Read Kalanga Mika 3 Bible Online

Mika 3 - Kalanga bible

Mika 3

¹Ngono ndakati, “Ihwani woku imwi batungamili ba Jakubo, imwi babusi be bathu be Iziraela. Apa ate kulikwenyu kuziba kutambunuka kene?

²Imwi munobenga tjakanaka ngono mukada tjakabipa, imwi muno mwawula ganda le bathu bangu, ne nyama muyimwawula mu mafupa abo,

³imwi munoja nyama ye bathu bangu muviya ganda labo mulisundula mubali, muvunilila mafupa abo ebe zwitibhutibhu mubatemelela semunoti i nyama inolongwa mu ikajana, se nyama inolongwa mu hali.”

⁴Ngono ipapo banowolilila Yahwe koga abatowobadabila. Banowobasumbikila buso gwabo mu tjibaka itjetjo ngekwe bubi gwabakashinga.

⁵Yahwe bakati ngekwe balebesambeli banotungamilila bathu bangu ntome, belebeleka beti, “Kunyalala,” bedwa wabapa tjinojiwa, koga usabapa tjinojiwa bebe belulwamisila kugwa naye.

⁶Ndizo wali kowobe busiku kumuli gusina mbono, zhalima lowobe mu muli lisina ndakidzo. Zhuba lowomilila balebesambeli, ngono masikati anowobatundubalila balebesambeli.

⁷Baboni banowolengudzika, bakandili banowobhakhwa nge shoni, bose koga banowozwimba njiso dzabo ngoti kusina dabilo kudwa ku Ndzimu.

⁸Koga imi ndizhele simba, nge Meya ya Yahwe ne kutambunuka ne masimba kubudza Jakubo bupanduki gugwe, kubudza Iziraela tjibi tjitje.

⁹“Ihwani woku imwi batungamili be nsha wa Jakubo, imwi babusi be bathu be Iziraela banoshima kutambunuka, mube muleyanya kose kwakatambunuka,

¹⁰imwi munobaka Ziyoni ngotebula malopa, mubaka Jerusalema nge mbipo.

¹¹Babusi bayo banosumikilisila tjizwimba nlomo, bapirisiti banodiyila themba, ne balebesambeli bayo banokandila bebona mari. Koga benayila Yahwe bebe beti, ‘Apa Yahwe abateli pakati kwedu kene? Akuna mbatsha dzingatiwila.’

¹²Ndizo wali nge kwenyu Ziyoni inowolimiwa se nnda, Jerusalema inowobe duluthulu le malala duthu le ng'umba ye Ndzimu likabe datha lakamela ishakana.”