Read Kalanga Nahumu 3 Bible Online

Nahumu 3 - Kalanga bible

Nahumu 3

¹Yee mme wee! Wapalala iwe nzi nkulu uzhele kutebula malopa, uzhele manyepkhwa usingapedze kutapila.

²Kuphutuka kwe zwimi ne zhoba ye makumbgwana, kumatha kwe mbizi ne kugongorodza kwe koloyi dze ngwa!

³Bataswi be mbizi banonginilila ngwa makanu anonga lupenyo ne mathumo anopenya, migwi ne migwi ye bafi, zwitumbu zwikatiliyana, bafi basina mbalo, bathu betatha bekuthiwa nge zwitumbu.

⁴Ngoti nge bufukula gwe fukula ikwekweredza, ili nyambi ye buloyi, inothama njudzi balanda nge bufukula gwayo bathu bose ibathama balanda nge buloyi gwayo.

⁵Yahwe Masimbawose bakati, “Ndobhayana nawe, ndowomilidza thako iyo akukwididza ndiyo. Ndowolakidza njudzi mbujo iyo, mibuso ndowoyilakidza shoni dzidzo.

⁶Nasha nge shambgwa, ndowokulengudza akuthama tjiyeye.

⁷Bose banowokubona banowokutizha bebe beti, ‘Ninive yabe matongo, ndiyani unowoyililila? Ndingayi kwandingawana mmwe ungayinyaladza?’ ”

⁸Apa unoyita pana Thebesi yakabakwa mu Naili yakapotelekwa nge vula kene? Gwizi gwakabe guli igo n'gwili wayo vula ili iyo guma layo.

⁹Khushi yakabe ili simba layo, Egipiti naiyo bo nge buzhalo, Puti ne Libhiya naidzo dzakabe dzili babhatshi bayo.

¹⁰Nenguba kwakajalo yakatapiwa ikayenda kubutapiwa. Ngawana dzayo dzakapkhwanyigwa pasi mu mapelelo e zila imwe ne imwe, Hakata dzikakandila batungamili babo, ngono bose bayo be mamo bakasungwa nge ketani.

¹¹Nawebo unowolaladza, unowotizha ukanobgwata ukashaka matizhilo mu zwita.

¹²Mbako dzidzo dzose dze matizhilo dzowonga mipaya ina phaya dzayo dze kutanga kubidwa, ha izunguziwa phaya dzowila mu nlomo we n'ji.

¹³Linga babhayani babo, bose mukati kuko bakadzi! Mikoba ye shango iyo yakazhukila zwita zwizo, moto wakapisa phanda dzayo.

¹⁴Tjela vula ngoti mowokombiwa nge ngwa, simisa matizhilo awo! Ngina mu vu, sinyanga vu, bhata foromu uyishingise!

¹⁵Moto unowomuja ikoko, bukanu gowomutemela pasi ngono gowomupedzisa se phashu. Wandani se phashu, muwande se phashu!

¹⁶Wakawatsha baseenyi babo kuswikila bepinda nyenyedzi nge bunji. Koga banonga phashu dzinokukula shango dzibe dziwuluka dziyenda zwadzo.

¹⁷Balindi babo banonga phashu, makulukota awo anonga mibunga ye phashu yagala mu bhakasa zhuba linopota, koga zhuba alibhaya dzowuluka dziyenda, ngono kube kusina unoziba kwadzayenda.

¹⁸Iwe mambo we Asiriya, balisi babo bakayizela, makulukota awo anotshumwayila. Bathu babo bakapalalila mu matombo kusina iye ungabakubunganya.

¹⁹Atjipo tjingapodza mbonje iyo, kukubala kuko nge kunoyisa ku lufu. Mmwe ne mmwe unohwa thawu nge kuko unolobela phande kuwa kuko, ngoti ndiani kene usakatongo hwisiwa zogwadza nge bukukutu gwe moyo uwo gusingapele.