Read Kalanga Mika 6 Bible Online

Mika 6 - Kalanga bible

Mika 6

¹Ihwani tjinoleba Yahwe, “Milika ubige ndebo iyo mbeli kwe matombo, uletje matuthu ahwe hwi lilo.

²Ihwani ndebo ya Yahwe imwi matombo, imwi thiwa dze shango dzigelile tjose. Ngoti Yahwe bana ndebo ne bathu babo, banowoseka ne Iziraela.

³Imwi bathu bangu kanti ndathamani kumuli? Ndamudziyidza ngeni kene? Mundidabile.

⁴Ngoti ndakamudusa mu shango ye Egipiti, amusunungula mu shango ye bulanda. Ndakatuma Mushe kumutungamila na Aroni na Miriyamu.

⁵Bathu bangu, kumbulani Bhalaki mambo we Moabu tjaakakumbuludza kuti tjishingwe nenge kuti Bhalamu nkololo wa Bheori wakashandula eitini. Kumbulani gwendo gwenyu kudwa ku Shitimu kuyenda ku Giligala, kuyita kuti muzibe mishingo ye ndulamo ya Yahwe.”

⁶Ndowozha ndakabhatani mbeli kwa Yahwe ndithigama mbeli kwe Ndzimu upezhugwi kwakose? Apa ndizhe mbeli kwabo ne zwibhayilo zwinopisiwa kene? Ndizhe ne phulu dzina gole ling'ompela kene?

⁷Apa Yahwe banowoshathisiwa nge nyundo dzili zwiwulu nenge njizi dze mafuta dzili zwiwulu zwili gumi kene? Apa ndiduse mbano yangu tjibhayilo tje jinyo langu kene, ntjelo we mbili wangu ndiwudusila tjibi tjangu kene?

⁸Bakakulakidza iwe nthu kuti tjakalulwama nditjipi, ne tjinoshakwa ndi Yahwe mu kuli. Banoshaka kuti ushinge tjakatambunuka ude ngoni ne kutjila nge kuzwiyisa pasi nge Ndzimu uwo.

⁹Hwi la Yahwe lodana nzi nkulu, kutja zina lenyu ndigo butjenjedu “Ihwani imwi ludzi ne gubungano!

¹⁰Apa ndingakangang'wa kene iwe ng'umba ye mbipo, ndingakangang'wa fumwa yakawang'wa nge bubi ne tjilizanyo tjitukununu tjina bhiso kene?

¹¹Apa ndingaletjedza nthu una tjiyelo tjisiitjo, una hwomo inotjebela kene?

¹²Bafumi babe banotolela nge simba bathu babe banyepi ndimi dzabo dzoleba kutjebela.

¹³Ndizo wali ndatangisa kumubulaya, kumuthukudza ngekwe zwibi zwenyu.

¹⁴Mowoja koga amutowoguta, mitumbu yenyu inowobe isina tjimwe zwayo. Mowokubunganya koga akuna tjamungabiganya, ngoti tjamunobiganya ndowotjipa thumo.

¹⁵Mowodzwala koga amutowovuna, mowothama mafuta koga mukasiazhole, mowoswina zhambi koga mukasing'we nkumbi wadzo.

¹⁶Makalondolodza milayo ya Omiri ne zwiyito zose zwe nsha wa Ahabu ngono mukatobela zwilenje zwabo. Ndizo wali ndowomuletjedza mukathukudzika, ne bathu benyu banowolengudzika, mowobhabhana ne kudada kwe njudzi.”