Read Kalanga Mika 2 Bible Online

Mika 2 - Kalanga bible

Mika 2

¹Yee mme wee! Bapalala ibo banoluka maano e bubi, ibabo banoluka maano e mbipo bali mu malalo abo! Nge mazhokuyedza banowobe bekushingikadza ngoti kumu simba labo.

²Banoyemula shango bebe bedzitapa, ne ng'umba bebe bedzitapa. Banotshambilidza nlume ne nsha uwe, bentolela thaka iye.

³Ndizo wali Yahwe bakati, “Ndizo ngwenu ndolongolosa tjakabipa kutjithamila bathu ibaba, tjamusingowotubula kuzwitjidza mutjili. Amutjawo yendayenda muzwikudza, ngoti tjowobe tjili tjibaka tjakabipa.

⁴Mu zhuba ilelo banowomba lumbo gunokudadila, belila nge tjililo tjinogwadza beti, ‘Iswi tathukudzika tjose, thundu ye bathu bangu yakobanyiwa. Yahwe bayitola mundili! Shango yedu bayikobela batapi bedu.’ ”

⁵Ndizo wali amutjowobe ne mmwe mu gubungano la Yahwe unokoba shango nge kukandila.

⁶Banoti, “Musilebesembeli, musilebesembeli ngekwe zwithu izwezwi, mabhatisashoni haangati wile.”

⁷Apa ikoku kungalebgwa imwi, ng'umba ya Jakubo, “Apa Meya ya Yahwe aina moyo nlefu kene? Apa mishingo iyeyi nge yabo kene? “Apa matama angu aatothama tjakanaka, kuna umu zila yakatambunuka kene?

⁸Koga bathu bangu mobamukila se tjita, mombula hazu muna bana kunyalala muna ibabo banopinda nge kugalabgwe basina nkumbulo we ngwa.

⁹Betjikadzi be bathu bangu, mobatata mu ng'umba dzabo mbuya. Modusa gudzo langu mu bana babo nge kusingapele.

¹⁰Milikani muyende, ngoti ipapa ate pali pathu pe kunyaluluka ngekwe kutemapadza nge golomodzo linokolomodza kwakabangalala.

¹¹Ha nnyepi unotjebela angazha eti, ‘Ndowomugadzabgwe nkumbi ne busukwa,’ ndiye unowobe nlebesambeli we bathu ibaba!

¹²“Nge malebeswa ndowomukubunganya mose, iwe Jakubo, nge malebeswa ndowokubunganya malimbelimbe e Iziraela. Ndowobakubunganya se pkhwizi mu danga, se ngubi mu mafulo, kowobe zhoba ye mbunga we bathu.

¹³Iye unothuka unowobatungamila, banowothuka pa nkoba bakabhuda. Mambo wabo unowopindila mbeli kwabo, Yahwe ibo banowobe nsholo wabo.”