Read Kalanga Mbalo 27 Bible Online

Mbalo 27 - Kalanga bible

Mbalo 27

¹Ipapo kukazha bakololokadzi ba Zelofehadi nkololo wa Heferi, Heferi ali nkololo wa Giliyadi, Giliyadi ali nkololo wa Makiri, Makiri ali nkololo wa Manase, Manase ali bhalule le ludzi gwe Bamanase iye ali nkololo wa Josefa. Mazina e bakololokadzi babe akabe ali bo Mahila na Nuwa na Hogila na Milikha na Tireza,

²bakama mbeli kwa Mushe na Eleazari we mpirisiti na mbeli kwe batungamili bose be gubungano pa nkoba we nshasha we bushanganilo beti,

³“Tate bedu bakafila mu tjilambanyika, bakafa basina nkololo, bakabe basi mmwe we goko la Kora lakapandukila Yahwe, koga bakabulawa nge tjibi tjabo.

⁴Apa zina la tate bedu lingafilani mu ludzi gwa kanyi kwabo kene, ngobe bakabe basina nkololo? Mutipebo thaka mu bana ba tate bedu.”

⁵Mushe kayisa tjililo tjabo mbeli kwa Yahwe.

⁶Ngono Yahwe bakadwa Mushe bakati,

⁷“Bakololokadzi ba Zelofehadi banolebesa. Ubape tjabakafanila wana tje thaka mu makamu atate babo. Uthame kuti thaka ya tate babo ibalingisane.

⁸Ubudze bathu be Iziraela kuti, ‘Ha nlume afa asina nkololo, nkololokadzi uwe wakafanila tola lukata gwa tate babe.

⁹Ha asina nkololokadzi, thaka iye ipiwe bakulu kene banung'una babe be tjilume,

¹⁰abasipo thaka iye ipiwe bobatatenkulu kene bobatatenini babe,

¹¹bobatatenini kene bobatatenkulu babe abasipo thaka iye ipiwe gamu lipejo. Ngono kowobe nlayo ne ndaulo mu Iziraela Yahwe sekwa bakadwa Mushe.’ ”

¹²Yahwe bakadwa Mushe bakati, “Tathila pezhugwi kwe Dombo le Abarimu, ngono ubone shango yandinopa bathu be Iziraela.

¹³Ngono unoti usinokuibona unowofa, se nkulu uwo Aroni akabatobela,

¹⁴ngobe mose amuzolondolodza nlayo wangu mu tjilambanyika tje Zini. Amuzolakidza gubungano kuyengemala kwe zina langu muli pa vula mbeli kwabo.” (Meriba nsenya uku Kadeshi mu tjilambanyika tje Zini.)

¹⁵Mushe kadwa Yahwe kati,

¹⁶“Dzene Yahwe, Ndzimu unopa bathu bose meya ye butjilo bangashalula nlume ungatungamila gubungano ileli,

¹⁷mukubhuda kwalo ne mukungina kwalo, kuti gubungano la Yahwe lisitongoshaya ntungamili se pkhwizi dzisina nlisi.”

¹⁸Ngono Yahwe bakadwa Mushe bakati, “Tola Joshuwa nkololo wa Nuni, nlume una meya untembezelele nge kumbiga maboko.

¹⁹Ummise mbeli kwa Eleazari we mpirisiti na mbeli kwe gubungano lose, ube uzibisa gubungano kuti ndiye unotola mukuli.

²⁰Umpe simba lawakabe ushinga nalo, kuti gubungano lose le bathu be Iziraela linhwilile.

²¹Unowoma mbeli kwe mpirisiti Eleazari, unowombhuzwila tjaangathama mbeli kwa Yahwe nge Urimu[7]. Nge ndaulo iye, Joshuwa ne gubungano lose le Iziraela banowobhuda bakayenda kakale ne ndaulo iyezwe banowoshanduka.”

²²Ngono Mushe kathama sekwa apiwa ndaulo ndi Yahwe. Katola Joshuwa kammisa mbeli kwa Eleazari mpirisiti ne gubungano lose.

²³Kantembezelela nge kumbiga maboko, ebe ethama Joshuwa n'gali thaka uwe ebe enlaya sekwa apiwa ndaulo ndi Yahwe.