Read Kalanga Mbalo 25 Bible Online

Mbalo 25 - Kalanga bible

Mbalo 25

¹Kukati Baiziraela batjigele mu Shitimu balume bakatangisa kuthama bufukula ne bakololokadzi be Moabu.

²Bakadzi ibaba bakakokela Baiziraela ku mishingo ye kupisa zwibhayilo ne kunamata midzimu yabo ye Moabu. Ngono Baiziraela bakaja bakabuya bakanamata midzimu ye Moabu.

³Ndizo Baiziraela bakazwibhatshanya na Bhaale we Peori. Ngono Yahwe bakazhala bushongola kwazo ngekwe Iziraela.

⁴Yahwe bakadwa Mushe bakati, “Tola batungamili bose be Iziraela ubabulaye nge kubalembeledza mbeli kwa Yahwe kuli masikati, kuti bushongola gwa Yahwe gushanduke gudwe mu Iziraela.”

⁵Ngono Mushe kadwa basumikilisi be Iziraela kati, “Mmwe ne mmwe wenyu abulaye bathu babe bose bakazwibhatshanya na Bhaale we Peori.”

⁶Ngono bonani, mmwe nlume we Iziraela kazha ne nkadzi we Midiyani kangina naye mu nshasha uwe, Mushe ne gubungano lose le Iziraela bakalinga. Baiziraela bakabe batjalila bali pa nkoba we nshasha wa Yahwe we bushanganilo.

⁷Kukati Finihasi nkololo wa Eleazari, mwana we mwana we mpirisiti Aroni ebona ikoku, kamilika mu gubungano akabhata thumo,

⁸kanginilila nlume uwoyo ne nkadzi mukati kwe nshasha, kababhaya bose ngethumo kang'ompela. Ndiyo zila yakamisa tjiga tjakabe tjishingikala mu bathu be Iziraela.

⁹Nenguba kwakajalo, bathu bakabe bafa kale nge tjiga bakabe bali zwiwulu zwili makumi mabili ana banna (24 000).

¹⁰Ngono Yahwe bakadwa Mushe bakati,

¹¹“Finihasi nkololo wa Eleazari nkololo we mpirisiti Aroni, wapodza moyo wangu mu bushongola gwandabe ndili igo mu bathu be Iziraela nge kumusa meya kungapa pakati kwabo nge kwangu mu kunamata kwabo mindzimu ipoga kuzhe kwangu ndizo ndisalobesa Baiziraela ngekwe fupa langu.

¹²Ndizo ubudze Finihasi uti, ‘Bona, ndothama tjidumano tje mbakiso naye.

¹³Tjowobe tjidumano tjitje ne zwizekugwana zwizwe zwinowozha. Tjidumano tje bupirisiti nge kusingapele, ngobe wathamila fupa Baiziraela ebathamila fupa ngekwe Ndzimu uwe. Kabe ethamila bathu be Iziraela gadzano na Yahwe.’ ”

¹⁴Nlume we Iziraela wakabulawa ana nkadzi we Midiyani zina lile lakabe liyi Zimiri nkololo wa Salu nsholo we nsha wa tate babe mu ludzi gwa Simiyoni.

¹⁵Zina la iwoyo we Midiyani liyi Khozibhi nkololokadzi wa Zuri, wakabe ali nsholo we nsha wa tate babe mu Midiyani.

¹⁶Yahwe bakadwa Mushe bakati,

¹⁷“Udziyidze Bamidiyani ubalobese,

¹⁸Ngobe bakamudziyidza nge bupitipiti gwabo kamutjebela mu mija ye Peori. Ne mu nshingo we lufu gwe hazwadzi yabo Khozibhi nkololokadzi we ntungamili we Midiyani, wakabulawa mu zhuba le tjiga tjakashingikala nge mija ye Peori.”