Read Kalanga Nahumu 2 Bible Online

Nahumu 2 - Kalanga bible

Nahumu 2

¹Mpaladzi waswika kuwobhayana nawe Ninive. Linda mbako dze matizhilo, tjengeta zila usunga thunji dzidzo ushingise matatabuko awo wose!

²Ngoti Yahwe banowobuza mu tjimo gudzo la Jakubo se gudzo le Iziraela, nenguba bathukudzi bakabathukudza bakatjinya mizhambi yabo.

³Zwivikisi zwe babhayani babe zwishaba, bagwi babe bakambala zwiambalo zwishaba kwakabondelela. Koloyi dzidze dze ngwa dzopenya mu zhuba ladzalulwamisigwa ngwa, ne mathumo anokuswiwa.

⁴Koloyi dze ngwa dzolabuka dzizhala zila, dzovirima dziyenda yeno na yeno mu zwibata. Dzolingika se mithuto ye mavone, dzilabuka se lupenyo gwe vula.

⁵Unodana batungamili babo, banotshatsharika abezha kwabadang'wa. Banolabukila ku guma, ndizo tjidzibili tjibe tjibigwa pakalingisana.

⁶Mikoba ye njizi ikazhuka, ngono nzi we bumambo ukapela masimba.

⁷Nlayo wadwa wekuti nzi utapiwe, balandakadzi bawo basengwe, belila se njiba bakabhata hana dzabo.

⁸Ninive inonga dziba, ngono vula yalo ipkhwa. Mmwe unodana eti, “Imani! Imani!” Ngono kube kusheta unoshanduka.

⁹Tapani siliva! Tapani golide! Fumwa izhele ipapa! Kuzhele tjimwe ne tjimwe tjakanaka!

¹⁰Ninive yakashakadziwa ikatapigwa, ikakolomogwa! Moyo inotimbama, zwidwi zwikatetema, thunji dzose dzozunguzika njiso dzose dzofubala.

¹¹Lingayi ngwenu wali guwu le shumba pabakabe bejisila bana babo? Pangayi pakabe peyendayenda shumba ne shumbakadzi ne shumbana kusina tjadzinotja?

¹²Shumba yakamwawulanya kwakalizana bana bayo ikasina tjayakabhata kupa shumbakadzi yayo. Yakazhadza makuwu ayo nge zwayakabulaya ne makuhwana akazhala.

¹³Yahwe Masimbawose bakati, “Bona, ndobhayana nawe. Ndowopisa koloyi dzidzo dzose nge moto thumo nayilo lowoja shumbana dzidzo. Akuna tjandinowokusiyila tjawungabulaya mu shango. Mahwi e thumwa dzidzo aatowohwika kakale.”