Read Kalanga Mika 1 Bible Online

Mika 1 - Kalanga bible

Mika 1

¹Dama la Yahwe lakazha kuna Mika we Moresheti mu mazhuba e kubusa kwa Jothamu ne muna a Ahazi ne a Hezekiya bomambo be Juda, ili mbono yaakabona ngekwe Samariya ne Jerusalema.

²Ihwani imwi bathu, imwi mose teedzani, shango nakose ku muili, muletje She Yahwe batendeke nge kwenyu, She betendeka kudwa mu ng'umba yabo yakayengemala.

³Ngoti bonani, Yahwe banozha bedwa mu magalo abo, banodeluka bebe betshamba magalo apezhugwi e shango.

⁴Ipapo matombo anowonyawuka kusi kwabo, mikuku iyo ikakwamuka se phola ipejo ne moto ikanga vula inowunga pakakunguluka.

⁵Kose ikoku kodang'wa nge kutjuluka nlayo kwa Jakubo, ne ngekwe zwibi zwe nsha wa Iziraela. Kutjuluka nlayo kwa Jakubo ini kene? Apa ate ili Samariya kene? Magalo akamilika e Juda ini kene? Apa ate ili Jerusalema kene?

⁶Ndizo wali ndowothama Samariya duluthulu le malala, unowobe pathu panolimiwa mizhambi. Ndowotebulila mabgwe awe mu nkuku ngono asiya thiwa iye ili patjena.

⁷Midzimu iye ye zwifano inowovunanyiwa ikabe zwitibhutibhu, mibhayilo iye yose inowopisiwa nge moto, midzimu iye yose ye zwifano ndowoyipkhwanya. Se akakubunganya zwipo zwizwe kudwa mu mibhayilo ye fukula, zowoshingisiwa koga se mibhayilo ye fukula.

⁸Ngekwa ikoku ndowolila abokolela, ndowoyenda ndisakaambala shangu ndakati piti. Ndowolila se phungubgwe, abubula se fukumudzi.

⁹Ngoti banga lile ate linopodziwa, kwakazha ku Juda, kwakaswika ku nkoba we bathu bangu, ku Jerusalema.

¹⁰Musitongo kuleba mu Gati, musilile tjoselele. Mu Beti Leafura mubumbuluke mu hwuluba.

¹¹Pindani muyende muli mbujo makabhakhwa nge shoni imwi bagali be Shafiri, bagali be Zaanani ibo abatowobhuda mu nzi wabo. Beti Ezele iyo imu tjililo, mbakililo yayo yadusiwa mu muli.

¹²Ngoti bagali be Maroti bakalindila tjakanaka nge moyo nlefu, ngoti mbatsha dzabawila dzidwa kuna Yahwe, dzikaswika ku nkoba we Jerusalema.

¹³Sungililani mbizi mu koloyi dze ngwa imwi bagali be Lakhishi. Ndimwi batangisi be tjibi, ku nkololokadzi we Ziyoni, ngoti bupanduki gwe Iziraela gwakawang'wa mu muli.

¹⁴Ndizo mowodusila Moresheti Gati zwipo zwe kuwonekana ikoko. Bathu be Akizibu banowobe mapitipiti kuna bomambo be Iziraela.

¹⁵Ndowozhisa nkundi kakale ku muli imwi bagali be Maresha. Iye gudzo le Iziraela unowozha ku Adulamu.

¹⁶Teselani misholo mu tjililo, mulilila bana benyu bamunoshathila, muzwithame mapalo musale munga gola nge kuti banowotapiwa kudwa mu muli.