Read Kalanga Zefaniya 2 Bible Online

Zefaniya 2 - Kalanga bible

Zefaniya 2

¹Shanganani, muzwikubunganye imwi itjaba tjisina shoni,

²musathu mukatutudzigwa kutjena se bunye gunowuluka, kugwadzamoyo kwa Yahwe kusathu gukadelukila mu muli, zhuba le bushongola gwa Yahwe lisathu likamuzhila.

³Shakani Yahwe imwi mose banakuzwiyisa pasi be shango, imwi munolondolodza ndaulo dzabo. Shakani ndulamo, shakani kuzwiyisa pasi, pamwe swiyo mowobakililika, mu zhuba le bushongola gwa Yahwe.

⁴Ngoti Gaza inowofupatigwa, Ashikeloni inowothukudzika. Bathu be Ashidodi banowotatiwa zhuba lili pa thong'omana, Ekironi inowodzikunugwa.

⁵Yee mme wee! Mapalala imwi bagali be tjekelo dze gungwa, imwi ludzi gwe Bakereti! Dama la Yahwe lobhayana namwi, iwe Kanana shango ye Bafilisitiya, ndowokulobesa kudzina kusala kusina ne n'gali wasala.

⁶Iwe tjekelo dze gungwa, unowobe mafudzilo, matanga ne thiba dze balisi dzabanong'wisila mbudzi ne pkhwizi dzabo.

⁷Shango iyeyo inowobe ye malimbelimbe e Juda, ngono banowofudzila muili, ng'umba dze Ashekeloni, banowoizela mudzili madekwana. Ngoti Yahwe Ndzimu wabo banowobakumbula, bakabgwiliza kubhudilila kwabo.

⁸Ndahwa masapa e Moabu ne madado e Baamoni, kuti bakasapulanya bathu bangu tjini, bepembela ngekwe shango yabo.

⁹Ndizo anditjatjila, kojalo Yahwe Masimbawose, Ndzimu we Iziraela, Moabu unowosala unga Sodoma ne Baamoni bakanga Gomora, shango izhele zwishosho ne makomba e mwenyu, shango yakathukudzika tjatjose. Limbelimbe le bathu bangu lowobatapa, batjila be itjaba tjangu banowodzitola.

¹⁰Itjetji nditjo tjinowobe gobe labo ngekwe mazwikudzo abo, ngoti bakasapulanya bakazwikudza bebhayana ne bathu ba Yahwe Masimbawose.

¹¹Yahwe banobamukila ngekwa kabangalala, bakatobosa midzimu yabo yose mu shango ngono zwitjaba zose zwimu tjekelo zowobanamata bamwe ne bamwe mu shango yabo.

¹²Namwibo Bakhushi, mowobulawa nge thumo langu.

¹³Banowotambunudza luboko gwabo kubhayana ne baku bunandzwa, bakalobesa Asiriya. Banowothama Ninive ikabe dongo ikakwakwalala se tjilambanyika.

¹⁴Matanga anobutha pakati kwayo zwitjili zose ngothubukana kwazo, makunda na boshoni zowogala ko. Hwunda dzowolila dziligele mu mafesitere, magwada anowobe ali pa itubhu tje nkoba, makwasayile e misida anowobe pa tjena.

¹⁵Iwoyu nzi nkulu unozwikudza, wakabakililika, wakabe uzwidwa uti, “Ndimi koga, akuna mmwe.” Watjithukudzika kungapani kene! Watjibe bugalo gwe phuka dze shango, mmwe ne mmwe unopinda pauli, unotjenama kapelegwa nge mate.