Read Kalanga Zakhariya 10 Bible Online

Zakhariya 10 - Kalanga bible

Zakhariya 10

¹Kumbilani vula muna Yahwe mu tjibaka tje vula ye ntovudzo, ndibo Yahwe banothama lupenyo gwe vula, ndibo banonisila bathu vula, bakapa mmwe ne mmwe fulo mu shango.

²Ngoti midzimu inoleba zwisina wakabona koga, bakandili banoleba manyepkhwa koga, banoleba hwope dzisidza tjimwe, nyaladzo yabo i phepo koga. Ndizo bathu bedzimila se pkhwizi, betshambilidziwa ngoti besheta nlisi.

³Bushongola gwangu gumu balisi, kakale ndowoloba shamu batungamili, ngoti Yahwe Masimbawose banowotjengeta pkhwizi dzabo, iyo ng'umba ye Juda, unowobathama bakanga mbizi inobilima mu ngwa.

⁴Mu Juda kowobhuda bgwe linotambunudza munli kowobhuda lubambo gwe nshasha, munli kowobhuda nsebe we ngwa, munli kowobhuda mbusi mmwe ne mmwe.

⁵Bose banowonga balume be babhayani betshamba bakasima bali mu zijana dze ngwa ngoti Yahwe banabo, banowogwa bakakunda bataswi be mbizi dze ngwa.

⁶Ndowosimisa ng'umba ya Juda, kakale ndowotjidza ng'umba ya Josefa. Ndowobabgwiliza kanyi ngobe ndina ngoni mu bali. Banowonga ungati andizotongobasiya ngobe ndimi Yahwe Ndzimu wabo kakale ndowobadabila.

⁷Baifureimi banowonga balume be ngwa, ngono mu mimoyo yabo banowoshatha se bakalaladza, Bana babo banowobona ngono banowobe ne kushatha, banowoshatha muna Yahwe.

⁸Ndowodana bathu bangu, ngono abakubunganya, ngono ndowobadzutunula, abawatsha sekwa bakabe bali iko kutanga.

⁹Nenguba ndakabe ndabapaladzila kuna be zwitjaba, nekwakajalo ku magalo akulekule banowondikumbula. Ibo ne bana babo banowotjila, ngono banowobgwilila kanyi.

¹⁰Ndowobadusa mu Egipiti abakubunganya kudwa mu Asiriya. Ndowobazhisa ku Giliyadi ne Lebanoni ngono akutowobe ne magalo anobakwana.

¹¹Banowotjuluka gungwa gwe mang'oni, ngono mapundu e gungwa anowotebamisiwa ne makangina kwazo kwe gwizi gwe Naili kowopkhwa. Kuzwikudza kwe Asiriya kowopela, ne simba le Egipiti lowopela.

¹²Ndowosimisa bathu bangu muna Yahwe, ngono nge zina labo banobatobela, koleba Yahwe.