Read Kalanga Zakhariya 14 Bible Online

Zakhariya 14 - Kalanga bible

Zakhariya 14

¹Bonani, zhuba la Yahwe lasendela lekuti thundu iyo yatapiwa ikobanyiwe pakati kuko.

²Ndowokubunganyila zwitjaba zose ku Jerusalema kuti bagwe nayo ngono nzi nkulu unowotapiwa ne thundu dze ng'umba dzowotapiwa ne bakadzi banowodzugwa, gwamu le nzi nkulu lowotapiwa koga basala abatowotogwa mu nzi nkulu.

³Ipapo Yahwe banowomilika bakanogwa ne zwitjaba koga sekwa bakagwa mu zhuba le ngwa.

⁴Mu zhuba ilelo makumbo abo anowobe alimile mu Dombo le Mitoba kunobhuda zhuba kwe Jerusalema ngono Dombo le Mitoba lowophatukana na pakati kukabe ne kunobhuda zhuba kwalo ne kunomila zhuba kwalo pakati kukabe ne nkuku nkulu, kube ne gwamu limwe le dombo liyendila ku burwa limwe liyendila ku bunandzwa.

⁵Mowotizha ne nkuku we dombo langu ngoti nkuku unonoswika ku Azele sekwa makatizha tjibaka tje kutenganyika kwe shango mu misi ya Uziya mambo we Juda. Ipapo Yahwe Ndzimu wangu banowozha ne bayengemali babo bose.

⁶Mu zhuba ilelo akutowobe ne tjedza, akutowobe ne kupota kene kapuku.

⁷Kowobe kuli zhuba lisingafanane ne mamwe mazhuba kowobe kuli zhuba lisina masikati kene busiku, zhuba linozibgwa na Yahwe. Ha madekwana ezha kowobe tjedza.

⁸Mu zhuba ilelo vula inotjila inowowunga idwa mu Jerusalema, gwamu limwe liwungila ku gungwa le kunobhuda zhuba[4] limwe lowowungila ku gungwa le kunomila zhuba,[5] mu tjilimo ne mu mbaba.

⁹Yahwe banowobe mambo be shango yose. Mu zhuba ilelo kowobe na Yahwe nng'ompela ne zina labo lowobe lili ilo koga.

¹⁰Shango yose kudwa mu Geba kunoti Rimoni ku burwa gwe Jerusalema kowonga Arabha. Koga Jerusalema inowomilidzigwa pezhugwi ikasala ili mu magalo ayo kudwa ku Nkoba we Bhenjamini kuyendila ku Nkoba we kutanga ku Nkoba we ku ndzibo ne kudwa ku thungamakole ye Hananeli kunoti kunoswing'wa nkumbi we zhambi wa mambo.

¹¹Jerusalema inowogaligwa tjatjose, aitjowofa yakolomogwa kakale, Jerusalema inowobakililika.

¹²Etji nditjo tjiga Yahwe tjabanowoshingisa kubulaya zwitjaba zwinogwa ne Jerusalema. Nyama ye mibili yabo inowobola balimile, mesho abo anowobola ne ndimi dzabo dzowobolela mu milomo yabo.

¹³Mu zhuba ilelo Yahwe banowoloba bathu nge lutjo bukulu. Nthu mmwe ne mmwe unowobhata mmwe nge maboko bakamukilana.

¹⁴Juda bo inowogwa ne Jerusalema. Fumwa ye zwitjaba zwakapoteleka inowotogwa, golide ne siliva ne zwiambalo zwinjinji.

¹⁵Tjiga tjinonga itjetji tjowobulaya mbizi ne mowulo ne dzikamela ne madonki ne zwithuwo zose zwimu makotokelo.

¹⁶Ipapo bakatjila kudwa mu zwitjaba zwabe zwigwa ne Jerusalema zowogala zwiyenda gole ne gole zwinonamata Mambo Yahwe Masimbawose ne kuzana Nzano we Mishasha.

¹⁷Ha kungabe ne mmwe we bathu mu shango usingayende ku Jerusalema kunonamata Mambo, Yahwe Masimbawose, akutowobe ne vula inona.

¹⁸Ha bathu be Baegipiti basinganonamata akutowobe ne vula inona. Yahwe banowobazhisila tjiga tjabanolonga mu bathu basingazane Nzano we Mishasha.

¹⁹Eyi ndiyo shamu inowolobgwa Egipiti ne shamu ye zwitjaba zose zwisinga yende kunozana Nzano we Mishasha.

²⁰Mu zhuba ilelo, “Kwakayengemala kuna Yahwe” kowobe kwakakwagwa mu tiloko dze mbizi ne hali dzimu Ng'umba ya Yahwe dzowonga zwikutili zwakayengemala zwi mbeli kwe tjibeso tjinopisigwa zwibhayilo.

²¹Hali imwe ne imwe mu Jerusalema ne Juda inowoyengemala kuna Yahwe Masimbawose naibabo banozha kuthama zwibhayilo banowotola dzimwe hali bakabhika nadzo. Ngono mu zhuba ilelo akutjowobe ne N'kanana mu ng'umba ya Yahwe Masimbawose.