Read Kalanga Mika 5 Bible Online

Mika 5 - Kalanga bible

Mika 5

¹Iwe nzi nkulu we babhayani, kubunganya babhayani babo ngoti takombiwa nge ngwa, banowoloba mbusi we Iziraela mu lushaya nge lukombo.

²Koga iwe Bhetelehema Efurati, iwe mmwe we batukununu pakati kwe misha ya Juta, mukuli kowondidwila mmwe unowobe mbusi mu Iziraela, kutangisa kukwe kodwa ntolo, kudwa mu misi ya ntolotolo.

³Ndizo wali Yahwe banowobasiya kuswikila tjibaka tjinowoti umu zwibhayo katshibama, ipapo bana ba mmeyabe bakasala banowobuya kushangana ne Baiziraela.

⁴Ngono unowomilika kafudza ngubi iye mu simba la Yahwe, nge bukulu gwe zina la Yahwe Ndzimu uwe. Ngono dzowotjila dzakasununguka, ipapo bukulu gugwe gowoswika ku phelelo dze shango.

⁵Ngono unowobe kunyalala kwabo. Asiriya ha ithukila mu shango yedu, bebe betshamba bepalama mbako dze matizhilo edu, towobamusila balisi bali kutendeka kubhayana nabo, ne batungamili bali zhanakadzi.

⁶Banowobusa shango ye Asiriya nge thumo, shango ya Nimirodi nge thumo. Unowoti sunungula mu Baasiriya pabanowobe bethukila mu shango yedu, betshamba bengina mu migathu yedu.

⁷Ipapo malimbelimbe a Jakubo anowobe pakati kwe bathu banjinji se khawa inodwa kuna Yahwe se masusu e vula mu bushwa, zwisingamilile nthu, kene kulindila bathu.

⁸Malimbelimbe a Jakubo anowobe pakati kwe njudzi pakati kwe bathu banjinji, se shumba pakati kwe phuka dze ishaka, se shumbana pakati kwe ngubi dze pkhwizi ha idzipalama inomwandawula ikamwawulanya, ngono kusina ungadzigwila.

⁹Tjiazha tjitjo tjowokunda zwita zwizo, ngono zwita zwizo zose zowolobesiwa.

¹⁰Yahwe bakati, “Mu zhuba ilelo, ndowobulaya mbizi dzenyu pakati kwenyu ndibe ndikolomodza koloyi dzenyu dze ngwa.

¹¹Ndowokolomodza mizi mikulu ye shango yenyu ndibe ndiliga mbako dzose dzenyu dzakasima.

¹²Ndowolobesa buloyi gwenyu amutjowobe mungalowa.

¹³Ndowophkwanya zwifano zwenyu zwakabezhiwa ne zwe phanda, amutjowobe mutjathigamila mishingo ye maboko enyu.

¹⁴Ndowoshomola midzimu yenyu inoyi Ashera ndiyidusa pakati kwenyu, ndibe ndikolomodza mizi yenyu mikulu.

¹⁵Ndowobgwilizila njudzi dzisakandihwa nge bushongola ndakagwadzamoyo.”