Read Kalanga Mbalo 6 Bible Online

Mbalo 6 - Kalanga bible

Mbalo 6

¹Yahwe bakadwa Mushe bakati,

²“Lebeleka ne Baiziraela ubadwe uti, ‘Ha nlume kene nkadzi etuna ngozwipa kube Nnaziri mbeli kwa Yahwe,

³Azwidzibe mu kung'wa nkumbi we zhambi ne busukwa. Basitongong'wa tjing'o tjakathamwa nge ntubgwi we zhambi kene kuli kuja zhambi nyolo kene dzakawanikiwa.

⁴Mu misi ye kuzwipa kukwe ali Nnaziri asitongoja tjimwe tjakathamwa nge zhambi, nenguba dzili phudzi kene makanda e zhambi.

⁵“ ‘Mu misi yose ye kutuna kukwe kwe kuzwipa kube Nnaziri asitongotesegwa nsholo, kudzina tjibaka tjitje tje kuzwipa Yahwe tjiwila. Unowobe akayengemala, aletjedze mavudzi awe akule abe malefu akapombana.

⁶“ ‘Mu misi yose ye kuzwipa Yahwe asitongosedzela pa itumbu.

⁷Nenguba guli lufu gwa tate babe kene mme yabe kene nkulu kene nnung'una kene hazwadzi iye, mmwe wabo ha afa, asitongo zwitemapadza ndibo, ngobe kuzwipa kukwe ku Ndzimu kuli mu nsholo uwe.

⁸Mu misi yose ye kuzwipa kukwe kube Nnaziri unowobe akayengemala kuna Yahwe.

⁹“ ‘Ngono ha angawigwa nge lufu paayapo akazwikangang'wa, katemapadza nsholo uwe wakatjenapala, kuti shule kwe mazhuba ali kutendeka atesegwe mavudzi, ndizo unowotjenapala.

¹⁰Kuti mu zhuba le buzhanakadzi ayise njiba mbili kene ngurukukwana mbili ku mpirisiti ku nkoba we nshasha we bushanganilo.

¹¹Ngono mpirisiti unoyisa imwe ili tjibhayilo tje tjibi imwe ili tjibhayilo tjinopisiwa kunthamila gadzano, ngobe akathama tjibi nge itumbu. Ngono kudwa mu zhuba ilelo atjenapadze nsholo uwe.

¹²Ngono azwipe kuna Yahwe mu mazhuba awe e kuzwipa ali Nnaziri, abe eyisa pkhwizana ina gole ling'ompela ili tjibhayilo tje nlandu, koga misi ye kutanga ikanganike, ngobe kuzwipa kukwe kwakabe kwatemapala.

¹³“ ‘Oyu ndiwo nlayo we Nnaziri, ha misi ye kuzwipa kukwe yawila, ayisiwe ku nkoba we nshasha we bushanganilo.

¹⁴Abe eyisa tjipo tjitje kuna Yahwe, ili pkhwizana ndume ina gole ling'ompela isina bulema kube tjibhayilo tjinopisiwa, ne pkhwizana hadzi ina gole ling'ompela isina bulema kube tjibhayilo tje tjibi, ne nyundo ing'ompela isina bulema kube tjibhayilo tje mbakisano.

¹⁵Aduse itundu tje zwiwunga zwisina mbidzo, ne makhekhe e bgwisa gwakanathiwa gwakashanganyiwa ne mafuta ne makokisi akabhomwa mafuta, ne tjipo tje mathunde ne tje tjing'o.

¹⁶Mpirisiti unoyisa zwibhayilo mbeli kwa Yahwe, ebe eyisa ne tjibhayilo tje tjibi ne tjibhayilo tjinopisiwa.

¹⁷Mpirisiti unoyisa tjibhayilo tje nyundo kuna Yahwe tjili tjibhayilo tje mbakisano, nenge itundu tje zwiwunga zwisina mbidzo, ne tjipo tje mathunde ne tje tjing'o.

¹⁸Nnaziri unowotesela nsholo uwe wakazhodziwa pa nkoba we nshasha we bushanganilo kudwa ipapo unowopisila mavudzi awe mu moto ukusi kwe tjibhayilo tje mbakisano.

¹⁹“ ‘Mpirisiti atole bhandabuko le nyundo lakabhikwa ne tjiwunga tjing'ompela tjisina mbidzo mu itundu ne kokisi ling'ompela, azwitshitshe Nnaziri, shule kwe asinobe atesegwa mavudzi awe e kutjenapala.

²⁰Mpirisiti unozunguza tjibhayilo mbeli kwa Yahwe tjowobe tjibhayilo tjazunguziwa tja Yahwe, i gobe lakayengemala le mpirisiti, unozwipiwa ne ifuba ne tjidzwa se zwili zwakafanila mpirisiti, shule kwa ipapo Nnaziri ungang'wa nkumbi we zhambi.

²¹“ ‘Oyu ndiwo nlayo we Nnaziri unobe atuna. Kudusila Yahwe tjibhayilo kwakafanila yendidzana ngotuna kukwe se Nnaziri, kuzhe kwe tjimwe tjaangatubula, wakafanila shingikadza kutuna kukwe kuyendidzana nge nlayo we kuzwipa kukwe ali Nnaziri.’ ”

²²Yahwe bakadwa Mushe beti

²³alebeleke na Aroni ne bakololo babe bakombolele bathu be Iziraela nge matama anoti,

²⁴“Yahwe bakukombolele bakutjengete:

²⁵Yahwe bakupenyesele buso gwabo, bakuhwile ngoni:

²⁶Yahwe bakubige tjiso, bakupe kunyalala.”

²⁷Yahwe bakabe beti, “Ndizo ha beleba zina langu belileba lili gombolelo mu bathu be Iziraela, ndowobakombolela.”