Read Kalanga Zakhariya 1 Bible Online

Zakhariya 1 - Kalanga bible

Zakhariya 1

¹Kwakati mu mwedzi we buzhanakadzi we gole le bubili la Dariyasi, dama la Yahwe likazha ku Nlebesambeli Zakhariya nkololo wa Bherekiya, Bherekiya ali nkololo wa Ido liti,

²“Yahwe bakabe bakagwadzila moyo bobatategulu benyu kwazo.

³Ndizo ngwenu ubadwe uti Yahwe Masimbawose bakati, ‘Shandukilani kundili,’ kojalo Yahwe Masimbawose, ‘ngono namibo ndowoshandukila kumuli,’ Yahwe Masimbawose baleba.

⁴Musidwe mufanana na bobatategulu benyu ibo bakati balebesambeli beti Yahwe Masimbawose bakati, ‘Shandukilani bubi gwenyu ne zila dzenyu dzakabipa,’ koga ibo bakasinditeedze kene kundibhulutana, koleba Yahwe.

⁵Bangayi sakuno bobatategulu benyu? Apa ne balebesambeli banotjilila tjatjose kene?

⁶Koga matama angu ne milayo yangu yandakapa balanda bangu balebesambeli apa azwizokulila bobatategulu benyu kene? Apa abazodwapo bakashandukila matjinyo abo kene beti, ‘Yahwe Masimbawose batiloba shamu yakalingisana ne zwiyito zwedu zwatakathama koga sekwa bakabe bakazwimisila thama.’ ”

⁷Mu zhuba le bumakumi mabili ana manna le mwedzi we bugumi lina nng'ompela mwedzi we Shebati, mu gole le bubili le mbuso wa Dariyasi dama la Yahwe lakazha kuna Nlebesambeli Zakhariya nkololo wa Bherekiya, Bherekiya ali nkololo wa Ido liti,

⁸“Mu busiku, ndakabe ne mbono. Bonani ndakabona nlume akatatha mbizi shaba, wakabe ali mile pakati kwe nshangule mu gorokoro ngono shule kukwe kwakabe kuna mbizi shaba ne thukwa ne tjena.

⁹Ngono abhuzwa nditi, ‘Zwini izwezwi She wangu?’ Ngono ntumwa we kudzimu wakabe elebeleka nami kashandula eti, ‘Ndowokulakidza kuti zwini izwezwi.’

¹⁰Nlume wakabe ali mile pakati kwe nshangule kadabila eti, ‘Aba ndibo bakatumwa ndi Yahwe kuyendayenda beshola shango.’

¹¹“Ngono ipapo bakadabila ntumwa we kudzimu wa Yahwe wakabe ali mile pakati kwe nshangule beti, ‘Tayenda yenda mu shango, ngono bonani tawana shango yose ili gele nge kunyalala.’

¹²Ntumwa we kudzimu wa Yahwe kalebeleka eti, ‘Imwi Yahwe Masimbawose, kowotola tjibaka tjingapani kuti muhwile ngoni Jerusalema ne mizi ye Juda kene? Iyo yamakagwadzila moyo kwe makole ali makumi ali kutenda (70) kene?’

¹³“Ngono Yahwe bakashandula ntumwa we kudzimu wakabe elebeleka nami nge matama mabuya, matama e nyaladzo.

¹⁴Ipapo ntumwa we kudzimu wakabe elebeleka nami kabe eti kundili, ‘Lebeleka uti Yahwe Masimbawose bakati: Ndobinda kwazo ngekwe Jerusalema ne ngekwe Ziyoni.

¹⁵Gwadzamoyo kwangu kukulukulu kumu zwitjaba zwigele zwakaliga makumbo, ngobe ndakabe ndakagwadza moyo kutukununu koga bakapandusa mbipo.

¹⁶Ndizo ke, Yahwe bakati, Ndakashandukila ku Jerusalema nge ngoni, Ng'umba yangu inomusiwa mu Jerusalema. Nsungo unolizanya unowotambunudziwa mu Jerusalema,’ ” koleba Yahwe.

¹⁷Lebeleka kakale uti Yahwe Masimbawose bakati: “Mizi mikulu yangu inowotebukana kakale nge kubhudilila, Yahwe banowohwila ngoni Ziyoni kakale ngono banowozwishaluligwa Jerusalema.”

¹⁸[1]Ndakati ndimilidza mesho abona manyanga manna.

¹⁹Ngono ndakabhuzwa ntumwa wakabe elebeleka nami nditi, “Ini ikoku?” Ngono kandishandula eti, “Iyawa manyanga ndiwo akapaladza Juda ne Iziraela ne Jerusalema.”

²⁰Ipapo Yahwe bakandilakidza bathuli be butale bali banna.

²¹Ngono ndikabhuzwa ati, “Ibaba bazha bewoshingani?” Kandishandula eti, “Iyawa manyanga akapaladza Juda, kuti ndizo kusale kusina ndodwa ne nthu unomusa nsholo, balume ibaba bazha kuwobatjisa ne kulobesa manyanga e zwitjaba zwakabe zwamukila shango ye Juda ne kuipaladza.”