Read Kalanga Mika 7 Bible Online

Mika 7 - Kalanga bible

Mika 7

¹Ndadziyila seni! Ndonga nthu unoshaka mitjelo ye tjilimo shule kwe kunungwa kwe zwakasala kuvung'wa, akuna zhambi dzandingaja akuna phaya dzinobidwa dzandinoshaka.

²Bagalimoyo bakapela mu shango, akuna ne nng'ompela wakatambunuka wakasala. Bathu bose banolalila kutebula malopa, mmwe ne mmwe unovima mwana wa tate babe nge gwanga.

³Maboko abo ana bunyambi kushinga mbipo, mbusi unoshaka zwipo, nsumikilisi unoamutjila tjizwimbanlomo, bana masimba banokombeledza kuwana tjabanoshaka, ndizo banolangana.

⁴Wakalulwama kupinda bamwe mubali unonga kungubo, wakatambunuka nge buzhalo unonga bhakasa le mihwa. Zhuba le balindi benyu lazha, zhuba Ndzimu launomukumba. Ngwenu tjibaka tje kuhwumana.

⁵Usitongo galabgwe mu mbakidzani, usigalemoyo mu nzwalani, kene ali ihwoyu waunolala wakan'gumbatila, uyele njele matama awo.

⁶Ngoti nkololo unolengudza tate babe, nkololokadzi kamukila mmeyabe, nlongo kamukila mezwale babe, zwita zwe nthu nge be nsha uwe.

⁷Koga nge kwangu, ndolinda kuna Yahwe, ndolindila Ndzimu Ntjidzi wangu, Ndzimu wangu unowondihwa.

⁸Usipembele nge kwangu iwe tjita tjangu, ha ndiwa, ndowomuka. Ha ndigala mu zhalima, Yahwe banowobe tjedza tjangu.

⁹Ndowodzikatidzila kugwadzamoyo kwa Yahwe ngoti ndakabatjinyila, kuswikila bepedza ndebo yangu bebe bepedza kundisumikilisa. Banowondizhisa mu tjedza, ndowobona kusunungula kwabo.

¹⁰Ipapo zwita zwangu zowobona, ngono unowobhakhwa nge shoni iye wakandidwa eti, “Ungayi Yahwe Ndzimu uwo?” Ndowobona apembela nge kukwe, nangwenu wali unowotshambiwa nge makumbo se dope mu zila.

¹¹Zhuba le kubaka makuma awo lowozha, zhuba le kutalabudza migathu iyo.

¹²Mu zhuba ilelo banowozha ku kuli bedwa ku Asiriya ne ku mizi ye Egipiti ne kudwa ku Egipiti kunoti ku gwizi gwe Yufuratesi ne ku gungwa ne kudwa ku dombo kuyenda ku dombo.

¹³Koga shango inowothukudzika ngekwe bagali bayo, ngekwe mbhayilo we mishingo yabo.

¹⁴Lisa bathu babo nge ludozo gugo, ngubi ye thaka iyo iyeyi inogala yoga mu ishaka mu shango ye mafudzilo akakola. Uletje dzifule mu Bhashani ne mu Giliyadi kube se mazhuba a ntolo akapinda.

¹⁵“Sekwa kabe iko mu mazhuba amakabhuda mu Egipiti, ndowobalakidza matjenamiso angu.”

¹⁶Njudzi dzowobona dzikabhakhwa nge shoni, dzikapelegwa nge simba, banowobhata milomo yabo ngono bakabe bomatshi.

¹⁷Banowonazwa hwuluba se nyoka, se zwibumbiwa zwinosoba pasi. Banowozha betetema bebhuda mu matizhilo abo, banowoshandukila kuna Yahwe Ndzimu wedu nge kutja ngono banowomutja.

¹⁸Ndiwupi Ndzimu unonga imwi, unozwiibhatigwa jinyo ukazwiibhatigwa kutjuluka nlayo kwe malimbelimbe e thaka yawo? Amutogala makagwadzamoyo koga moshathila kuhwila ngoni.

¹⁹Imwi mowobe nge mahwilongoni kakale ku tili, mowotshamba zwibi zwedu nge makumbo, mukalashila matjinyo edu mukatikati kwe gungwa.

²⁰Mowolakidza Jakubo malebeswa, ne ludo gusingapele kuna Abhurahama, sekwa makatuna kuna bobatategulu bedu mu mazhuba a ntolo akapinda.