Read Kalanga Zakhariya 6 Bible Online

Zakhariya 6 - Kalanga bible

Zakhariya 6

¹Ndakati ndimilidza mesho gwe bubili abona koloyi dze ngwa nna dzidwa pakati kwe matombo mabili. Matombo iyawa akabe ali e phangula.

²Koloyi ye kutanga yakabe yakakwebiwa nge mbizi shaba, koloyi ye bubili yakakwebiwa nge mbizi thema,

³ye butatu yakabe yakakwebiwa nge mbizi tjena ye bunna iyo yakakwebiwa nge mbizi dze manjanja, dzose dzakasima.

⁴Ngono ndakabhuzwa ntumwa we kudzimu wakabe elebeleka nami nditi, “Izwezwi zwini tetshi wangu?”

⁵Ntumwa we kudzimu kandishandula eti, “Ikoku i phepo nna dze kudzimu, dzinomilidza dzisinokuzwilakidza mbeli kwa tetshi we shango yose.

⁶Koloyi ye mbizi thema inoyenda ku shango ye bunandzwa, ye mbizi tjena ikaisala shule ngono mbizi dze manjanja idzo dzakalinga ku burwa.”

⁷Mbizi dzakasima dzikamilika dzakashingailila kushola shango ngono ntumwa we kudzimu kadzidwa eti, “Yendani mupalame shango mu ishole!” Ndizo mbizi dzikamilika.

⁸Ipapo ntumwa we kudzimu ka milidza hwi kati, “Bona, mbizi dzinoyendila ku shango yeku bunandzwa dzandizhisila kunyalala ngekwe shango yeku bunandzwa.”

⁹Ngono dama la Yahwe likazha kundili liti,

¹⁰“Tola zwipo mu batapiwa Helidayi na Tobiya na Jedaya ibo badwa ku Bhabhiloni ngono uyende tjinyolotjo ku nzi wa Josiya nkololo wa Zefaniya.

¹¹Utole siliva ne golide uthame tjiala ngono utjiambadze mpirisiti nkulu Joshuwa nkololo wa Jehozadaki.

¹²Umbudze kuti Yahwe Masimbawose bakati, ‘Bonani nlume woyu unodang'wa Lutabi ngono unowopasula se lutabi kudwa mu magalo awe ngono kabaka Ng'umba ye Ndzimu ya Yahwe.

¹³Ndiye unowobaka Ng'umba ye Ndzimu ya Yahwe ngono gudzo lowonfukidza ngono unowogala tjigalo tje bushe kabusa, unowogala tjigalo tje bupirisiti ngono mbuso uwe ne bupirisiti gugwe zowobe zwakabhatana.

¹⁴Tjiala tjipiwe Helemu[2] na Tobiya na Jedaya na Hena[3] nkololo wa Zefaniya. Tjiala itjetji tjibigwe mu Ng'umba ya Yahwe tjili ikumbuludzo.

¹⁵Ngono ibabo bakulekule banowozha bakabaka Ng'umba ye Ndzimu ya Yahwe kuti ndizo muzibe kuti Yahwe Masimbawose banobusa bose ndibo bandituma kumuli. Ngono zose zowoshingikala amuteedza kwazo hwi la Yahwe Ndzimu wenyu.’ ”