Read Kalanga Mbalo 4 Bible Online

Mbalo 4 - Kalanga bible

Mbalo 4

²“Bala bakololo be Balevi be ludzi gwa Kohati nge misha yabo nenge ng'umba dza botate babo,

³kudwa mu balume be makole ali makumi matatu (30) kunoti kuna bana makole ali makumi mashanu (50), ubale bose bangangina mu nshingo, kushinga nshingo mu nshasha we bushanganilo.

⁴Nshingo we bakololo ba Kohati mu nshasha we bushanganilo, wutjengeta zwithu zwakayengemala kwazo.

⁵Ha nshasha ufulusiwa, Aroni ne bakololo babe banowongina mukati bakadelusa tjisitilo, bebe befukidza bhokisi le butendeki nditjo.

⁶Balifukidze nge makukuta akasukiwa, bebe bewala jila le mbala we makole, bebe belonga mapango anolisenga.

⁷“Bafukidze tafuli ye tjiwunga tjinopiwa Yahwe nge jila le mbala we makole wakabondelela, babige ndilo ne ndigwana dzinopisila motsha ne ndilo hwulu ne mapepe e tjipo tje tjing'o, ne tjiwunga tje misi yose tjibigwe payili.

⁸Bazwifukidze zose nge jila shaba, bebe beli fukidza nge makukuta akasukiwa bebe belonga mapango anolisenga.

⁹“Batole jila le mbala we makole wakabondelela bafukidze tjigadziko tje luvone ne mavone atjo ne midzibo yatjo ne ndigwana dzatjo ne zwija zwe mafuta zwakashingisiwa.

¹⁰Batjipetele ne zwija zwatjo zose zwili mu bhetelo le gukuta lakasukiwa babe betjibiga mu thala.

¹¹“Pezhugwi kwe tjibeso tjinopisigwa zwibhayilo tje golide bawale jila le mbala we makole wakabondelela, bebe betjipetela nge bhetelo le makukuta akasukiwa babebetjibiga mu thala.

¹²Batole zwija zose zwinoshingisiwa mu bugalo gwakayengemala bazwipetele nge jila le mbala we makole wakabondelela, bebe bezwifukidza nge makukuta akasukiwa e phuka dze gungwa, bebe bezwibiga mu thala.

¹³Bawole nlota mu tjibeso tjinopisigwa zwibhayilo babe bewala tjila le mbala we bushaba gwakabondelela pezhugwi kwatjo.

¹⁴Babige zwija zose zwe tjibeso tjinopisigwa zwibhayilo mutjili zwinoshingisiwa ipapo, makambana e moto ne mbambo dzino bhaya nyama ne maharawo ne zwikutili, zwija zose zwe tjibeso tjinopisigwa zwibhayilo, babe bewala makukuta akasukiwa akanaka pezhugwi kwatjo babe betjibiga mu thala.

¹⁵Kowoti Aroni ne bakololo babe bapedza fumika bugalo gwakayengemala ne zwija zwago zose, se be bukotokelo befuluka, be ng'umba ya Kohati bazhe basenge, koga abazofanila kutha zwithu zwakayengemala, ngoti bangafa. Ezwi ndizo zwithu zwe nshasha we bushanganilo zwakafanila sengwa nge bakololo ba Kohati.

¹⁶“Eleazari nkololo we mpirisiti Aroni unowobe ntjengeti we mafuta e luvone ne motsha unonuhwa zwinozipa ne tjipo tje mathunde tje misi ne misi ne mafuta anozhodziwa, ne kulingilila bugalo gwe Ndzimu na zose zwimuguli zwe bugalo gwakayengemala ne zwija zwago.”

¹⁷Yahwe bakadwa Mushe na Aroni bakati,

¹⁸“Musiletje ludzi gwe misha ye Bakohati gukalobesiwa pakati kwe Balevi,

¹⁹muthame kuti batjile basife ha bangasedzela pejo ne zwithu zwakayengemala kwazo. Aroni ne bakololo babe bangine mukati, ngono bape mmwe ne mmwe wabo nshingo ne ntolo wakanlingisana.

²⁰Koga Bakohati basitongongina mukati bakashozhela zwithu zwakayengemala, nenguba kuli kwe tjibakana, abangajalo banowofa.”

²¹Yahwe bakadwa Mushe bakati,

²²“Bala Balevi be ludzi gwa Geshoni nge misha yabo nenge ng'umba dza botate babo,

²³kudwa mu bathu be makole ali makumi matatu kunoti kuna bana makole ali makumi mashanu, ubale bose bangangina mu nshingo kushinga mu nshasha we bushanganilo.

²⁴Oyu ndiwo nshingo we misha ye Bageshoni mu kushinga nenge mitolo yakabalingisana:

²⁵Banowosenga zwisitilo zwe bugalo gwe Ndzimu ne nshasha we bushanganilo ne tjinogufumika tje makukuta akasukiwa pezhugwi kwago ne tjisitilo tje nkoba we nshasha we bushanganilo

²⁶ne matyila akalembeleka mu nsha ne tjisitilo tje nkoba we nsha wakakombeledza bugalo gwe Ndzimu ne tjibeso tjinopisigwa zwibhayilo ne misungo yago ne zwija zose zwinoshingisiwa kumisa zwithu izwezwi, ngono bathame kose kwakabalingisana ne kuti bakushinge.

