Read Kalanga Mika 4 Bible Online

Mika 4 - Kalanga bible

Mika 4

¹Mu mazhuba e bupelo dombo le ng'umba ya Yahwe lowothumbidziwa lili ilo lefu kupinda matombo mamwe, lowomilidzigwa pezhugwi kwe matuthu, ngono bathu banowokulumukila kulili.

²Njudzi njinji dzowozha dziti, “Buyani ngatiyendeni ku dombo la Yahwe, ku ng'umba ye Ndzimu wa Jakubo, kuti utidiye zila dzawo, kuti tiyende mu zijana dzawo.” Ngoti nlayo unowodwa mu Ziyoni, dama la Yahwe lowodwa mu Jerusalema.

³Unowogadzanya njudzi njinji, bakapedzisa kunyanyayidza pakati kwe njudzi dzakasima dza kule. Banowothula makanu abo bethama zwikara zwe mapadza ne mathumo abo bethama mipanga inosunulila. Ludzi agutowosengela gumwe ludzi bukanu, naiko abatowozwidiya ngwa kakale.

⁴Mmwe ne mmwe unowogala kusi kwe nzhambi uwe na kusi kwe mpaya uwe ngono akuna ungabatjisa ngoti Yahwe Masimbawose balebeleka.

⁵Ngoti bathu bose mmwe ne mmwe unoyenda nge zina le ndzimu uwe, koga iswi towoyenda nge zina la Yahwe Ndzimu wedu nge kusingapele.

⁶Yahwe bakati, “Mu zhuba ilelo ndowokubunganya banoshudza, ndika kubunganya batapiwa naibabo bandakalonga mu buyendasi.

⁷Banoshudza ndowobathama malimbelimbe, ibabo bakabe balashigwa kutjena ndowobathama ludzi gwakasima. Yahwe banowobusa pakati kwabo mu Dombo le Ziyoni kudwa mu zhuba ilelo kuyenda nge kusingapele.

⁸Ngono ngekuko iwe ngadzi ye ngubi, iwe duthu le nkololokadzi Ziyoni, mbuso wakabe uli uwo kutanga unowobuziwa ku kuli, bumambo gowozha ku nkololokadzi we Jerusalema.”

⁹Ini ulila zwingapa ngwenu wali? Apa akuna mambo mukuli kene? Nkumbuludzi uwo wakafa kene, kwawungabe wakamanukigwa se nkadzi ali mu zwibhayo?

¹⁰Zhaligwa ugomele se nkadzi ali mu zwibhayo iwe nkololokadzi we Ziyoni ngoti ngwenu unowobhuda mu nzi unokotokela mu shango yakaashama, unowoyenda ku Bhabhiloni. Ikoko unowosunungugwa. Yahwe banowokudzutunula mu maboko e zwita zwizo.

¹¹Njudzi njinji dzakukubunganila kubhayana nawe, dzoti, “Letjani atemapale iswi tipembelele Ziyoni.”

¹²Koga abatoziba njalakang'wa dza Yahwe, abatohwisisa ndongoloso yabo, iye unobakubunganya se zwiyako pa lutombo.

¹³“Milika ushokole iwe nkololokadzi we Ziyoni, ngoti ndowokupa nyanga dze butale, ndowokupa thozo dze phangula ngono unowokwiya njudzi njinji.” Unowopa Yahwe mbuyilo dzabo dzakawang'wa nge bubi, fumwa yabo yose unowoyipa She we shango yose.