Read Kalanga Mbalo 24 Bible Online

Mbalo 24 - Kalanga bible

Mbalo 24

¹Kukati Bhalamu ebona kuti koshathisa Yahwe kukombolela Iziraela, kasitongonoshaka pheku sekwa akathama mu tjibaka tjakapinda. Kashanduka kalinga ku tjilambanyika.

²Ngono Bhalamu kamilidza mesho kabona pakakotokela Baiziraela ludzi nge ludzi. Meya ye Ndzimu ikadelukila munli,

³katangisa ndebeleko iye kati: “Ndebeleko ya Bhalamu nkololo wa Bheori ndebeleko ye nlume wakabe ebona zubuyanana[6],

⁴Ndebeleko ya iye unohwa dama le Ndzimu. Iye unobona mbono inodwa kuna Masimbawose. Iye unothigama ekotamisa nsholo, mesho awe akalinga.

⁵Mishasha iyo yakanaka seni, iwe Jakubo idzo thumba dzidzo iwe Iziraela.

⁶Inonga mikuku yakapashila kule kule, inonga minda imu phili ye gwizi, inonga makonde akadzwagwa ndi Yahwe, inonga mikosho ipa hwunde ne vula.

⁷Vula inowowunga idwa mu makabha awe, mbewu iye inowobe mu vula njinji, mambo uwe unowobe nkulu kupinda Agagi, bushe gugwe gowomilidzigwa pezhugwi.

⁸Ndzimu wakan'dusa mu Egipiti, Unobagwila se nyati. Unowolobesa zwitjaba zwinonyanyayidzana naye, Unowopkhwanya mafupa azo akabe zwitibhu tibhu, Unobabhaya nge misebe iye.

⁹Unobuba kalala pasi se shumba, kakale unonga shumbakadzi, ndiani unowommusa? Kwakakombolegwa mmwe ne mmwe unokukombolela, una bhiso mmwe ne mmwe unokulonga bhiso.”

¹⁰Bhalaki kazhala bushongola ngekwa Bhalamu, kalobanya maboko awe, kadwa Bhalamu kati, “Ndakakudanila kuwolonga bhiso mu zwita zwangu, ngono bona, wakabakombolela uyijali katatu.

¹¹Ndizo ngwenu milika uyendezo kanyi kuko. Ndakabe ndazwidwa nditi ndowokuwatsha, ngono Yahwe bakakuma mbeli kuti ndikuwatshe.”

¹²Ngono Bhalamu kadwa Bhalaki kati, “Apa andizobudza batumwa babo bawakatuma kundili kuti,

¹³‘Nenguba Bhalaki angandipa ng'umba iye ili zhele siliva ne golide, andingatubule kutjuluka ndaulo ya Yahwe. Kuthama bubuya kene mbipo nge kuda kwangu, Yahwe tjabati ndilebe, nditjo tjandinowoleba kene?’

¹⁴“Ngono ngwenu, bona, ndoyenda ku bathu bakanyi kwangu. Ndizoke, ndowokubudza tjinowothamwa nge bathu ibaba mu mazhuba anozha muna bakanyi kwenyu.”

¹⁵Katangisa ndebeleko iye kati: “Ahwa matama a Bhalamu nkololo wa Bheori, matama e nlume wabona mbono.

¹⁶Matama e nthu unohwa matama e Ndzimu, unoamutjila luzibo gwe u pezhugwi zhugwi. Unobona mbono ya ibo Masimbawose, iye unothigama ekotamisa nsholo, koga mesho awe akalinga.

¹⁷Ndombona, koga kusi ngwenu, ndakanlinga, koga kusipejo pejo. Nyenyedzi inowobhuda muna Jakubo, swimbo ye bushe inowobhuda mu Iziraela, inowopkhwanya migathu ye Moabu. Inowolobesa bakololo bose ba Shethi.

¹⁸Edomu unowokundiwa, Seiri tjita tjitje unowothuyiwabo, koga Iziraela unowokunda kupinda.

¹⁹Bushe gopiwa mmwe unodwa muna Jakubo, ngono unowolobesa malimbelimbe e nzi.”

²⁰Ndizo kalinga Amaleki, katangisa ndebeleko iye kati, “Amaleki wakabe uli iwo umbeli kwe zwitjaba zose, koga ku bupelo bose,” banowolobela tjose.

²¹Kalinga Bakeniti, katangisa ndebeleko iye kati, “Mugele mu bugalo gwakabakiligwa, gunonga shaka lakabakwa mu shongwe;

²²Nenguba kwakajalo, Kaini unowothukudziwa. Kudza Ashuri ukutapa.”

²³Bhalamu katangisa ndebeleko iye kakale kati, “Yee mme wee mapalala! Apa ndiani unowotjila, ha Ndzimu ungathama ikoku kene?

²⁴Koga zwikepe zowodwa ku Khitimu ngono zongondongedza Ashuri na Eberi; ngono na ibobo banowoloba.”

²⁵Ndizo Bhalamu kamilika, kabgwilila kanyi kukwe na Bhalaki na iyebo kazwiyendilazwe.