Read Kalanga Mbalo 30 Bible Online

Mbalo 30 - Kalanga bible

Mbalo 30

¹Mushe kadwa batungamili be bathu be Iziraela kati, “Yahwe bakandipa ndaulo beti,

²‘Ha nthu atuna kuna Yahwe, kene etuna ezwisunga ku shingila Yahwe tjimwe, wakafanila shingikadza tuna kukwe, ngothama tjimwe ne tjimwe sekwa aleba nge nlomo uwe.

³“ ‘Ha mwanadi utji pasi kwe bazwadzi atuna kuna Yahwe, ezwisunga mu butjetjana gugwe,

⁴ngono tate babe bebe benhwa etuna ezwisunga, bebe basingan'dwe tjimwe, tuna kukwe kowoma kwakajalo, muna sekwa azwisunga ndiko.

⁵Koga ha tate babe balakidza kusadumana naye, kutji nge zhuba la bahwa tuna kukwe, ku zwisunga kukwe ngotuna akutowonsunga, ngobe tate babe bakalamba, ndizo Yahwe banowonsunungula ngobe tate babe balamba.

⁶“ ‘Ngono ha elobogwa nge nlume atjakazwisunga ngotuna kwaakathama nge nlomo uwe,

⁷ngono ha nlume uwe angahwa ngekwe kutuna kukwe, ebe asingalebe tjimwe mu zhuba laahwa ndilo, kuzwisunga kukwe kowoma kwakajalo. Ne mazwimisilo awe aakazwisunga nawo anowoma akajalo.

⁸“ ‘Koga ha kungati mu zhuba nlume uwe laahwa ndilo, kalakidza kusadumana ngo tuna kwe nkadzi, ndizo unoshandukila tuna kukwe ne mikumbulo isina nshingo yakalebgwa nge nkadzi, ngono Yahwe banowonzwiimbhatigwa.

⁹“ ‘Koga tuna kwe tjilikadzi kene nkadzi wakapalaligwa nge nsha, tjimwe ne tjimwe tjaakazwisunga nditjo, tjowoma tjakajalo.

¹⁰“ ‘Ngono ha nkadzi atuna akalobogwa, kene azwisunga nge kugadzabgwe ngotuna,

¹¹nlume uwe ebe ehwa ngekwako, ebe asinga lebe tjimwe, asinganyanyayidze, ndizo tuna kukwe kose kowoma kwakajalo ne kugadzabgwe kukwe nge kuzwisunga kukwe kowodwilila.

¹²Koga ha nlume uwe angathama kuti tuna ne gadzabgwe kwe nkadzi uwe kumisiwe mu zhuba laahwa ndilo, ndizo nenguba kungabe kuli ini tjakalebgwa nge nkadzi uwe ngotuna kene nge kugadzabgwe kukwe, akutowodwilila. Ngoti nlume uwe alamba tuna kukwe, ngekujalo Yahwe banowonzwiimbatigwa.

¹³Nlume unafanilo mu nkadzi uwe ye kuduma kene kulamba tuna kwakagadziwabgwe nge nkadzi uwe.

¹⁴Koga ha kungati mu zhuba nlume laahwa ndilo ngotuna kene kugadzabgwe kwe nkadzi uwe akasilebe tjimwe, unowobe adumana nako, ngobe asalakidza kuti walamba.

¹⁵Koga ha nlume angalamba shule kwe tjibaka tjaakahwa nditjo, unowosenga nlandu we nkadzi uwe nge mathudzi.’ ”

¹⁶Eyi ndiyo ndaulo Yahwe yabakapa Mushe ngekwe nlume ne nkadzi kene nkololokadzi mu butshwa gugwe atji pasi kwa tate babe egala mu nzi wabo.