Read Kalanga Mbalo 35 Bible Online

Mbalo 35 - Kalanga bible

Mbalo 35

¹Yahwe bakalebeleka na Mushe mu lubala gwe Moabu pa gwizi gwe Jorodani kulingisana Jerikho beti,

²“Idwa bathu be Iziraela ba pebo Balevi shango ye bugalo kube mizi ne ye mafulo e zwithuwo zwabo kupoteleka mizi mikulu.

³Mizi mikulu iyeyi inowobe magalo abo. Shango ye mafulo inowobe ye ng'ombe dzabo ne zwithuwo zwabo zose.

⁴Shango ye mafulo yamunopa Balevi italabudziwe kudwa pa luswingo gwe nzi nkulu we bupabi gwe mithara dzili mazana manna ana makumi mashanu (450), mbizho dzose.

⁵Ku bhezhuba kwe nzi nkulu kube bupabi gwe mithara dzili mazana ali zhanalume (900), ku burwa kube bupabi gwe mithara dzili zhanalume (900), ku golombedzo kube bupabi gwe mithara dzili zhanalume (900), ku bunandzwa kube bupabi gwe mithara dzili zhanalume (900), ndiyo inowobe ili shango yabo ye mafulo, nzi nkulu uli pakati.

⁶Mupe Balevi mizi mikulu ili mitathatu ye matizhilo e nthu unowobe abulaya nthu kusi ne mazwimisilo awe. Mube mubapaphila mimwe ili makumi manna ne mibili (42).

⁷Mizi mikulu yose ina shango ye mafulo yamunowopa Balevi, ibe makumi manna ana ili zhanakadzi (48).

⁸Ngekwe mizi yamunowoshalula mu shango ye Baiziraela, mutole mu zwitjaba zwikulu mizi minjinji, ngono mu zwitjaba zwitukununu mutole mizi mishomanana, ngobe tjimwe ne tjimwe itjaba tjakafanila pa Balevi mizi sekwa takabudzwa.”

⁹Yahwe bakadwa Mushe bakati,

¹⁰“Lebeleka ne bathu be Iziraela ubadwe uti, ‘Muti mutjuluka gwizi gwe Jorodani mungina mu shango ye Kanana,

¹¹muzwishalulile mizi mikulu inowobe matizhilo enyu. Ali matizhilo anowotizhigwa nge nthu unowobe abulaya nthu kusi nge mazwimisilo.

¹²Mizi iyeyo inowobe matizhilo enyu muna unowobe eshaka bgwilizila, kuti ndizo wabulaya nthu asibulawe kudzina eyisiwa mbeli kwe gubungano enosumikilisiwa.

¹³Ngono muduse mizi mikulu ili mitathatu kube mizi mikulu ye matizhilo enyu.

¹⁴Muduse mizi mikulu ili mitatu seli kwe Jorodani ne ili mitatu mu shango ye Kanana, kube matizhilo.

¹⁵Mizi mikulu ili mitathatu inowobe ili matizhilo e nthu mmwe ne mmwe unowobe abulaya nthu kusi nge mazwimisilo awe. Matizhilo iyawa anowobe e Baiziraela ne bataya ne balubili banowobe bali gele nabo.

¹⁶“ ‘Koga aangawomba nthu nge tjimwe tje tshipi ebe efa, uwoyo nthu mbulayi, unowobulawabo.

¹⁷Kene anganloba nge bgwe laakabhata lingabulaya nthu ebe efa, mbulayi, mbulayi unowobulawabo.

¹⁸Kene angaloba nthu nge lukuni gwaakabhata nge luboko ebe efa, mbulayi, mbulayi unowobulawabo.

¹⁹Gamu le wabulawa, ha lishangana ne mbulayi limbulayebo.

²⁰“ ‘Ngono ha entshindika ngoti embenga, kene amposa akanlalila kafa,

²¹kene anloba nge luboko ngoti embenga ebe efa, iwoyo wamilidzila nthu luboko abulawe, mbulayi, gamu le wakabulawa libulaye mbulayi, ha lingashangana naye.

²²“ ‘Koga ha etshindika nthu asingambone, kuzhe kwe lubengo kene angati eposa akanloba asaka nlalila,

²³ebe enloba nge bgwe, asingambone nthu ebe efa, kuli kuti wabe asakazwimisila kun'hwisa zogwadza ngobe akambenga,

²⁴gubungano lowosumikilisa pakati kwe wabulaya nthu ne wabe eshoko bgwilizila ngotebula malopa, kuyenda nge nlayo.

²⁵Gubungano lowoangulanya mbulayi we nthu mu luboko gwe gamu le wakabulawa, ipapo gubungano lobgwiliza ntizhi ku nzi nkulu we matizhilo kwaakabe atizhilako. Ngono agale muuli kudzina ntungamili we bapirisiti wakazhodziwa efa.

²⁶Koga ha mbulayi we nthu angabhudila kuzhe kwe nzi nkulu we dizhilo waakatizhila muuli, kanopinda paakabigigwa kuti asitongopatjuluka,

²⁷ngono ha gamu le wakabulawa lingan'wana kuzhe kwe nzi nkulu atjuluka paakabigigwa kuti asitongo patjuluka libe limbulaya, alitowobong'wa nlandu.

²⁸Ngoti nthu iwoyu akafanila gala koga mukati kwe nzi nkulu we matizhilo kudzina ntungamili we bapirisiti efa. Koga shule kwe lufu gwe ntungamili we bapirisiti, mbulayi we nthu ungabgwilila zwe kanyi kwabo.

²⁹Nlayo uwoyu ne ndaulo iyeyi, muzwilondolodze kuyenda nge zwizekugwana zwenyu mu magalo enyu wose.

³⁰“ ‘Ha nthu angabulaya nthu, mbulayi wakafanila bulawabo apa kuna butendeki gwe batendeki babili kene kupinda. Kusibe ne nthu unobulawa apa kuna ntendeki nng'ompela.

³¹Nenguba kwakatini, musitongoduma dzutunulo ye nthu wabulaya nthu. Koga nthu wasumikilisiwa kabong'wa nlandu we kubulaya mmwe nthu na iye ngaabulawe.

³²Kakale musitongoduma dzutunulo ye nthu wakatizhila ku nzi nkulu we matizhilo, kuti abgwilile kanyi kwabo ntungamili we bapirisiti esathu kafa.

³³Musitongo temapadza shango ya mugele muili, ngo tebula lopa, kotemapadza shango, ngono akuna tjingadzutunula kubulawa kwe nthu, kuzhe kwe kuti iye wabulaya nthu, abulawebo.

³⁴Usitongo temapadza shango ya ugele muili namibo yandigele muili, ngoti imi Yahwe ndogala pakati kwe bathu be Iziraela.’ ”