹⁰Ndiani ungabala zwizekugwana zwa Jakubo zwinji se hwuluba, Banjinji kwazo mu kubagwa. Letja ndife lufu gwe nlulwami; Ne bhelelo langu linge lile.”

¹¹Ngono Bhalaki kadwa Bhalamu kati, “Apa wandithamilani kene? Ndakanokutolela kuwolonga bhiso mu zwita zwangu, ngono bona, akuna tjawathama, akusi kubakombolela.”

¹²Ngono kan'dabila eti, “Apa andizofanila kuleba tjandadwiwa ndi Yahwe kene?”

¹³Bhalaki kadwa Bhalamu kati, “Ngatiyende tose, paungati ulipo ukabona bamwe be Baizaraela. Unowobona bamwe babo banowobe bali pejo, aungababone bose. Ube undilongela bhiso mubali uli paunowobe ulipo.”

¹⁴Kayenda naye ku shango ye Zofimu pezhugwi kwe Dombo le Pisiga, bakaswika bakabaka zwibeso zwili kutendeka, bakapisila tjibhayilo tje nkong'wana ne tje nyundo mu tjibeso tjinopisigwa zwibhayilo tjimwe ne tjimwe.

¹⁵Bhalamu kadwa Bhalaki kati, “Ima ipapa kubapa ne tjibhayilo tjitjo tjinopisiwa, nditjanoshangana na Yahwe tjandiyeno.”

¹⁶Yahwe bakashangana na Bhalamu, bakalonga matama abo mu nlomo uwe, bakan'dwa beti, “Bgwilila kuna Bhalaki, ngono umbudze matama iyawa.”

¹⁷Ngono kaswika kunli, kawana alimile kubapa ne tjibhayilo tjitje tjinopisiwa ana makulukota e Moabu. Bhalaki kambhuzwa kati, “Yahwe balebani?”

¹⁸Bhalamu katangisa ndebeleko iye kati: “Milika, Bhalaki uhwe; Unditeedze, iwe nkololo wa Zipori

¹⁹Ndzimu autonga nthu, kwaunganyepa; Autonga nthu, kwaungashandula nkumbulo. Apa ungati tjawaleba, ukasi tjithame kene? Kene tjawagadzabgwe, aungatjishingikadze kene?

²⁰Bona, ndakapiwa ndaulo kuti ndikombolele, Ha Ndzimu wakombolela, andingabgwilize shule.

²¹Auzowana mbipo muna Jakubo kene kuli kubona mang'oni mu Iziraela. Yahwe Ndzimu wabo unabo, kulumbidziwa kwa mambo kupakati kwabo

²²Ndzimu wakabadusa mu Egipiti, wakabagwila se nyati.

²³Akuna pheku muna Jakubo, akuna hakata dzingashingisiwa mu Iziraela. Ngwenu kowolebgwa ngekwa Jakubo na Iziraela kuyi, ‘Bona tjathamwa nge Ndzimu!’

²⁴Bona bathu ibaba, banomadzuka se shumbakadzi. Kakale tjomuka se shumbalume, Aitoizela isazandabula phuka ikaja, Kudzina ing'wa malopa e zwayabulaya.”

²⁵Ndizo Bhalaki kadwa Bhalamu kati, “Se walamba tjose kulonga bhiso mu Iziraela, usitongo ikombolela tjose.”

²⁶Koga Bhalamu kadabila Bhalaki eti, “Apa andizokubudza kose Yahwe kwabakati ndithame kene?”

²⁷Bhalaki kadwa Bhalamu kati, “Ngatiyende, ngwenu ndowokuyisa ntome. Pamwe kowoshathisa Ndzimu kuti undilongele bhiso kudwa ikweno.”

²⁸Ipapo Bhalaki kayisa Bhalamu pezhugwi kwe Dombo le Peori kwaungalingila tjilambanyika pasi.

²⁹Bhalamu kadwa Bhalaki kati, “Undibakile zwibeso zwili kutendeka ipapa, ube undizhisila mikong'wana ili kutendeka ne nyundo dzili kutendeka.”

³⁰Ngono Bhalaki kathama sekwa adwiwa ndi Bhalamu, kayisa tjibhayilo tje nkong'wana ne tje nyundo mu tjibeso tjinopisigwa zwibhayilo tjimwe ne tjimwe.