Read Kalanga Mbalo 36 Bible Online

Mbalo 36 - Kalanga bible

Mbalo 36

¹Misholo ye misha ye ludzi gwa Giliyadi nkololo wa Makiri, Makiri ali nkololo wa Manase ibo bakabe bali be ludzi gwe zwizekugwana zwa Josefa bakazha kuna Mushe ne batungamili ne hadzasha dze bathu be Iziraela.

²Bakabadwa bakati, “Yahwe bakadwa tetshi wedu kuti bakobele bathu be Iziraela shango kube thaka ngokandila. Bakati kakale mukobele thaka bakololokadzi be gamu lenyu Zelofehadi.

³Ngono ha balobogwa mu ludzi gwe Iziraela gupoga, thaka yedu inowobe yatapudzika, inowopaphidzila ludzi igogo shango kube thaka, ngono towobe talashikigwa nge shango hwulu kube thaka yedu.

⁴Ngono kowoti nge gole le makumi ali mashanu bathu be Iziraela le bgwilizilo shango lizha, thaka ye bakololokadzi ba Zelofehadi inowolingisana ne ludzi gwabakalobogwako, ngono ludzi gwedu gowobe gwalashikigwa nge thaka yago.”

⁵Ipapo Mushe kalaula bathu be Iziraela kuyenda nge dama la Yahwe eti, “Ludzi gwe zwizekugwana gwa Josefa golebesa.

⁶Yahwe bakadusa ndaulo ngekwe bakololokadzi ba Zelofehadi kuti, balobogwe nge wabanowobe bada, koga kuli mukati kwe nsha we ludzi gwa tate babo.

⁷Thaka ye bathu be Iziraela aitowodwa mu ludzi gwe Iziraela ipiwa ludzi gupoga, ngoti gwe mwana mmwe ne mmwe we Iziraela gwakalingisana nge ludzi gwa tate babe.

⁸Nkololokadzi mmwe ne mmwe wakapiwa shango ili thaka idwa mu ludzi gwe Iziraela wakafanila lobogwa ne mmwe we ludzi gwa tate babe. Kuti ndizo mmwe ne mmwe mwana we Iziraela awane shango ye thaka ya tate babe.

⁹Akuna shango ye thaka inowodwa mu gumwe ludzi ipiwa gumwe ludzi, ngoti ludzi gumwe ne gumwe gwe bathu be Iziraela gowolingisana nge thaka yago.”

¹⁰Ndizo bakololokadzi ba Zelofehadi bakathama Yahwe sekwa bakadwa Mushe.

¹¹Ngoti Mahila na Tireza na Hogila na Milikha na Nuwa, bakololokadzi ba Zelofehadi bakalobogwa nge bana ba batateninini babo.

¹²Bakalobogwa mu nsha we bakololo ba Manase nkololo wa Josefa. Ngono thaka yabo ikagalila tjose mu ludzi gwe nsha wa tate babo.

¹³Eyi ndiyo milayo ne ndaulo dzakapiwa bathu be Iziraela, Yahwe pa belebeleka na Mushe mu lubala gwe Moabu seli kwe gwizi gwe Jorodani kulingisana ne Jerikho.