Read Kalanga Mbalo 34 Bible Online

Mbalo 34 - Kalanga bible

Mbalo 34

¹Yahwe bakadwa Mushe bakati,

²“Idwa bathu be Iziraela uti, ‘Ha mungina mu shango ye Kanana, shango yandinowomupa, migathu ye mituthu yenyu ibe sa woku:

³Shango yenyu ku burwa inowobamba kudwa pa tjilambanyika tje Zini, yakasupha ne n'gathu we Edomu. Ngono n'gathu wenyu ku burwa unowobe utangisa ku bhezhuba ku phelelo dze Gungwa le Mwenyu.

⁴Ube unoshanduka wakalinga zhiambuko le Akirabhimi, ube utjulukila ku Zini. Ngono phelelo dze n'gathu wenyu dzowobe ku burwa gwe Kadeshibhareneya. Ube udwilila unoti ku Hazarada, ube upinda wakalinga ku Azimoni.

⁵Kakale unowoshanduka kudwa mu Azimoni unoti ku Nkuku we Egipiti, ube unopelela ku gungwa.

⁶“ ‘N'gathu wenyu ku golombedzo unowobe Gungwa Bukulu.

⁷“ ‘N'gathu wenyu ku bunandzwa unowobe woyu: Kudwa pa Gungwa Bukulu kunoti ku Dombo le Hori.

⁸Unowobamba udwa pa Dombo le Hori unoti ku nkoba we Hamati. Ngono phelelo dze n'gathu dzowobe ku Zedadi.

⁹N'gathu wenyu ku bunandzwa unowotalabukila ku Zifuroni, phelelo dzawo dzowobe ku Hazarenani.

¹⁰“ ‘N'gathu wenyu ku bhezhuba unowobamba udwa pa Hazarenani unoti ku Shefamu.

¹¹N'gathu unowodeluka udwa ku Shefamu unoti ku Ribila uli ku bhezhuba kwe Ayini ukadelukila ku ndzibo we Gungwa gwe Khinereti ku bhezhuba.

¹²N'gathu unowodelukila ku gwizi gwe Jorodani, phelelo dzawo dzowobe ku Gungwa le Mwenyu. “ ‘Iyeyi ndiyo inowobe shango yenyu ne migathu yayo mbizho dzose.’ ”

¹³ Mushe kadwa Baiziraela kati, “Shango yenyu ndiyo iyeyi, moikobana ngokandila. Ndiyo Yahwe yabakati ipiwe njudzi dzili zhanalume dzina gwamu.

¹⁴Ngobe ludzi gwa Rubheni nge misha yabo, ne ludzi gwa Gadi nge misha yabo, ne gwamu le ludzi gwa Manase, bakawana gwabo.

¹⁵Njudzi mbili dzina gwamu le ludzi dzakawana gwadzo seli kwe Jorodani ku Jerikho ku bhezhuba.”

¹⁶Yahwe bakadwa Mushe bakati,

¹⁷“Mpirisiti Eleazari na Joshuwa nkololo wa Nuni ndibo banowokoba thaka ye bathu be Iziraela.

¹⁸Mutole ntungamili mu ludzi gumwe ne gumwe akobe shango kube thaka.”

¹⁹Mazina abo ndiawa: We ludzi gwa Juda ndi Khalebu nkololo wa Jefune.

²⁰We ludzi gwa Simiyoni ndi Shemueli nkololo wa Ammihudi.

²¹We ludzi gwa Bhenjamini ndi Elidadi nkololo wa Khisiloni.

²²We ludzi gwa Dani ndi Bhuki we ntungamili ali nkololo wa Jogili.

²³We bakololo ba Josefa; kuli be ludzi gwa Manase ndi Hannieli we ntungamili ali nkololo wa Efodi.

²⁴We ludzi gwa Ifureimi ndi Kemueli we ntungamili ali nkololo wa Shifutani.

²⁵We ludzi gwa Zebuluni ndi Elizafani we ntungamili ali nkololo wa Phanaki.

²⁶We ludzi gwa Isakari ndi Paletieli we ntungamili ali nkololo wa Azani.

²⁷We ludzi gwa Asheri ndi Ahihudi we ntungamili ali nkololo wa Shelomi.

²⁸We ludzi gwa Nafutali ndi Phedaheli we ntungamili ali nkololo wa Ammihudi.

²⁹Balume ibaba ndibo bakapiwa ndaulo ndi Yahwe kuti bathubukanye shango baikobele bathu be Iziraela kube thaka, mu shango ye Kanana.