Read Kalanga Habakuku 1 Bible Online

Habakuku 1 - Kalanga bible

Habakuku 1

¹Dama lakaamutjigwa nge Nlebesambeli Habakuku.

²Kowotola tjibaka tjingapani Yahwe, ndikumbila bhatsho, koga imwi musingahwilile? Ndimimilila kumuli nditi, “Phipiti,” ngono musingatjidze?

³Ini muthama kuti ndibone tjisakatambunuka, ndilinge mbipo kene? Golomodzo ne phipiti zwimbeli kwangu, kugwa ne kumukilana ku pamwe ne pamwe.

⁴Ndizo wali nlayo wadzinganyidziwa, kutambunuka akuna pakunobepo. Ngoti babi banokombeledza balulwami, ndizo kuti kutambunuka kuleyane.

⁵Linga zwitjaba ubone! Ngono ukaabale! Udzidzibale! Ngoti ndowoshinga tjimwe mu mazhuba awo, tjausingawogalamoyo, nenguba ungabe watjibudziwa.

⁶Ndomilidza Bakhaladiya, bathu ibabaje banotjisa bana majatu, banoyenda shango yose betapa magalo asiabo.

⁷Banotjisa kakale banotjika, banozwithamigwa nlayo nge kwabo, banolumbidza gudzo labo.

⁸Mbizi dzabo dzina lubilo kupinda dindingwe, banotjisa kupinda phele mu zhalima, mbizi dzabo dzomatha ha dzinginilila. Batathi badzo banodwa kule, banowuluka se dzu lidzamulila kunoja.

⁹Banozha bose bezhila phipiti, bedwilila bakalinga mbeli bekubunganya batapiwa bangapa nsetje nge bunji.

¹⁰Banokuwelela bomambo, bakadadila babusi. Banoseka mizi mikulu yose ye matizhilo yakasima, bebe bebaka matuluthulu e mavu beitapa.

¹¹Ipapo bebe bepinda se phepo bedwilila, bana nlandu, ibo banoti simba labo ndzimu wabo.

¹²Imwi Yahwe apa amuzobepo kudwa ntolo tjose kene? Ndzimu wangu, Nyengemali wangu, iswi atitowofa. Imwi Yahwe makabatjwayila kusumikilisiwa, Imwi Shongwe makabashalulila kulobgwa shamu.

¹³Mesho enyu mabuyanana kwaasakafanila kulinga mbipo, amungaletjedzele tjisiitjo tjishingikala. Ini ngono mu letjedzela batjebeli? Munyelelileni babiibi belobesa bakalulwama kubapinda saikoku wali?

¹⁴Makathama bathu bakanga hwobe dze gungwa, bakanga zwibumbiwa zwe gungwa zwisina mbusi.

¹⁵Tjita tjibi tjobakweba bose nge zwiweko, tjobabhatshila nge gwanga gwatjo, unowobakubunganya mu dandi lile, ndizo ebe eshatha eshongozhela.

¹⁶Ndizo wali ebe edusila zwibhayilo gwanga gugwe ebe episila dandi lile motsha, ngoti gwanga gugwe go ntjidzila mu ipepkhwe eguta zojiwa zwinozipa.

¹⁷Apa unowodwilila emola gwanga gugwe, elobesa zwitjaba asina ngoni tjatjose kene?