Read Kalanga Mbalo 8 Bible Online

Mbalo 8 - Kalanga bible

Mbalo 8

¹Yahwe bakadwa Mushe bakati,

²“Idwa Aroni abige mavone, ali kutendeka avoneke mbeli kwe tjigadziko tje mavone.”

³Ngono Aroni kathama eijalo, kagadza mavone atjo kuvoneka mbeli kwe tjigadziko tje mavone Yahwe sekwa badwa Mushe.

⁴Oku ndiko tjigadziko tje mavone sekwa tjakabe tjithamwa ndiko, golide yakabe ithugwa kudwa mu bhato latjo kunoti ku thabi dzatjo, kuyendidzana nge mbiko Yahwe yabakalakidza Mushe.

⁵Yahwe bakadwa Mushe bakati,

⁶“Tola Balevi pakati kwe bathu be Iziraela, ubatjenapadze.

⁷Ngono ubathame sahwoku kubatjenapadza, ubanyase nge vula yakayengamala inotjenapadza, babe bezwitesela mbili wose, babe besuka zwiambalo zwabo. Ngono banowobe batjenapala.

⁸Kudwapo babe betola nkong'wana ne tjipo tje mathunde tje bgwisa gwakanathiwa gwakashanganyiwa ne mafuta, ne mmwe nkong'wana we tjibhayilo tje tjibi.

⁹Ngono uzhise Balevi mbeli kwe nshasha we bushanganilo, ube ukubunganya gubungano lose le bathu be Iziraela,

¹⁰kuti wazhisa Balevi mbeli kwa Yahwe, bathu be Iziraela babige maboko abo pezhugwi kwe misholo ye Balevi,

¹¹Aroni abe ezhisa Balevi mbeli kwa Yahwe, kube tjipo tjinozunguziwa tjidwa mu bathu be Iziraela, kuti babe bathu banoshinga nshingo wa Yahwe.

¹²Ndizo Balevi babe bebiga maboko abo pezhugwi kwe misholo ye mikong'wana mibili. Ngono unowobe udusa mmwe kube tjibhayilo tje tjibi, mmwe kube tjibhayilo tjinopisigwa Yahwe, kuthamila Balevi gadzano na Yahwe.

¹³Umise Balevi mbeli kwa Aroni ne bakololo babe, ube ubayisa se tjipo tjikazunguziwa kuna Yahwe.

¹⁴“Nge zila iyeyi dusila Balevi ntome mu bathu be Iziraela, ngono Balevi banowobe bangu.

¹⁵Shule kwe basinobe babigwa, banongina bakashinga nshingo we nshasha we bushanganilo, ha wabatjenapadza ubuya ubadusa bali tjipo tjikazunguziwa.

¹⁶Ngobe ndabapiwa nge buzhalo bedwa mu bathu be Iziraela, mu bumo gwe mbano dzose dze bathu be Iziraela, ndazwitolegwa ibo.

¹⁷Ngobe mbano dzose dze bathu be Iziraela nge dzangu, dzose dze bathu nenge zwithuwo. Mu zhuba landakabulaya mbano dzose mu shango ye Egipiti, ndakazwishalulila idzo.

¹⁸Ngono ngwenu, ndatola Balevi mu bumo gwe mbano dzose dze bathu be Iziraela.

¹⁹Ndatola Balevi mu bathu be Iziraela ndibalonga mu maboko a Aroni ne bakololo babe, kushingila bathu be Iziraela mu nshasha we bushanganilo ne kuthamila bathu be Iziraela gadzano na Yahwe, kuti kusitongobe ne tjiga tjingawila bathu be Iziraela, ha bathu be Iziraela bangasedzela pejo ne bugalo gwakayengemala.”

²⁰Mushe, na Aroni ne gubungano lose le bathu be Iziraela, bakashingila Balevi kuyendidzana ne tjakalauligwa Mushe ndi Yahwe.

²¹Ngono Balevi bakazwitjenapadza mu tjibi, bakasuka zwiambalo zwabo, Aroni kabayisa bali tjipo tjikazunguziwa mbeli kwa Yahwe, ngono Aroni kabathamila gadzano na Yahwe kubatjenapadza.

²²Ndizo Balevi bakangina mu nshingo wabo mu nshasha we bushanganilo bali mu ndaulo ya Aroni ne bakololo babe seleba kwa Yahwe kuna Mushe ngekwe Balevi.

²³Yahwe bakadwa Mushe bakati,

²⁴“Etji nditjo tjakalingisana ne Balevi: Kudwa muna bana makole ali makumi mabili ana ali mashanu (25) ne bawola pabali banowoshinga nshingo mu nshasha we bushanganilo,

²⁵ngono kudwa muna be makole ali makumi mashanu (50) baletje nshingo basitjashinge.

²⁶Shule kwa ipapo, bangabhatsha Balevi banowobe bali mu nshingo mu nshasha we bushanganilo, ibo basingashinge. Ndiko sekwa unowothama ngekwe Balevi mu kubapa nshingo.”