Read Kalanga Zakhariya 3 Bible Online

Zakhariya 3 - Kalanga bible

Zakhariya 3

¹Ipapo wakandilakidza Joshuwa mpirisiti nkulu ali mile mbeli kwe ntumwa wa Yahwe ngono Satani kabe ali mile ku luboko gugwe gwe luji kuti antilike nlandu.

²Yahwe bakabe bedwa Satani beti, “Yahwe ngaba kutjemele iwe Satani! Yahwe ibo bakashalula Jerusalema ngaba kutjemele! Apa ate isikalala tjakazhwabugwa mu moto kene?”

³Ngono Joshuwa wakabe akaambala zwiambalo zwina shambgwa ali mile mbeli kwe ntumwa we kudzimu.

⁴Ngono ntumwa we kudzimu kati kuna ibabo bakabe bali mile mbeli kukwe, “Muambule zwiambalo zwizwe zwina shambgwa.” Ngono kuna Joshuwa kandwa kati, “Bona, ndadusila kutjena jinyo lilo ngono ndowokuambadza zwiambalo zwitshwa.”

⁵Ipapo ndikati, “Ngaba mbadze hwutshe mbuyanana mu nsholo uwe. Ndizo bakambadza hwutshe mbuyanana mu nsholo, ngono bakambadza zwiambalo, ntumwa wa Yahwe wakabe ali mile ipapo.”

⁶Ngono ntumwa wa Yahwe kalaya Joshuwa.

⁷Yahwe Masimbawose bakati, “Ha ungatobela zila dzangu ukalondolodza kuda kwangu, ipapo unowotungamila Ng'umba yangu ngono ukatjengeta mabazhe angu, ngono ndowokupa ndetjedzelo kuti ugale pakati kwa ibaba bamile ipapa.

⁸Tjiteedza iwe Joshuwa mpirisiti nkulu, iwe ne bapirisiti nawe ngobe balume banolakidza bumangwana, bona ndozhisa nlanda wangu Lutabi!

⁹Bona, bgwe landabiga mbeli kwa Joshuwa, bgwe ling'ompela lina mesho ali kutendeka. Bona ndokobolela nkwalo mulili. Koleba Yahwe Masimbawose. “Ndowodusila kutjena jinyo le shango iyeyi mu zhuba ling'ompela.

¹⁰Mu zhuba ilelo,” koleba Yahwe Masimbawose. “Mmwe ne mmwe wenyu unowokoka mbakidzani naye kuwogala kusi kwe nzhambi ne kusi kwe nti we mpaya.”