Read Kalanga Zakhariya 7 Bible Online

Zakhariya 7 - Kalanga bible

Zakhariya 7

¹Kwakati mu gole le bunna le mbuso wa Mambo Dariyasi, mu zhuba le bunna le mwedzi we buzhanalume unodang'wa we Khisilevi dama la Yahwe likazha kuna Zakhariya.

²Bathu be Bhetele bakabe batuma Sharezeri na Regemu Meleki ne bamwe babo kukumbila lubu muna Yahwe

³ne kukumbila bapirisiti be Ng'umba ye Ndzimu ya Yahwe Masimbawose banobusa shango yose ne balebesambeli beti, “Apa takafanila lila ne kuzwinyima zojiwa mu mwedzi we bushanu sekwa tagala tithama makole wose kene?”

⁴Dama la Yahwe Masimbawose banobusa shango yose ngono likazha kundili liti,

⁵“Bhuzwa bathu bose kose ne bapirisiti be shango uti, ‘Apa makati muzwinyima zojiwa kakale mulila mu mwedzi we bushanu ne we butendeka mu makole wose iyawa ali makumi ali kutendeka, apa makabe muzwinyimila imi, imi dumbu kene?

⁶Ngono ngwenu amuja mung'wa apa amutobe muzwithamila kene?

⁷Apa makabe musakafanila bhulutana matama a Yahwe abakapa balebesambeli bekutanga tjibaka tje Jerusalema itjina mbakiso ne mizi yakaipoteleka, ne burwa ne shango yakawila kutjina bathu banjinji kene?’ ”

⁸Dama la Yahwe likazha kakale kuna Zakhariya liti,

⁹“Yahwe Masimbawose bakati, ‘Sumikilisani nge lebeswa kakale mulakidzane lubu ne ngoni.

¹⁰Amuzofanila tshambilidza tjilikadzi ne siyang'wa ne bazhi kene bashayi, kushete wakumbulila mmwe bubi.’

¹¹“Koga bakalamba teedza, bakabhatilila mu bukomba bakazwina zebe dzabo kuti ndizo basihwe.

¹²Nge malebeswa bakakukutadza mimoyo yabo, ikawomelela se bgwe, kuti ndizo basilondolodze nlayo ne matama a Yahwe Masimbawose abakatumila nge Meya yabo nge balebesambeli be kutanga. Ndizo, Yahwe Masimbawose bazhisa bushongola gusibushoma.

¹³“Ngono kwakashingikala koga sekwa ndakaleba koga bakadwilila bakasibhulutane ndizo banowolila koga anditowobateedza, kojalo Yahwe Masimbawose.

¹⁴Ndizoke ndowobapaladza nge dutu ndibapaladzila mu shango dzabasinga zibe. Ndizo shango inowosala ili matongo nge kwabo kusina ndodwa ne unoyenda yenda ngono shango yakanaka ikabe dongo.”