Read Kalanga Zakhariya 5 Bible Online

Zakhariya 5 - Kalanga bible

Zakhariya 5

¹Ngono ndakati ndimilidza mesho kakale abona lukwalo guwuluka mbeli kwangu.

²Ngono ntumwa we kudzimu kandibhuzwa eti, “Unobonani?” Adabila nditi, “Ndobona lukwalo gwe bulefu gwe thambo dzili zhanalume ne bupabi gwe thambo nna dzina gaswa guwuluka.”

³Ipapo kabe eti kundili, “Ikoku i bhiso linoandama nge shango yose, ngoti kuyenda nge kwalo iye unokwiba unowotatiwa, naiye unotuna nge manyepkhwa unowotatiwabo kuyenda nge bhiso.

⁴Yahwe Masimbawose banoleba beti, ‘Ndotumila bhiso ngono lowongina mu ng'umba ye mbava ne ng'umba ya iye unotuna nge manyepkhwa nge zina langu ngono lowogala mu ng'umba iye kudzina liyikolomola kose mapango ne mabgwe ayo.’ ”

⁵Ntumwa we kudzimu wakabe elebeleka nami kazha mbeli ngono kati kundili, “Milidza mesho awo ngono ubone tjaswika.”

⁶Abe nditi, “Ini ikoku?” Kashandula eti, “Ikoku itundu tjaswika.” Ngono kabe eti, “Ikoku i jinyo le bathu lakaandama nge shango yose.”

⁷Ngono ipapo abona, tjizwino tjinolema tje ntodo tjikafumugwa ngono abona nkadzi ali gele mu itundu.

⁸Ntumwa we kudzimu kabe eti kundili, “Ikoku bubi.” Ngono kasundila nkadzi iwoyu mu itundu kabe efumika ne tjizwino tje ntodo.

⁹Ndakati ndimilidza mesho angu abona bakadzi babili bewulukila kundili, phepo yakabe ili mu mapapilo abo, bakabe bana mapapilo anonga e hanganlobe. Bakazha betola itundu ngono bakatjimilidzila pakati kwe kudzimu ne shango.

¹⁰Ngono abhuzwa ntumwa we kudzimu wakabe elebeleka nami nditi, “Banoyisa ngai itundu?”

¹¹Wakandishandula eti, “Banonotjiyisa ku shango ye Shinari, kutjibakila ng'umba ikoko, ngono inowoti yatjipela bakanobiga itundu ikoku.”