Read Kalanga Mbalo 26 Bible Online

Mbalo 26 - Kalanga bible

Mbalo 26

¹Shule kwe bugwele Yahwe bakadwa Mushe na Eleazari nkololo we mpirisiti Aroni bakati,

²“Bala gubungano le Baiziraela bose, kudwa muna bana makole ali makumi mabili ne kuyenda pezhugwi, nge misha yabo. Ubale bose bamu Iziraela bangatubula kuyenda ku ngwa.”

³Ngono Mushe na Eleazari bakalebeleka nabo bali mu lubala gwe Moabu seli kwe gwizi gwe Jorodani kulingisana ne Jerikho beti,

⁴“Balani bathu bana makole ali makumi mabili kuyenda pezhugwi, Yahwe sekwa bakadwa Mushe.” Aba ndibo Baiziraela bakadwa ku Egipiti:

⁵Rubheni wakabe ali mbano ya Iziraela. Bakololo ba Rubheni bakabe bali bo Hanoki, ali bhalule le Bahanoki na Phalu ali bhalule le Baphalu

⁶na Hezironi wakazwala Bahezironi na Kharimi ali bhalule le Bakharimi.

⁷Ibaba bose bakabe bali be misha ya Rubheni, bose bose bakabagwa bakabe zwiwulu zwili makumi manna ne butatu ne mazana ali kutendeka ana makumi matatu (43 730).

⁸Nkololo wa Phalu wakabe ali Eliyabu.

⁹Bakololo ba Eliyabu bakabe bali bo Nemueli na Dathani na Abiramu. Dathani na Abiramu ndibo bakabe bashalugwa nge gubungano, ngono bedwa beshandukila Mushe na Aroni bengina mu goko la Kora pa bakapandukila Yahwe.

¹⁰Pasi kukaashama kukabamidza bose na Kora, bakafa. Moto ukapisa balume bali mazana ali mabili ana makumi mashanu (250) ngono bakabe tjilakidzo mu bathu be Iziraela.

¹¹Koga bakololo ba Kora bakasife.

¹²Bakololo ba Simiyoni kuyenda nge minsha yabo bakabe bali bo Nemueli wakazwala Banemueli na Jamini ali bhalule le Bajamini na Jakini ali bhalule le Bajakini,

¹³ne nsha wa Zera wakazwala Shawuli wakazwala Bashawuli.

¹⁴Bathu ibaba be nsha wa Simiyoni bakabagwa bakabe zwiwulu zwili makumi mabili ana bubili ne mazana ali mabili (22 200).

¹⁵Bakololo ba Gadi nge misha yabo bakabe bali bo Zefoni ali bhalule le Bazefoni na Hagi ali bhalule le Bahagi na Shuni ali bhalule le Bashuni

¹⁶na Ozini ali bhalule le Baozini na Eri ali bhalule le Baeri

¹⁷na Arodi wakazwala Baarodi na Areli ali bhalule le Baareli.

¹⁸Bathu be misha iyeyi bakabagwa bakabe zwiwulu zwili makumi manna ana mazana ali mashanu (40 500).

¹⁹Bakololo ba Juda bakabe bali bo Eri na Onani, ngono bubili gwabo bakafila ku shango ye Kanana.

²⁰Bakololo ba Juda nge misha yabo bakabe bali Shela

²¹na Perezi na Hezironi na Hamuli.

²²Bathu be misha ya Juda iyeyi bakabakagwa bakabe zwiwulu zwili makumi ali kutendeka ana butathatu ne mazana ali mashanu (76 500).

²³Bakololo ba Isakari nge misha yabo bakabe bali bo Tola wakazwala Batola na Puva wakazwala Bapuva

²⁴na Jashubu ali bhalule le Bajashubu na Shimironi wakazwala Bashimironi.

²⁵Aba bakabagwa bakabe zwiwulu zwili makumi ali tathatu ana bunna ne mazana ali matatu (64 300).

²⁶Bakololo ba Zebuluni nge misha yabo bakabe bali bo Seredi ali bhalule le Baseredi na Eloni wakazwala Baeloni na Jahileeli ali bhalule le Bajahileeli.

²⁷Aba bakabagwa bakabe zwiwulu zwili tathatu ne mazana ali mashanu (6 500).

²⁸Bakololo ba Josefa nge misha yabo bakabe bali bo Manase na Ifureimi.

²⁹Bakololo ba Manase bakabe bali bo Makiri ali bhalule le Bamakiri, Makiri iye wakabe ali tate ba Giliyadi ali bhalule le Bagiliyadi,

³⁰Aba ndibo bakololo ba Giliyadi: Iezeri iye wakazwala Baiezeri na Heleki ali bhalule le Baheleki,

³¹na Asiriele wakazwala Baasiriele na Shekemu ali bhalule le Bashekemu

³²na Shemida ali bhalule le Bashemida, na Hefiya ali bhalule le Bahefiya.

³³Zelofehadi nkololo wa Hefiya wakabe asina bana be tjilume, koga ana be tjikadzi, mazina abo ndi Mahila na Nuwa na Hogila na Milikha na Tireza.

³⁴Aba ndibo be misha ya Manase, bakabagwa bakabe zwiwulu zwili makumi mashanu ana bubili ne mazana ali kutendeka (52 700).

