Read Kalanga Habakuku 3 Bible Online

Habakuku 3 - Kalanga bible

Habakuku 3

¹Ntembezelo we Nlebesambeli Habakuku kuyendidzana ne Shigionoti.[1]

²Imwi Yahwe, ndakahwa ngekwe tjilumbi tjenyu, ngono ndimile ndakakaabala ngekwe nshingo wenyu imwi Yahwe, muumusidzile mu misi yedu, mu misi ino yedu thamani kuti uzibike, mu bushongola gwenyu kumbulani ngoni.

³Ndzimu wakadwa ku Temani, Nyengemali edwa ku Dombo le Parani. Tjedza tjawo tjakadzinga kudzimu, shango yakazhala kulumbidziwa kwawo.

⁴Kunaka kwawo konga kubhuda kwe zhuba, mazazi awo anopenya kudwa mu tjiazha tjawo ipo pakasumbikwa simba lawo.

⁵Mbeli kwawo koyenda bugwele ngono tjifo tjakasala shule thambo dzawo.

⁶Mamilika mukazunguza shango, molinga mukathama zwitjaba zwikatetema. Matombo asingapele anophatukana, matuthu etjinga anowila, zila dzawo ngedza ntolo.

⁷Ndobona mishasha ye Bakhushani ili mu kudziyidzika, magalo e Midiyani anotetema.

⁸Apa makagwadzila moyo njizi kene imwi Yahwe? Bushongola gwenyu gobhayana ne njizi kene? Mamukila gungwa nge bushongola kene? Makatatha mbizi dzenyu ne koloyi dzenyu dze ngwa dzinokunda.

⁹Makalulwamisila kushingisa dati lenyu, makazhisigwa misebe minjinji. Mopalulanya shango nge njizi.

¹⁰Matombo anomubona ngono anotetema, vula dzinowunga nge masimba dzopinda dzikukula. Madziba akangina anobomba anomilidzila maboko awo zhuzhugwi.

¹¹Zhuba ne mwedzi zoma zhuzhugwi zwisingazunguzike ngekwe kupenya kwe misebe yenyu iwuluka, nenge kupenya kwe thumo lenyu.

¹²Mapalama shango makagwadzamoyo, motshambatshamba shango nge bushongola.

¹³Mozha kuwotjidza bathu benyu kutjidza wenyu wakazhodziwa. Molobesa ntungamili we shango ye mbipo, mon'ambula kudwa ku nsholo kunoti ku matshambo.

¹⁴Mobhaya ntungamili we babhayani babe nge mathumo awe, babhayani babe banotinginilila kutipaladza, banozwikudza sebabe pejo nge kulobesa, sebamanikidza bakabgwata.

¹⁵Motshambatshamba gungwa nge mbizi dzenyu, mupukusha vula nji.

¹⁶Ndahwa ngono alobgwa nge hana, ndotetemesiwa nge nsindo, mafupa angu kanga anobola, makumbo anotetema. Kene kwakajalo ndowolindila nge moyo nlefu kubona zhuba le guma liswikila bathu banotinginilila.

¹⁷Nenguba mpaya usingathinile, ne mitjelo isipo mu nzhambi, nenguba mitoba isina tjayinatjo, minda naiyo isingaduse zojiwa, nenguba kusina pkhwizi ne mbudzi mu danga ne ng'ombe kusina mu matanga,

¹⁸kene kwakajalo zwako ndowoshatha muna Yahwe, ndowokulukupkhwa mu Ndzimu Ntjidzi wangu.

¹⁹Yahwe Ndzimu nsimisi wangu, banothama makumbo angu kanga e phala hadzi, banothama kuti nditathile pezhugwizhugwi. Ku ntungamili nge zwilidzo zwe mitjili.