²⁷Nshingo wose we bakololo be Bageshoni unowobe mu ndaulo ya Aroni ne bakololo babe, kose kwabakafanila senga ne kose kwabakafanila thama, mubudze bose bakalingisana kusenga ntolo wakabalingisana.

²⁸Oyu ndiwo nshingo we bakololo be Bageshoni mu nshasha we bushanganilo, ngono nshingo wabo unowobe wakalingiligwa ndi Ithamari nkololo we mpirisiti Aroni.

²⁹“Ngekwe ludzi gwa Merari, ubabale nge misha yabo nenge ng'umba dza botate babo,

³⁰kudwa mu bathu be makole ali makumi matatu (30) kunoti kuna bana makole ali makumi mashanu (50), ubale mmwe ne mmwe ungangina mu nshingo we kuthama nshingo we nshasha we bushanganilo.

³¹Banowobe bakalingisana ngosenga makwasayili e bugalo gwe Ndzimu ne makoko ago ne phanda dzago ne zwigadziko zwago ne kushinga nshingo wose we nshasha we bushanganilo

³²ne panda dze nsha kupoteleka ne zwigadziko zwadzo ne mbambo ne misungo ne zwija zose nenge zwithu zose zwinowoshingisiwa, nlume mmwe ne mmwe apiwe tjaakafanila senga.

³³Oyu ndiwo nshingo we misha ye bakololo ba Merari, nshingo wabo wose mu nshasha we bushanganilo bali mu luboko gwa Ithamari nkololo we mpirisiti Aroni.”

³⁴Mushe na Aroni ne batungamili be gubungano bakabala bakololo be Bakohati nge misha yabo nenge ng'umba dza botate babo,

³⁵kudwa mu mmwe ne mmwe unga ngina mu nshingo we kushinga mu nshasha we bushanganilo una makole ali makumi matatu (30) akazwagwa kuyenda pezhugwi kuna bana makole ali makumi mashanu (50).

³⁶Ngono bakabagwa nge misha yabo bakabe zwiwulu zwili zwibili zwina mazana ali kutendeka ana makumi ali mashanu (2 750).

³⁷Ibaba ndibo be misha ye Bakohati bakabe beshinga mu nshasha we bushanganilo, bakabagwa ndi Mushe na Aroni kuyendidzana ne ndaulo ya Yahwe yabakapa Mushe.

³⁸Bageshoni bakabagwa nge misha yabo nenge ng'umba dza botate babo.

³⁹Balume bose kudwa muna ana makole ali makumi matatu kuyenda pezhugwi kuna ana makole ali makumi mashanu (50) wakabe akalizana kungina mu nshingo we kushinga mu nshasha we bushanganilo,

⁴⁰bakabagwa nge misha yabo nenge ng'umba dza botate babo bakabe bali zwiwulu zwili zwibili zwina mazana ali matathatu ana makumi ali matatu (2 630).

⁴¹Eyi ndiyo misha yakabagwa ye bakololo ba Geshoni, bose bakabe beshinga mu nshasha we bushanganilo, bakabagwa ndi Mushe na Aroni kuyenda nge ndaulo ya Yahwe.

⁴²Misha ye bakololo ba Merari yakabagwa nge misha nenge ng'umba dza botate babo,

⁴³kudwa muna bana makole ali makumi matatu (30) bakazwagwa kuyenda pezhugwi kuna bana makole ali makumi mashanu (50), mmwe ne mmwe wakabe akalizana kungina mu nshingo we kushinga mu nshasha we bushanganilo,

⁴⁴bakabagwa nge misha bakabe zwiwulu zwili zwitatu zwina mazana ali mabili (3 200).

⁴⁵Ibaba ndibo be misha ye bakololo ba Merari, bakabagwa ndi Mushe na Aroni kuyendidzana ne ndaulo ya Yahwe yabakapa Mushe.

⁴⁶Balevi bose bakabagwa ndi Mushe na Aroni ne batungamili be Iziraela nge misha yabo nenge ng'umba dza botate babo,

⁴⁷kudwa muna bakabe bana makole ali makumi ali matatu (30) bakazwagwa kuyenda pezhugwi kuna bana makole ali makumi mashanu (50), mmwe ne mmwe wakabe angangina mu nshingo ne kusenga ntolo mu nshasha we bushanganilo,

⁴⁸bakabagwa bakabe zwiwulu zwili zhanakadzi zwina mazana ali makumi mashanu ana makumi ali zhanakadzi (8 580).

⁴⁹Kuyendidzana nge ndaulo ya Yahwe yabakapa Mushe, mmwe ne mmwe wakapiwa nshingo uwe we kushinga kene kusenga, tjabakabe bowobe badwiwa. Saikoko Mushe kababala Yahwe sekwa bakandwa.