³⁵Aba ndibo bakololo ba Ifureimi nge misha yabo, Shuthela wakazwala ba Bashuthela na Bhekheri wakazwala Babhekheri na Tahani wakazwala ba Batahani.

³⁶Ngono aba bakololo ba Shuthela, ndi Erani wakazwala Baerani.

³⁷Aba ndibo be misha ye bakololo ba Ifureimi, bakabagwa bakabe zwiwulu zwili makumi matatu ana bubili ne mazana ali mashanu (32 500), ndizo zwizekugwana zwa Josefa kuyenda nge misha yabo.

³⁸Bakololo ba Bhenjamini nge misha yabo bakabe bali bo Bhela wakazwala Babhela na Ashebheli wakazwala Baashebeli na Ahiramu wakazwala Baahiramu

³⁹na Shufamu wakazwala Bashufamu na Hufamu iye wakazwala Bahufamu.

⁴⁰Bakololo ba Bhela bakabe bali bo Aridi na Naamani, Aridi wakazwala Baaridi, Naamani iye wakazwala Banaamani.

⁴¹Aba ndibo bakololo ba Bhenjamini kuyenda nge misha yabo, bakabagwa bakabe zwiwulu zwili makumi manna ana bushanu ne mazana ali tathatu (45 600).

⁴²Aba bakololo ba Dani nge misha yabo bakabe bali bo Shuhamu wakazwala Bashuhamu. Ndiyo misha ya Dani ne zwizekugwana zwayo.

⁴³Bakabagwa bakabe zwiwulu zwili makumi ali tathatu ana bunna ne mazana ali manna (64 400).

⁴⁴Bakololo ba Asheri nge misha yabo bakabe bali bo Imuna wakazwala Baimuna na Ishevi iye wakazwala Baishevi na Bheriya wakazwala Babheriya.

⁴⁵Bakololo ba Bheriya bakabe bali bo Heba wakazwala Baheba na Malekhieli iye wakazwala Bamalekhieli.

⁴⁶Asheri wakabe ana nkololokadzi we zina lakabe liyi Sera.

⁴⁷Bathu be misha iyeyi bakabagwa bakabe zwiwulu zwili makumi mashanu ana butatu ne mazana manna (53 400).

⁴⁸Bakololo ba Nafutali nge misha yabo bakabe bali bo Jahizeeli wakazwala Bajahizeeli na Guni iye wakazwala Baguni,

⁴⁹na Jezeri wakazwala Bajezeri na Shilemu iye wakazwala Bashilemu.

⁵⁰Ibaba zwizekugwana zwa Nafutali nge misha yabo, bakabagwa bakabe zwiwulu zwili makumi manna ana bushanu ne mazana ali manna (45 400).

⁵¹Bathu bose be Iziraela bakabagwa bakabe bali zwiwulu zwili mazana ali tathatu ne kung'ompela ne mazana ali kutendeka ana makumi matatu (601 730).

⁵²Yahwe bakadwa Mushe bakati,

⁵³“Njudzi dzikobegwe shango kube thaka kuyendidzana nge mbalo ye mazina abo.

⁵⁴Ludzi guna bathu banjinji ugukobele shango hwulu kube thaka. Ngono guna bathu bashomanana ugukobele shango tukunu, ludzi gumwe ne gumwe ugukobele shango kuyenda nge bunji gwago.

⁵⁵Koga shango inowokobiwa ngokandigwa, kukobiwa thaka kuyenda nge mazina a bobatategulu babo.

⁵⁶Ludzi gukulu gukobegwe shango hwulu, gutukununu gukobegwe shango tukununu kube thaka, kuyendidzana ngesekwa kwakandigwa ndiko.”

⁵⁷Nsha we Balevi unobumbiwa nge misha yabo Gerishomi na Kohati na Merari.

⁵⁸Nsha wabo unolonga misha mitukunu yabo Libini na Heburoni na Mahili na Mushi na Kora na Kohati tate ba Amuramu.

⁵⁹Amuramu wakabe akalobola nkololokadzi wa Levi Jokebedi wakazwaligwa ku Egipiti. Wakazwalila Amuramu Aroni na Mushe ne hazwadzi yabo Miriamu.

⁶⁰Aroni wakabe ana bakololo bali banna Nadabu na Abihu na Eleazari na Ithamari.

⁶¹Nadabu na Abihu bakafa pabakabe bayisila Yahwe moto usakatjenapala.

⁶²Balevi be tjilume bakabe bana mwedzi nng'opela kuyenda pezhugwi bakazwagwa bakabe bali zwiwulu zwili makumi mabili ana butatu (23 000). Ngono abazobaligwa mu bathu be Iziraela bawola, ngobe ibo basakakobegwa shango kube thaka yabo.

⁶³Ibaba ndibo bathu be Iziraela bakabagwa ndi Mushe na Eleazari we mpirisiti mu lubala gwe Moabu guseli kwe gwizi gwe Jorodani kulingisana ne Jerikho.

⁶⁴Koga akuna nlume ne nng'ompela wakasala mu bathu be Iziraela muna ibaba bakabagwa ndi Mushe na Aroni we mpirisiti ku tjilambanyika tje Sinai.

⁶⁵Ngoti Yahwe bakabe bati, “Banowofila bose mu tjilambanyika.” Akuna ne nlume nng'ompela wakasala, kuzhe kwa Khalebu nkololo wa Jefune na Joshuwa nkololo wa Nuni.