Read Kalanga Zakhariya 2 Bible Online

Zakhariya 2 - Kalanga bible

Zakhariya 2

¹Ndakati ndimilidza mesho abona nlume akabhata nsungo unolizanya.

²Ngono Ambhuzwa ati, “Unoyenda ngayi?” Kashandula kati, “Kunolizanya Jerusalema, kubona kuti ingabe bulefu gungapani ne kuti ingabe ne bupabi gungapani.”

³Ngono ntumwa we Kudzimu wabe elebeleka nami kasedzela mbeli ngono kukazha mmwe ntumwa kuwon'shangamidza,

⁴kandwa kati, “Labuka! Kadwe nzhuzha iwowuje uti, ‘Jerusalema inowogagwa se nzi usina makuma, inowozhala bathu basi bashoma ne ng'ombe dzisishoma muuli.

⁵Ngobe imi nge kwangu ndowobe guma le moto kubakilila, ngono unowobe tjedza mukati kwawo.’ ” Koleba Yahwe.

⁶“Tizhani! Tizhani! Tizhani ikoko imwi baku shango ye bunandzwa.” Koleba Yahwe. “Ngoti ndakamupaladza se phepo nna dze zhuzhugwi.” Koleba Yahwe.

⁷“Tizhani kaa Ziyoni! Imwi munogala ne bakololokadzi be Bhabhiloni.

⁸Ngobe Yahwe Masimbawose bakati, Ngotjengeta gudzo labo banditumila ku zwitjaba zwakamutapa, ngoti iye unomunginilila unobe abhata shanga ye zhisho lile.

⁹Bonani ndimi ndinowomugwila, ngono banowotapiwa ndi ibabo bakabe bali balanda babo. Ipapo mowoziba kuti Yahwe Masimbawose ndibo bandituma.

¹⁰“Imba kaa iwe nkololokadzi we Ziyoni, bona ndobuya ngono ndowogala pakati kwenyu.” Koleba Yahwe.

¹¹Ngono zwitjaba zwinjinji zowobhatana na Yahwe mu zhuba ilelo ngono banowobe bathu bangu ngono nami ndowogala pakati kwenyu, ndizo mowoziba kuti Yahwe Masimbawose bandituma ku muli.

¹²Ngono Yahwe banowotola Juda kube gwamu labo mu shango yakayengemala ngono ndoshalula Jerusalema kakale.

¹³Muti hwu, mmwe ne mmwe wenyu mbeli kwa Yahwe, ngobe bamilika mu magalo abo akayengemala.