Read Kalanga Mbalo 31 Bible Online

Mbalo 31 - Kalanga bible

Mbalo 31

²“Bgwilizila Bamidiyani tjabakathama mu Baiziraela, shule kwa ikoku, unowofa.”

³Ngono Mushe kadwa bathu be Iziraela kati, “Muzwilulwamisile babhayani munogwa ne Bamidiyani, Yahwe babgwilizilile tjabakathamwa ne Bamidiyani.

⁴Dusani balume bali tjiwulu tjing'ompela (1 000) mu ludzi gumwe ne gumwe gwe Iziraela bayende ku ngwa.”

⁵Ndizo muna bali zwiwulu be Baiziraela kukashalugwa balume bali tjiwulu tjing'ompela (1 000) koga, mu ludzi gumwe ne gumwe, bose bakabe bali zwiwulu zwili gumi lina bubili (12 000) bakazwilulwamisila kuyenda ku ngwa.

⁶Mushe wakabatumila kungwa bali tjiwulu kudwa mu ludzi gumwe ne gumwe, bakatungamigwa ne mpirisiti Finihasi nkololo wa Eleazari akabhata zwija zwe bugalo gwakayengemala ne lunyanga gunolaula ngwa.

⁷Bakagwa ne Bamidiyani Yahwe sekwa bakadwa Mushe, ngono bakabulaya balume bose,

⁸bakabulayilanya kose na bomambo babo bashanu Evi na Rekemu na Zuri na Huri na Reba na pezhugwi kwa ibaba bakabulaya na Bhalamu nkololo wa Bheyori nge thumo.

⁹Bathu be Iziraela bakatapa bakadzi ne bana be Midiyani, bakazwitolegwa zwithuwo ne thundu yabo yose.

¹⁰Bakapisa mizi mikulu yose mu magalo abakabe baligele ne makotokelo abo wose.

¹¹Bakatola zose zwakatapiwa zwabakawana nge ngwa, bathu kose ne zwithuwo.

¹²Bakazwizhisa kuna Mushe neku mpirisiti Eleazari ne gubungano le Iziraela lakabe lakotokela mu lubala gwe Moabu seli kwe gwizi gwe Jorodani kulingisana ne Jerikho.

¹³Mushe ne mpirisiti Eleazari ne batungamili bose be gubungano le bathu be Iziraela bakabhuda bakanobashanganidza kuzhe kwe bukotokelo.

¹⁴Ngono Mushe kazhala bushongola ngekwe balauli be babhayani ne balauli be babhayani be bali zwiwulu ne balauli be babhayani be bali mazana, bakabe babuya ku ngwa.

¹⁵Kababhuzwa kati, “Apa makaletja bakadzi betjila kene?

¹⁶Bonani, Bakadzi ndibo bakateedza gumbuludzo la Bhalamu ku Peori bakathama kuti bathu be Iziraela bathamile Yahwe mbipo. Ngono tjiga tjikazha mu gubungano la Yahwe.

¹⁷Ndizo ngwenu, bulayani bana bose be tjilume, mube mubulaya bakadzi bose bakatongo walilana.

¹⁸Koga muzwisiyile baanadi bose basathu bakawalilana.

¹⁹Mmwe ne mmwe wabulaya nthu ne mmwe ne mmwe wabhata itumbu anokotokela kuzhe kwe bukotokelo kwe mazhuba ali kutendeka. Mu zhuba le butatu ne muzhuba le butendeka, muzwitjenepadze imwi ne bakadzi bamakatapa.

²⁰Mutjenapadze tjiambalo tjimwe ne tjimwe, ne tjimwe ne tjimwe tjakathamwa nge ganda ne tjakathamwa nge bukuse gwe mbudzi kene nge lukuni.”

²¹Mpirisiti Eleazari kadwa balume bakabe bayenda ku ngwa kati, “Nlayo wakapiwa Mushe ndi Yahwe ndi woyu:

²²Zose zwakathamwa nge golide ne siliva ne phangula ne tshipi ne nge ntodo,

²³nenge tjimwe ne tjimwe tjisingake tjikatshwa mu moto, mutjibabe nge moto, ngono tjowotjenapala. Nenguba kwakajalo, mutjitjenapadze nge vula inotjenapadza. Ne tjingatshwa nge moto, mutjisuke nge vula.

²⁴Mube musuka zwiambalo zwenyu mu zhuba le butendeka, ngono mowobe matjenapala. Ngono shule kwa ipapo mowodumigwa kungina mu bukotokelo.”

²⁵Yahwe bakadwa Mushe bakati,

²⁶“Iwe ne mpirisiti Eleazari ne batungamili be misha mu gubungano, mubale zose zwakatapiwa, bathu kose ne zwithuwo.

²⁷Mukobanye zwakatapiwa kabili, muzwikobele bakabe bayenda ku ngwa ne gubungano lose.

