Read Kalanga Hagayi 1 Bible Online

Hagayi 1 - Kalanga bible

Hagayi 1

¹Mu gole le bubili la Mambo Dariyasi, mu zhuba le kutanga le mwedzi we butathatu, dama la Yahwe lakazha nge nlebesambeli Hagayi kuna Zerubhabeli nkololo wa Shealitiyele mbusi we Juda ne kuna Joshuwa nkololo wa Jehozadaki mpirisiti nkulu liti,

²“Tjinoleba Yahwe Masimbawose etji, ‘Bathu ibaba banoti, “Tjibaka atjithu tjikazha tjekuti ng'umba ya Yahwe imusiwe.” ’ ”

³Ipapo dama la Yahwe likazha nge nlebesambeli Hagayi liti,

⁴“Apa itjetji tjibaka tjekuti imwi mube muli gele mu ng'umba dzenyu dzakabakwa zwakanaka, koga ng'umba ya Yahwe ili dongo kene?

⁵“Ndizo ngwenu tjinoleba Yahwe Masimbawose etji, ‘Yelani njele sekwa munotjila.

⁶Makadzwala kuli kunjinji koga mukavuna kushomanana, moja koga amutoguta, mong'wa koga amutogutshika. Mofuka koga amutodziyigwa. Moamutjila mibhayilo mulonga mu hwomo dzina mabuli.’

⁷“Tjinoleba Yahwe Masimbawose etji, ‘Yelani njele sekwa munotjila.

⁸Tathani matombo mubuye ne mapango mubake ng'umba iyeyi, kuti ndiishathile ndikudziwe muili.’ ” Koleba Yahwe.

⁹“Makalindila kuwana kuli kunjinji, koga bonani, kwakabuya kuli kushomanana, tjamakabuza kanyi ndakatjiwulusa. Ngotini?” Koleba Yahwe Masimbawose. “Ngekwe ng'umba yangu igele zwayo ili dongo, koga mmwe ne mmwe wenyu ebaka ng'umba iye.

¹⁰Ndizo kudzimu kwakadziba khawa yako kuti isiwe ne shango yakadziba zwidzwalo zwayo ngekwenyu.

¹¹Ndakazhisa bhamba mu minda ne mu matombo, mu mathunde ne mu mizhambi akuna nkumbi ntshwa, akuna mafuta ne tjimwe ne tjimwe tjinobhuda mu mavu, bhamba limu bathu ne mu phuka ne muna zose zwabanothama.”

¹²Ipapo Zerubhabeli nkololo wa Shealitiyele na Joshuwa nkololo wa Jehozadaki mpirisiti nkulu ne malimbelimbe wose e bathu bakahwa hwi la Yahwe Ndzimu wabo ne ndayidzo ye nlebesambeli Hagayi ngoti Yahwe Ndzimu wabo wakabe wantuma, ngono bathu bakatja Yahwe.

¹³Ipapo Hagayi ntumwa wa Yahwe kapa bathu ndayidzo ya Yahwe inoti, “Imi ndinamwi.” Koleba Yahwe.

¹⁴Ngono Yahwe bakazunguza meya ya Zerubhabeli nkololo wa Shealitiyele mbusi we Juda ne meya ya Joshuwa nkololo wa Jehozadaki, mpirisiti nkulu ne meya ye malimbelimbe wose e bathu. Ngono bakazha bakamusa ng'umba ya Yahwe Ndzimu wabo,

¹⁵mu zhuba le bumakumi mabili ana manna (24) mu mwedzi we butathatu mu gole le bubili la Mambo Dariyasi.