Read Kalanga Nahumu 1 Bible Online

Nahumu 1 - Kalanga bible

Nahumu 1

¹Dama ngekwe Ninive. Lukwalo gwe mbono ya Nahumi we ku Elikoshi.

²Yahwe Ndzimu una fupa kakale unobgwilizila, Yahwe banobgwilizila, bazhele bushongola, Yahwe banobgwilizila zwita zwabo, mu kugwadza moyo kwabo banobhayana ne zwita zwabo.

³Yahwe abatotjimbidza gwadzamoyo kakale bana masimba makulu, abangaletje una nlandu asalobgwa shamu. Zila yabo imuna tjampupudze ne mu dutu, makole i hwuluba ye makumbo abo.

⁴Banotjemela gungwa bakathama kuti lipkhwe, banopkhwisa njizi dzose. Ku Bhashani neku Karimeli kobuna, ne maluba e Lebanoni anowoma.

⁵Mbeli kwabo matombo anotengenyeka, matuthu kanyawuka, shango inomilidzika pabalipo ne lubumbo na bose banogala mu guli.

⁶Ndiani ungamidzana nge bushongola gwabo kene? Ndiani ungadzikitadzila kugwadzamoyo kwabo kunotjisa kene? Bushongola gwabo gotebuka se moto, shongwe banodzipkhwanya dzikabe zwikwetjekwetje.

⁷Yahwe bakalulwama, ndibo dizhilo mu misi ye zwinodziyidza. Banobakilila ibabo banogalabgwe mubali,

⁸koga nge nkubila unokuba banowozhisa ku bhelelo zwita zwabo, banowolonda zwita zwabo mu zhalima.

⁹Tjimwe kene ilini tjamungalanganila Yahwe, banowotjilobesa, akuna tjita tjinowomuka kakale.

¹⁰Banonga matenjana e mihwa akapombana, bakanga zwilaladzi zwang'wa, banowopisiwa se malala e bushwa akawoma.

¹¹Mukuli iwe Ninive kwabhuda mmwe, unolukila Yahwe gwanga ekumbuludza nge bubi.

¹²Tjinolebgwa ndi Yahwe etji, “Nakuto bakasima kakale bali banji, banowolobesiwa bakasibepo. Juda, nenguba ndakakuhwisa zogwadza, anditjowokuhwisa zogwadza kakale.

¹³Ngwenu wali ndowovuna jokwi limu mitshibha yenyu ndibe ndithubula mitjili yakamusunga.”

¹⁴Yahwe bakadusa nlayo nge kuko Ninive beti, “Zina lilo alitjowobepo nge kusingapele. Ndowokolomodza midzimu yakabezhiwa ne yakabumbiwa imu ng'umba ye midzimu iyo. Ndowolulwamisa ikumbu tjitjo ngoti auteli we tjimwe.”

¹⁵Bonani, pezhugwi kwe matombo makumbo e thumwa inozhisa ndebo mbuya, unoleba ngekwe mbakiso! Zana mizano iyo iwe Juda, ushinge tjawakatuna kutjishinga. Babiibi abatjowofa bakunginilila kakale, banowolobesiwa.