Read Kalanga Habakuku 2 Bible Online

Habakuku 2 - Kalanga bible

Habakuku 2

¹Ndowotatha ngadzi yangu, ama pezhugwi kwayo, ndowolindila kubona tjabanowondidwa ne dabilo yandinowopa nge kung'ong'ola kwangu.

²Yahwe bakandidabila beti, “Kwala mbono itjeneseke mu zwileiti ndizo abale akalabuka.

³Ngoti mbono imilile tjibaka tjakabigwa, inoleba ngekwe bhelelo aingabe manyepkhwa. Kene inonoka uimilile, nge malebeswa inowozha aitowononoka.

⁴“Bona, iye unozwikudza, njemulo dzidze adzizolulwama, koga nlulwami unowotjila nge kugalamoyo kukwe.

⁵Nge malebeswa nkumbi we zhambi unonlasha, unozwikudza aatodzikama. Hwulo dzidze dzakaashama se ikumbu, unonga lufu aatotongo guta. Unokubunganyila zwitjaba zose kunli ebe etapa bathu bose.

⁶“Apa bose ibaba bathu abatowonkuwelela bendadila benlengudza beti, ‘Yee mme wee ku kuli iwe unozwikubunganyila thundu yakwibiwa uzwithama nfumi nge kutjebela! Kowotola tjibaka tjingapani ikoku kushingikala?’

⁷Apa baunokolota abatomilika tjinyolotjo kene? Apa abatowomilika bakathama kuti uteteme kene? Ipapo unowobe wabe tjabhakhwa ndibo.

⁸Ngoti iwe wakatapila zwitjaba zwinjinji, bathu bose bakasala banowokutapila. Kana wakatebula malopa, wakakolomodza shango ne mizi ne mmwe ne mmwe muili.

⁹“Yee mme wee ku kuli iwe unobaka bushe gugo nge zwe butjebeli ubaka magalo awo se shaka pezhugwizhugwi kutizha mbatsha dzingakuwila.

¹⁰Wakalukila gwanga kulobesa bathu banjinji, ubhatisa shoni ng'umba iyo uzwitenganyila tjibuya nge tjibiibi.

¹¹Mabgwe akabaka guma anowomimila, ngono mbalilo dzowodabila.

¹²“Yee mme wee, kuna unobaka nzi nkulu ngotebula malopa, ebe ebumba nzi nge jinyo.

¹³Apa akutodwa muna Yahwe Masimbawose kuti nshingo we maboko e bathu ube tjinothutidza moto kene? Kuti zwitjaba zozwinyadzila suli kene?

¹⁴Koga shango inowozhala zibo ye gudzo la Yahwe se vula yakadzinga gungwa.

¹⁵“Yee mme wee, iwe unopa babakidzani babo tjing'o, ubadilila kuswikila belaladza kuti ndizo ulinge mbujo dzabo.

¹⁶Unowobe ne shoni dze kulingigwa pasi pana kuti ukudziwe. Tjing'wa iwe ulaladze utshatsharike. Bhepe limu luboko gwe luji gwa Yahwe laswika ku kuli ngono shoni dzowombadza gudzo lilo.

¹⁷Ngoti thapatapa yawakathamila Lebanoni inowokukulila ne kubulaya phuka kwawakathama kowozhisa kutja mukuli. Ngoti wakatebula malopa e bathu, wakakolomodza shango ne mizi mikulu ukabulaya mmwe ne mmwe muili.

¹⁸Apa ifano tjina nshingo weni se kuli kuthu kwakathamiwa nge nthu? Kene ifano tjinodiya manyepkhwa tjobhatsha ngeni kene? Kana watjithama unogalabgwe muna tjaathama iye, nenguba tjaathama tjili ifano koga tjisingake tjikalebeleka.

¹⁹“Yee mme wee, kuna unodwa lukuni eti, ‘Muka!’ Kene edwa bgwe lisingatjile eti, ‘Milika!’ Apa tjingalaya kene? Tjakadzulugwa nge golide ne siliva, akuna meya ye kufema mutjili.

²⁰Koga Yahwe bamu Ng'umba yabo yakayengemala, shango yose ngainyalale mbeli kwabo.”