²⁸Ngono mutolele Yahwe lukhetho mu babhayani bakabe bayenda ku ngwa, mutole tjing'ompela mu mazana ali mashanu (500) e bathu kene ng'ombe kene madonki kene pkhwizi kene mbudzi.

²⁹Mutole gwamu le bubili mu gobe labo mupe Eleazari ili tjipo tjinopiwa Yahwe.

³⁰Mu gobe le bathu be Iziraela, mutole tjing'ompela mu makumi mashanu mamwe ne mamwe e bathu kene ng'ombe kene madonki kene ngubi ye pkhwizi, mu zwithuwo zose, muzwipe Balevi ibo bashingili be bugalo gwa Yahwe.”

³¹Mushe na Eleazari bakathama sekwa kadwiwa Mushe ndi Yahwe.

³²Ipapo muna zwakabe zwatapiwa nge babhayani bakabe bayenda ku ngwa kwakasala, pkhwizi dzili zwiwulu zwili mazana ali matathatu ana makumi ali kutendeka ana dzili shanu (675 000)

³³ne ng'ombe dzili zwiwulu zwili makumi ali kutendeka ana mbili (72 000)

³⁴ne madonki ali zwiwulu zwili makumi matathatu ana ing'ompela (61 000)

³⁵ne bakadzi bakabe basathu bakawalilana bali zwiwulu zwili makumi matatu ana kubili (32 000).

³⁶Ngono gwamu lakabe gobe le babhayani bakabe bayenda ku ngwa dzakabe pkhwizi dzili zwiwulu zwili mazana matatu ana makumi matatu ana dzili kutendeka ne mazana mashanu (337 500).

³⁷Ngono lukhetho gwa Yahwe kwakabe pkhwizi dzili mazana ali matathatu ana makumi ali kutendeka ana dzili shanu (675).

³⁸Ng'ombe dzakabe dzili zwiwulu zwili makumi matatu ana dzili tathatu (36 000) mudzili lukhetho gwa Yahwe gwakabe guli ng'ombe dzili makumi ali kutendeka ana kubili (72).

³⁹Madonki akabe ali zwiwulu zwili makumi matatu ana mazana ali mashanu (30 500), muali lukhetho gwa Yahwe gwakabe guli madonki ali makumi ali kutathatu ana kung'ompela (61).

⁴⁰Bathu bakabe bali zwiwulu zwili gumi lina kutathatu (16 000), mubali bali makumi matatu ana kubili (32) bakabe lukhetho gwa Yahwe.

⁴¹Ngono Mushe katola zwakabe zwili lukhetho gwa Yahwe kazwipa Eleazari Yahwe sekwa bakabe badwa Mushe.

⁴²Mushe wakatola gwamu muna zwakabe zwili zwe babhayani bakabe bayenda ku ngwa epa bathu be Iziraela sa woku:

⁴³Pkhwizi dzili zwiwulu zwili mazana matatu ana makumi matatu ana kutendeka ana mazana ali mashanu (337 500)

⁴⁴ne ng'ombe dzili zwiwulu zwili makumi matatu ana kutathatu (36 000)

⁴⁵ne madonki ali zwiwulu zwili makumi matatu ana mazana ali mashanu (30 500)

⁴⁶ne bathu bali zwiwulu zwili gumi lina kutathatu (16 000)

⁴⁷mu gwamu le bathu be Iziraela Mushe wakatola tjili tjing'ompela mu makumi mashanu mamwe ne mamwe epa Balevi bakabe bali batjengeti be bugalo gwa Yahwe, koga sekwa bakabe badwa Mushe.

⁴⁸Ndizo batungamili bakabe bakatungamila babhayani ne balauli be babhayani bali zwiwulu ne balauli be babhayani bali mazana bakayenda kuna Mushe,

⁴⁹bakandwa bakati, “Balanda benyu babala babhayani ba pasi kwenyu, ngono akuna ne nng'ompela wakatilashikila.

⁵⁰Ngono tazhisa zwipo kuna Yahwe, zwadwa mu mmwe ne mmwe wedu, zwitimbi zwe golide, maseka e maboko, rin'gi dze zwinyala, mang'ina e zebe ne zwitimbi, kuzwithamila gadzano mbeli kwa Yahwe.”

⁵¹Mushe ne mpirisiti Eleazari bakaamutjila golide mubali ne mikhabo yose yakathugwa.

⁵²Golide yose yakadusiwa nge balauli be babhayani bali zwiwulu ne balauli be babhayani bali mazana yakadusiwa kupiwa Yahwe yakabe ingabe bulemo gwe tjilizanyo tje seme dzili mazana mabili (200).

⁵³Babhayani bakabe bayenda ku ngwa bakazwitolegwa zwakabe zwatapiwa ku ngwa.

⁵⁴Ngono Mushe na Eleazari we mpirisiti, bakaamutjila golide mu balauli be babhayani bali zwiwulu ne balauli be babhayani bali mazana. Bakaibiga mu nshasha we bushanganilo, ili tjikumbuludzo mu bathu be Iziraela mbeli kwa Yahwe.