Read Kalanga Mbalo 5 Bible Online

Mbalo 5 - Kalanga bible

Mbalo 5

¹Yahwe bakadwa Mushe bakati,

²“Idwa bathu be Iziraela badusile kuzhe kwe bukotokelo mmwe ne mmwe unogwala mapele ne mmwe ne mmwe unogwala tjigwele ne mmwe ne mmwe wakatemapadziwa nge bafi.

³Utatile kuzhe bose bakadzi ne balume bakatemapala, kuti basitemapadze bukotokelo gwabo, pandinogala pakati kwe bathu bangu.”

⁴Ngono Baiziraela bakathama beijalo, bakabadusila kuzhe kwe bukotokelo Yahwe sekwa bakadwa Mushe.

⁵Yahwe bakadwa Mushe bakati:

⁶“Idwa bathu be Iziraela uti, ‘Ha nlume kene nkadzi ethama zwimwe zwe zwibi ngosangalamoyo muna Yahwe nthu wakajalo nlandu,

⁷azwilebe nlandu uwe, abe elipa nlandu uwe nge buzhalo, ebuya epapha nge ikwamu tjing'ompela mu zwikwamu zwili zwishanu zwe themba ye nlandu uwe, ebe epa uwoyo waathamila nlandu.

⁸Koga ha nthu wakafanila lipiwa asina n'gali thaka, ndipo ye nlandu inothamigwa Yahwe ili ye mpirisiti, ipapha pezhugwi kwe nyundo yaisiwa tjibhayilo tje gadzano tjathamigwa wathama nlandu.

⁹Ngono zwipo zose zwakayengemala zwe Baiziraela zwabanoyisa ku mpirisiti zowobe zwizwe.

¹⁰Tjipo tje nthu tjimwe ne tjimwe tjakayengamala tjinoyisiwa kuna Yahwe, mpirisiti azwitolegwe itjo.’ ”

¹¹Yahwe bakadwa Mushe bakati,

¹²“Idwa bathu be Iziraela uti, ‘Ha nkadzi we nthu angatjinya ngothama bupombgwe,

¹³ebe ewalilana thobo ne mmwe nlume, nlume uwe kasizibe, kukasibe ne waziba kuti wa temapala kakale kusina butendeki gwe kuti wabhakhwa bupombgwe,

¹⁴ngono ha nlume uwe angazhigwa ne fupa kakumbulila nkadzi uwe kuti wathama bupombwe katemapala, ngono asina butendeki,

¹⁵Ipapo nlume azhise nkadzi uwe ku mpirisiti, abe ezhisa ne tjipo tjinoshakigwa nkadzi uwe tjili tjilizanyo tje seme ing'ompela ye bgwisa gwe mathunde e bhali, asitongogudila mafuta, kakale asitongo gulonga motsha unonuhwa zwinozipa pezhugwi kwago, ngobe tjili tjipo tje mathunde tjinoyisiwa nge nlume unokumbulila, tjithamigwa kudusila lebeswa patjena.’ ”

¹⁶“Ngono mpirisiti unowosedzedza nkadzi, kambiga mbeli kwa Yahwe.

¹⁷Mpirisiti unowotola vula yakayengemala nge ndilo ye ntapkhwi, ebe etola hwuluba pa budzilo mukati kwe bugalo gwe Ndzimu ebe edila mu vula.

¹⁸Ngono mpirisiti unowozhisa nkadzi mbeli kwa Yahwe, abe ewundumula mavudzi mu nsholo we nkadzi, abe entshitsha bgwisa mu maboko, guli bgwisa gwe tjipo tje fupa, gunoyisigwa kukumbulila. Mpirisiti iye ebe akabhata vula inobaba mu maboko awe inozhisa bhiso.

¹⁹Ndizo mpirisiti antunise alebeleke ati, ‘Ha kusina nlume wakapombgwa nawe, kene usaka pambuka mu zila uka tjinya ukazwitemapadza, utjipasi kwe nlayo we nlume uwo, usungunuke mu kulongwa bhiso nge vula iyeyi inobaba.

²⁰Koga ha wakapambuka mu zila ukapombgwa, utji pasi kwe nlayo we nlume uwo, ngono wazwitemapadza, ngolala ne nlume usi uwo mu bumo gwe nlume uwo,

²¹mpirisiti unowotunisa nkadzi nge tuna kwe bhiso eti, “Yahwe ngabakulonge bhiso pakati kwe bakanyi kwenyu. Yahwe ngaba ku bhatise shoni, bakukumadze ntumbu uwo.

²²Vula iyeyi inolonga bhiso ikungine mu ntumbu, ikuzwimbise mbili na mbeli kuko kuswabe.” ’ ” “Ngono nkadzi unowodabila eti, ‘Ngakujalo, ngakujalo.’

²³“Ndizo mpirisiti unowokwala bhiso ileli mu lukwalo, ebe elisukila mu ndilo ina vula inobaba.

²⁴Ngono mpirisiti unong'wisa nkadzi vula inobaba inolonga bhiso, inowongina mu ntumbu uwe ikanlonga zwibhayo zwinogwadza.

²⁵Mpirisiti unotola tjipo tje bgwisa tje kumbulila mu luboko gwe nkadzi, ebe ezunguza bgwisa mbeli kwa Yahwe eguyisa ku tjibeso tjinopisigwa zwibhayilo.

²⁶Mpirisiti unowonokola luboko gulizhele ili gobe le ikumbuludzo ebe egupisila mu tjibeso tjinopisigwa zwibhayilo, shule kwa ikoko mpirisiti unong'wisa nkadzi vula.

²⁷Ngono kowoti shule kwe anng'wisa vula, ndizo ha angabe akazwitemapadza, akathamila nlume uwe bupombgwe, vula inolonga bhiso inongina mu ntumbu uwe ikanlonga zwibhayo zwinogwadza, ebe ezwimba mbili ebe eswaba na mbeli, ngono nkadzi unowobhakhwa nge shoni muna bakanyi kwabo.

²⁸Koga ha nkadzi asakazwitemapadza kakale asina nlandu, aatowohwisiwa zogwadza kakale unowotubula kuwana bana.

²⁹“Oyu ndiwo nlayo we kumbulila, ha nkadzi ali pasi kwe nlayo we nlume uwe, ebe ebhuda mu zila ezwitemapadza,

³⁰kene ha meya dze kumbulila dzangina mu nlume, ebe enomisa nkadzi mbeli kwa Yahwe, mpirisiti unoshingikadza nlayo uwoyu.

³¹Nlume unowobhuda mu nlandu, koga ha nkadzi ali nlandu wakafanila kuusenga nge mathudzi.”